شيبوب (طولت ما طليت بعدين معاك لو جيت)

قالوا ليك اشرف الكاردينال مشى سجل ليه زيارة للجوهرة الزرقاء – قال يشوف الشغل ماشي كيف؟.
الحاصل شنو؟.
الشغل وصل وين؟.
طبعا ناس المريخ الكلام دا ما بفهموه لينا.
الواحد وقت بتكلم ليهم عن (الجوهرة الزرقاء) زي البتكلم ليهم باللغة البرتغالية.
ما بفهموا اي شيء.
المريخاب الحاجة الوحيدة البيفهموا فيها الايامات دي (النفرة).
كلمهم في (النفرة)..يقعدوا ليك في الواطة.
يضحكوا ليك من الاضان للاضان.
زي ايام عيد الضحية.
اي زول يلاقيك في الشارع بعرفك او ما بعرفك بقول ليك عليك الله (الخروف) دا لقيتو بي كم؟.
هسع ناس المريخ فهمهم كلو بقى (نفرات).
عملت كم؟.
وجابت شنو؟.
والديون.
والشيك.
وامر القبض.
دي ونستهم الايامات دي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن (النفرات) دي ما قاعدين نشتغل بيها.
قروشنا بنجيبها بي عرق جبينا.
بي حقنا.
ما عاوزين لينا (نفرة) من زول.
نحن عندنا (جوهرة).
الجوهرة دي (طوبة) من الحكومة ما فيها.
حصحاصة ما فيها.
الكاردينال مشى (الجوهرة) ..لقى ليك مدير الشركة الصيني ..قال ليه عاوز شنو؟.
الناقص شنو عندك؟.
المدير الصيني قال ليه عاوزين 15 طن اسمنت.
15 طن اسمنت بالصيني ..(شغولب تكولب تنولب).
وعاوزين سيخ.
عاوزين سيخ بالصيني ..(تكولم تحولم تسولم).
وعاوزين (شيبوب).
عاوزين شيبوب بالصيني (شيبوب بجيبها ليكم ضقلها يكركب).
دي بالصيني.
معليش – المريخاب ما بفهموا (الصيني) دي.
الجوهرة دي والله بعد (شيبوب) تتطقطق.
تولع عديل كدا.
الكورنر في الجوهرة مع السخانة دي معاهو (بطيخة).
القون بجيك طاير بي (الباشكير) حقو.
والجدعة بصرفوا ليك معاها (مناديل ورق).
لعب ما في تاني.
دي الجوهرة.
الكاردينال قال للصيني – السيخ عرفناهو.
الاسمنت عرفناهو.
شيبوب الدخلو في (الطابق الثالث) شنو؟.
المدير الصيني مفتح..قال ليه نسيت.
نسيت يا الكاردينال.
نسيت (شيبوب) دا قفز من الطابق الثالث في جوبا.
عشان كدا الزول دا وقت يرجع لازم يلقى (الطابق الثالث) جاهز.
الكاردينال قال ليه ان بقى كدا – ما في مشكلة.
ما عندك اي قضية.
لو عاوز (لبن الطير) نجيبو ليك.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في مريخابي تاني…النوع الما عاجبو اي شيء داك.
مريخابي قديم كدا.
من زمن عالم الرياضة.
زمن (العجلة) اعلى حاجة في المواصلات.
المريخابي دا قال لي والله من جبتوا (كشافاتكم) دي (الكهربة) بقت تقطع.
كشافاتكم دي عاوزة (كهربة) تقيلة.
الكهربة البتشحن لينا (الموبايل) بقت ما عندنا.
قلت ليه لو كشافاتنا عملت كدا – شيبوب يعمل شنو؟.
يمين بعد شيبوب ما يرجع (شمعة) ما تلموا فيها يا مريخاب.
اقنعوا عديل كدا.
وشوفوا ليكم (نفرة) تانية.
هسع عليكم الله خليتوا للخريف شنو؟.
اذا كان (النفرات) بتعملوا فيها قبل الخريف – وقت الامطار والسيول والفيضانات تجي بتعلموا شنو؟.
كملتوا قروش مؤسسات الدولة في نفرة الكورة.
نفرة الخريف – الناس ديل بتصرفوا كيف؟.
هسع عليكم الله (النفرة) محتاجها منو؟.
