برشلونة (MSN) الريال (BBC) الهلال (WWM)

المريض رفع رأسو مع وجعتو وقال للدكتور كيف ما تكون عندي (زايدة) ونحن نطلع من (زيادة) الغاز ندخل في (زيادة) الموية
نيمار دا ما عندو اي احترام لناس ارسنال ديل تقول لاعب ضد ناس موسى الزومة
الباكات مع الجماعة ديل ، إلّا يشوفوا ليهم (كورسات) في اللغة الاتجليزية ..عشان (WWM) لا بتفاهموا ولا بنكضب عليكم
مدثر كاريكا ابو السرعة ذاتها …(المدافع) بديه مهلة امامه (7) دقائق ..وبيرجع يتجاوزه ليك في (12) ثانية
• قبل ما اقول ليكم اي حاجة…(في تلفون بيضرب).
• قون (ميسي) الاول امس في الارسنال ..اعاد ليك حارس الارسنال الى (شيلسي).
• بيتر شيك طوالي يرجع يشوف (مدرستو) وين؟.
• الكلام دا ما بنفع.
• ولا بخارج معانا.
• بعد الهدف (المخرج) جاب ليك مجموعة من لاعبي الارسنال (مخلوعين) في الهدف ..اكتر من خلعتنا نحن القاعدين برة.
• روضاتي يا روضاتي ..روضاتي اصحي بدري …اشوف دروسي واجري.
• الناس ديل الكورة العندهم ..قعاد معانا ما تقعدهم.
• ميسي عمل اي حاجة.
• انتوا وقت بتتخلعوا لينا كدا يا ناس الارسنال – ناس علي جعفر ديل يعملوا شنو؟.
• خلعتكم شينة.
• الهدف كان تجسيد (للتفاهم) بين الثلاثي البرشلونابي (MSN) حيث بدأت الهجمة المرتدة من سواريز الذي نقل الكورة الى (نيمار) ليمررها الى (ميسي) ليفعل فيها ما يشاء.
• اي حاجة.
• يطلع ..يرجع تاني.
• يقيف في الباب.
• يقفل التلفون.
• حر..يعمل اي شيء.
• ميسي نزل قدام ..ورجع تاني بعد ان أخد معاهو (بيتر) ..رجعو ليك لي سنة تانية ابتدائي.
• شايل بستلتو وحايم بي الفطور.
• الهدف يجسد النظرية العملية للتفاهم (اس 77 جي بي) ..حيث لعب سواريز الكورة الى (نيمار) من غير ان يرفع رأسو – او يشوف الحاصل شنو؟.
• ولا كضب.
• يستلم (نيمار) الكورة ..ويقوم بيها جاري ..(نحن نفسنا برة اتقطع).
• نيمار دا ما عندو اي احترام لناس ارسنال ديل تقول لاعب ضد ناس موسى الزومة.
• واللـه ما عندهم اي فرق.
• نيمار اخد راحتو للاخر ..ثم عكس الكورة لميسي.
• ميسي طبعا عندما تصله كورة زي دي ما بيسألوه.
• ما في زول بقول ليه حاجة.
• قون ..قون.
• شوفوا ليكم حاجة تانية.
• يلا اتخارجوا يا شباب.
• اطلعوا لينا من المنطقة.
• الاجمل من ذلك ان ميسي رد الهدية الى نيمار ..الذي لم يحسن التعامل مع الكورة ..لتأتي الى ميسي مرة اخرى فيحولها هدية اخرى لسواريز.
• سواريز كورتو تضرب في القائم.
• علوم.
• فيزياء عديل.
• المجانين ديل درسوها وين؟.
• الشغل دا في الكتب ما في.
• دا شغل برة المقرر.
• الجماعة ديل اكتر من كدا يقولوا عليهم شنو؟.
• الكورة دي غايتو لو قالوا لينا عندكم (خياطة) ما بنقول حاجة.
• لو قالوا لينا عندكم (سواقة)..اصلو ما بنقول حاجة.
