ختوا الكورة في الواطة

زمان نحن كان عندنا فريق كورة قدم – كنا شايفنو قوى شديد…ما بنسأل في (البارسا).
المباراة الما بكون فيها (كرت احمر) بكون فيها (كسر).
دي اقل حاجة.
الباك بدخل ليك المباراة شايل في جيبو فاتورة الموية.
كنا عنيفين جنس عنف في الكورة.
بنضرب من طرف.
المباراة الما بنشوف فيها (4) كروت حمر ..كان مجلس الادارة بخصم من حوافزنا.
بقولوا لينا نحن اهم شيء عندنا قلبكم يكون حار.
الباك عادي فينا تلقاهو دافن ليه (عكاز) في خط 18.
الحكم قبل ما يرفع الزمن البدل الضائع – الباك بكون طلع (عكازو) وقع ليك في (المهاجم) خبط.
والاستوبر سكينو في ضراعو.
المهاجم لو حاول يتشيطن عليه بطلع ليه (السكين).
كنا صعبين.
ما في لاعب فينا بقيف في الخط عشان يشرب ليه موية.
موية شنو كمان البنشربها في المباراة.
زمان كانت في موضة (فليق) حايمة في البلد – يعني عادي جدا (المهاجم) يطلع بعد المباراة (مفلوق).
رأسو بكون متل (الخريطة) من الفليق الكتير.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
كان عندنا عقدة من الفانلة رقم (10)..ما عارف الحسادة دي جايبنها من وين؟.
لكن اي لاعب كان بيلبس الفانلة رقم (10) بنقع ضرب فيه.
خبط خبط.
يمكن عندنا احساس ان صاحب الفانلة رقم (10) بكون دائما حريف ولاعب بتاع مهارات.
ونحن وقتها جننا وجن (المهارات).
المهارات كانت عندنا (مليس) ساكت ما بتنفع معانا ..ولا بنقبل بيها.
ويمكن عشان اللاعب الذي البكون لابس الفانلة رقم (10) مرات بكون فاكيها في نفسو شوية.
وشايف حالو.
تلقاه لابس ليه (شنكار)..زمن (الشنكارات) كانت ما موجودة.
برشلونة كان بتم شنكاراتها من (ملقا).
الشنكارات كمان ظهرت متين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اذكر الوقت داك ..كان عندنا مدرب وطني ..المباراة كلها بيكورك فينا (ختو الكورة واطة) ..ختوها واطة.
كورتنا كانت في السماء.
مدربنا كان اسمو (الطيب جلبة).
الطيب جلبة دا بعد كل مباراة بصحح لينا اخطاء المباراة السابقة – وبقولوا لينا كورتكم في المباراة الفاتت كانت في السماء.
ختوا لي الكورة في الواطة.
ختوا الكورة واطة واسألوني من النتيجة.
نقول ليه جدا.
اصلو ما في مشكلة.
اول (5) دقائق ..كورتنا بتكون في السماء.
الطيب جلبة بقيف ليك على الخط..يكورك المباراة كلها (ختوا الكورة في الواطة).
بين الشوطين الـ (15) دقيقة ما عندو حاجة غير (ختوا الكورة في الواطة).
الطيب جلبة دا عمل ليه (21) كورس ..كلها اظنها في (ختوا الكورة في الواطة).
عندنا (قلب دفاع)..لكن هو ما قلب دفاع – اسمو (حسن بلنجات) كان بقول للكوتش (الطيب جلبة) ..نحن لو ختينا الكورة في الواطة بننضرب عشرة.
عليك الله خلينا نلعب الكورة البنعرفها.
وكان عندنا باك اسمو (عمر فلنكة)..بقول ليه يا كوتش نحن لو بنختها في الواطة كان احترفنا برة البلد دي.
عليك الله خلينا على راحتنا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في احد المواسم (الصعيبة) علينا ..الهزائم كترت علينا.
كان في تقدم في الاعمار.
حارس المرمى اصغر واحد في الفريق كان عمرو 51 سنة.
الناس كبرت ..والهزائم كترت.
قمنا عملنا تمرد في الفريق – قلنا عاوزين لينا مدرب اجنبي..المدرب الوطني دا غير (ختوا الكورة في الواطة) ما عندو لينا شيء.