المريخ وإلّا الكهربة؟.
الكهربة دي عاوزة ليها (نفرة).
ونفرة مستعجلة كمان.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
شيبوب قالوا بيصل بكرة ان شاءالله.
شرف شيبوب.
طولت ما طليت – بعدين معاك لو جيت.
ح توقف الحركة.
جماعتنا ديل (نفرتهم) دي ما ح يطوقوا ليها اي طعم.
ح تبقى ليهم ملح – ملح.
شيبوب دا عمل اي شيء عشان ينتقل للهلال.
الزول دا بحب الهلال حب مبالغ فيه.
تلب من الطابق الرابع.
وعبر ليه (4) مطارات من غير جواز سفر.
واتصور مع محي الدين عبدالتام.
دا كلو عشان يجي الهلال.
مشى يلعب في جوبا.
وقت لقى الموضوع صعب…مرقها لي تونس.
في حب اكتر من كدا.
تاني ناس الهلال ديل يعملوا اكتر من كدا شنو؟.
الشغل دا شغل (مدرسة).
شغل (هندسة) عديل كدا.
ما بقع ليكم.
ولا بتفهموه لينا.
شيبوب دا قعد برة (6) شهور.
هاجر.
واتغرب المسكين.
كلو عشان شنو؟.
عشان يرجع يلعب في الهلال.
طلع من بيتو.
وخلو فريقو.
واتغرب في الدنيا دي.
عشان شنو؟.
عشان يلعب في الهلال.
في اعظم من كدا.
في احسن من كدا.
الزول دا ما تقصروا معاهو.
استقبلوه.
زول لعاب ..والكورة في رأسو.
وناس اتحاد الجزائر لغاية الآن قاعدين يتكلموا عن هدفو.
زول قلبها في الجزائر.
وقلبها في تونس.
وح يجي يقلبها ليكم هنا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
غايتو لو تسجيلات الهلال استمرت بالصورة دي..اتوقع بكرة تظهر (بوسترات) جديدة في المريخ.
يقولوا تاني عاوزين يعملوا ليهم (نفرة).
نفرة لي شيبوب.
شوفوا تعملوا 10 مليار.
تعملوا 11.
شيبوب تاني ما برجع ليكم.
انتوا ناس صادر عليكم (امر قبض)..شيبوب يرجع ليكم يعمل شنو؟.
خلوه يشوف مستقبلو.
ويصلح كورتو.
الدورة التانية ..الهلال في (الجوهرة) ح يكون شيء ما يخلص.
سادومبا وكاريكا بي جهة.
وثلعبونا وابوعاقلة في جهة.
بشه والشغيل.
وشيبوب ومعتز ابوروف.
غايتو يا ناس المريخ لو كنتوا بتفكروا صاح ..قروش النفرة دي كلها تعملوها في (حراس مرمى).
مع ناس شيبوب وسادومبا عاوزين ليكم (21) حارس مرمى.
حارس ..اتنين ..تلاتة ..خمسة ..ما بتمرقكم.
كتروا (الحراس) – الظروف ما معروفة.
ويا شيبوب طولت ما طليت ..بعدين معاك لو جيت.
اتخيلوا البحصل على ناس علي جعفر شنو؟.
ح تشوفوا افلام رعب جديدة في المريخ.
ح تبقى عليكم ميتة وخراب ديار.
مع فلسكم دا ح تشوفوا العجب.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
من هسع مباراة القمة القادمة عاوزين لينا حكام اجانب.
عشان تتمتعوا.
اقل حاجة بتنتهي سبعة.
تفتكروا شيبوب دا قاعد برة البلد (6) شهر عشان قون او اتنين.
سبعة.
ناس مهند الريدة ديل …الاربعة في المباراة عندهم بيسجلها لاعب واحد.
مهند الريدة وولاءالدين.
تاني شنو؟.
…………
و
نتمنى الليلة الهلال يحسم امر الوطنيين..عشان نتفرغ لي الوطني الكبير شيبوب.
وناس سادومبا.
ونشوف قرايتنا وين؟.
بس الكهارب القاطعة دي ما عارفين نتصرف معاها كيف؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
السيدة (ل) – في حاجة بتجي ربع ساعة وبتقطع 9 ساعات دي شنو؟.
وقرّط على كدا.