• بتعملوا اي شيء فيها.
• ميسي بعد (التلتة) دي ..رجع جاب ليه قون تاني من ضربة جزاء.
• بيتر مشى (البادية) …وميسي جدع الكورة في (الحضر).
• غايتو ..فهمنا كمل معاكم.
• وكهربتنا قطعت.
• كل زول بي فهمو…جدول تلاتة بالانجليزي بعمل معاك جدول خمسة.
• سبعة بالروسي تسعة.
• وشارع (القصر) في لندن (19) اتجاه.
• قالوا ليك موظف بيصرف (850) جنيه.
• بالفروقات والبدلات بتصل معاهو (1200) جنيه.
• عندو (7) اطفال وانبوبة الغاز حقتهم في البيت قاطعة ..وما سدد فاتورة الموية.
• يتصرف كيف؟.
• زمان كانوا بقولوا ليك واللـه إلّا تكون (حاوي) عشان تعيش بالمبلغ دا.
• هسع بقوا يقولوا ليك واللـه إلّا تكون (الشيخ موكورو) عشان تقفل شهرك من غير اي مشكلة.
• الاطفال بعيشوا.
• انبوبة الغاز ما مشكلة.
• لكن فاتورة الموية دي نتصرف معاها كيف؟.
• نعمل ليها شنو؟.
• قالوا ليك واحد تعبان شديد.
• حالتو تحنن.
• اهلو شالوه وجروا بيه على (المستشفي).
• الدكتور من عاين ليه كدا ..قال ليهم الزول دا عندو (زايدة)…حضروا لي غرفة العمليات.
• زايدة ملتهبة.
• زايدة صعبة ..ممكن تنفجر في اي لحظة.
• دا كلام الدكتور.
• المريض رفع رأسو مع وجعتو وقال للدكتور كيف ما تكون عندي (زايدة) ونحن نطلع من (زيادة) الغاز ندخل في (زيادة) الموية.
• وعاوزين بعد دا كلو ما تجيني (زايدة).
• انتوا بتلعبوا واللـه.
• الثلاثي الهجومي لريال مدريد الإسباني الناري يطلق عليه لقب الـBBC، والمتمثل في القوة البرتغالية كريستيانو رونالدو والويلزي (بتاع الجري) غاريث بيل (بكري مدينة ريال مدريد) والفرنسي كريم بنزيمة.
• الثلاثي الهجومي لبرشلونة الذي يطلق عليه لقب الـ MSN ، والمتمثل في الأرجنتيني ليونيل ميسي (بتاع كلو) والأوروغوياني القوة الضاربة لويس سواريز والبرازيلي الفنان نيمار.
• نحن برضو عندنا ثلاثي ناري.
• ثلاثي الهلال.
• ثلاثي لو كان في تشكيلة واحدة بيعمل نفس العمائل.
• ثلاثي الهلال وليد الشعلة وولاءالدين ومدثر كاريكا الذي نطلق عليه بي نفس الفهم (WWM).
• وما فيش حد احسن من حد.
• يعني بقت على الحروف.
• نتمنى ان يجد هذا الثلاثي فرصته في المشاركة في وقت واحد.
• الهلال اصلو ما مفروض يلعب بمهاجم واحد حتى لو كان بيلعب امام ريال مدريد.
• عاوزين نستمتع بالكورة ونشوف (الاهداف) والدوشة والثكليبة البتحصل للباكات اذا شاركوا هذا الثلاثي في تشكيلة واحدة.
• مدثر كاريكا ابو السرعة ذاتها …(المدافع) بديه مهلة امامه (7) دقائق ..وبيرجع يتجاوزه ليك في (3) ثواني.
• ولاءالدين لاعب حريف ..وذكي وعارف بعمل في شنو؟.
• ولاءالدين بتميز في الالعاب الهوائية …والكور الساقطة قدام خط 18.
• الكور الزي دي ولاءالدين بيعالجها طوالي في القون.
• ان شاءاللـه نشوف الليلة تجسيد للعملية دي امام مريخ كوستي.