شيلوا لينا الطيب جلبة دا.
الزول دا من نحن في الروابط ما عندو لينا غير (ختوا الكورة في الواطة).
مجلس الادارة اول حاجة عنقد – لكن بعد ضغوط الاعلام والجماهير – اقتنعوا بالفكرة.
جابوا لينا مدرب روسي.
اتذكرو لغاية الآن – مدرب عيونو خضر – غير (الصلعة) عندو (61) شهادة في التدريب.
وحقق اكثر من (57) لقب.
مدرب كبير ما فيه اي كلمة.
المدرب الروسي دا اول ما جابوه لينا قال عاوز لي مدرب احمال.
جابوا ليه مدرب احمال.
قال عاوز ليه اختصاصي تغذية.
جابوا ليه اختصاصي التغذية.
مدرب حراس روسي.
جابوا ليه مدرب الحراس.
قال عاوز ليه مساعد انجليزي.
جابوا ليه مساعد انجليزي.
قال عاوز ليه مترجم.
جابوا ليه مترجم.
جنايني.
جابوا ليه الجنايني.
طباخ.
جابوا ليه الطباخ.
الزول دا اي حاجة قال عاوزها جابوها ليه ..صاحبكم ما فضل ليه إلّا يطالب بي (اعلام اجنبي).
ما عارف المشكلة وين؟.
المشكلة في اعلامنا دا.
المدرب الروسي دخل بالفريق معسكر مقفول (21) يوم.
بدأ معانا من (التثبيتة).
تعب معانا تعب شديد.
نحن كنا بنتمرن ونشرب في (العصائر) ..ونضرب في (الباسطة).
اول مباراة للمدرب الروسي وهو بقود الفريق كانت مع فريق (خشم البقرة).
فريق (خشم البقرة) دا ..كان اخطر فريق في الدوري وقتها.
يوم المباراة جابوا لينا (رز بي لبن)..قالوا لينا اوعكم من الفول والكوارع.
ضربنا ليكم الرز بي اللبن.
ما خلينا ليك فيه حاجة.
مشينا على المباراة.
نحن ساعة ونص بنسخن.
والمدرب الروسي بحاضر فينا بالروسي ..ما فاهمين اي حاجة.
غايتو وضع ليه خطة خطيرة شديد – ظاهر عليها من تعابير وشو.
الحكم صفر.
دخلنا الملعب.
الدقيقة الاولى كنا راكزين.
التانية (الرز البي اللبن) وقف لينا هنا.
الدقيقة التالتة (حسن بلنجات) طالب بالتغيير.
مباراة يطلب فيها (حسن بلنجات) الغيار ..دي بتبقى مباراة ما مباراة نصاح.
لمن وصلنا الدقيقة الخامسة ..كنا مغلوبين اربعة.
الدقيقة السادسة ..لقينا ليك مدربنا الروسي بكورك بالعربي حقنا دا (ختوا الكورة في الواطة).
ختوا الكورة في الواطة.
ختوا الكورة في الواطة.
كابتن الفريق مشى ليه في الخط ..وقال للمدرب الروسي والله لو عارفنك بتقول كلامك دا (دولار) ما كان بنصرفو فيك.
انت روسي مغشوش وإلّا شنو؟.
خسارة (الرز البي اللبن) الضربناهو معاك.
مجلس الادارة بعد (ختوا الكورة في الواطة)..اجتمع وقرر الاطاحة بالمدرب الاجنبي.
قالوا ان بقت على (ختوا الكورة واطة) ..مدربنا الوطني ممكن يقولها لينا.
الموضوع ما عاوز ليه (مدرب اجنبي).
وكمان روسي.
هسع دي عاوزة ليها (روسي).
جابوا لينا الطيب جلبة.
رجعنا ليك للفول والكوارع وختوا الكورة في الواطة البنعرفها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
و
ما عاوز اقول ليكم ختوا الكورة في الواطة.
لكن ناس لجنة الاستئنافات بكونوا بفتشوا ليهم في سبب يعيدوا بيه مباراة النسور.
خاصة بعد التمانية.
مباراة النسور قالوا ما قانونية.
يعني (الاعادة) وجبت.
………
السيدة (ل) – النجيلة الطبيعية في الافلام الهندية بقت مافي.
وقرّط على كدا.