• اما وليد الشعلة فهو اخطر زول يلعب ليك كورة في المرمي وهو في وضع متحرك.
• ارمي ليك كورة قدام وليد الشعلة وخلوه يأخد خطوة ..خطوتين ويعالجها في المرمي.
• قون طوالي ما في ذلك شك.
• ولا بتلفت.
• ولا بلعب في الحاجات دي.
• الثلاثي الهلالي كل واحد فيهم بتميز بخصائص تختلف عن الاخر ..مثل الاختلافات التى هي في ثلاثي برشلونة.
• عليكم اللـه هسع ثلاثي برشلونة دي ..لو مسك (البيت الابيض) ما بحل مشاكل العالم دا كلو.
• من غير اي طلقة.
• من غير رصاص.
• ثلاثي الهلال اذا توفر له الانسجام والتفاهم والمشاركة المستمرة ممكن يشكل خطورة كبيرة على دفاع اي فريق يواجه الهلال.
• خاصة في المباريات العصرية.
• بجدعوا ليك الحارس دي بعيد.
• والباكات مع الجماعة ديل ، إلّا يشوفوا ليهم (كورسات) في اللغة الاتجليزية ..عشان (WWM) لا بتفاهموا ولا بنكضب عليكم.
• الليلة ان شاءاللـه ح نشوف عرض سينمائي من الهلال في كوستي.
• طارق العشري قاعد ليه اسبوع بطبق في النظريات.
• العشري قفل التمارين.
• وبقى شغال تمارين مرتين في اليوم.
• صباح وعصر.
• عشان كدا ..النظرية الليلة ح يطبقوها ناس الهلال في مريخ كوستي.
• المباراة عصرا.
• والملعب جيد.
• وجمهور كوستي اكثر من رائع.
• ومريخ كوستي بيلعب كورتو.
• نحن موعودين ان شاءاللـه مع (المتعة).
• الفرحة حقتنا.
• والكورة كورتنا.
• نتلاقى بكرة ان شاءاللـه في نفس المساحة.
• عشان نشوف (العلوم) دي وصلت وين؟.
• ………….
• ملحوظة : ترقبوا الـ (WWM).
• هوامش
•
• ان شاءاللـه قناة النيلين ما تقعد تقسم لينا الصورة.
• او تشيل الصوت.
• مباريات الهلال دا نحن ما بنستحمل فيها اي حاجة.
• حولنا ليكم (الطبق)…تاني في شنو كمان؟.
• مباراة المريخ امام الخرطوم الوطني ح يتم تأجيلها.
• او يقوموا يحولوها ليهم للاسبوع الـ 21.
• ناس المريخ ما بيلعبوا في الوقت دا امام الخرطوم الوطني.
• فريقهم قاعد ساكت.
• وشغال بالكمامات.
• الخرطوم الوطني امس فقدت نقطتين.
• وهلال الابيض خسر في عطبرة.
• والاهلي شندي خسر في كوستي.
• والمريخ لمن يدخل المباريات (الحقيقية) سوف يخسر الكثير.
• والحكاية ح تبقى على الهلال وحده.
• خالد النعسان..بقى مشكلة جاهزة في المريخ.
• معقولة الزول دا يخسر المريخ (6) نقاط.
• بكري المدينة ..مباراة يشارك ..ومباراة مصاب.
• وتراوري لاقي ليك الحكام ديل ..قال يبقى الهداف.
• حكامك ديل لو لقاهم موسى الزومة ببقى الهداف.
• ولا عاوزة ليها تعب.
• الارسنال وبرشلونة امس كانت روعة.
• متل كورة الهلال اليوم ان شاءاللـه.
• اها يا بشاشة ..عليك اللـه المباراة دي ما يستاهلوا ينتظروها.
• العشري في الظهور الاول.
• ترقبوا (السجدة).
• …………
• عاجل : ان شاءاللـه ..ربنا يحفظ لينا (شبكة) الهلال …وربنا يوفق (مكسيم) ويحميه.