خالد عز الدين : النحل يفاجئ الهلال ومزمل يفاجئ مزمل!

حدثان لم اعرف معهما هل اضحك ام ابكي ! الاول هو مفاجأة النحل للاعبي الهلال في ملعب كادوقلي !

ففي افتتاح الدوري الممتاز وفي مباراة تعتبر احتفالية لمدينة كادوقلي لم يكلف اتحاد المدينة نفسه بمراجعة ملعبه لمعرفة ان كان النحل يسمح له بالدخول ام لا !

كنا نعتقد ان (كسل) اتحاد كادوقلي وهلال المدينة يتوقف عند حد عدم (القدرة) علي مناهضة قرار لجنة الاستئنافات التي اخذت من النادي نقطة دون وجه حق بعد ان تعادل مع المريخ واعتبرت النادي مهزوما لاشراكه لاعبا مر علي خطأ تسجيله اكثر من عام ! هلال كادوقلي كان هادئيا بصورة اكبر من هدوء النحل قبل بداية عملية الاحماء للهلال الكبير ! ولكن نحل كادوقلي كان اكثر شراسة من اتحاد المدينة وهلالها بعد ان شعر بان هناك من يريد الاقتراب من مملكته فدافع عن نفسه بينما اكتفي هلال كادوقلي بدفاع اتحاد الكرة عنه بعد ان كاد يسقط من الدوري الممتاز !

النحل بشر الهلال بموسم عسل بدأ بلدغات من بورتسودان ! اتوقع ان يبدأ الهلال رحلة العسل من مباراة اليوم وان ينتصر ويتصدر كالعادة ولكننا نخاف ان يتقدم الهلال علي المريخ بخمسة نقاط لنحتكم الي لجنة الاستئنافات ! بالمناسبة الموسم بدأ بدون لجنة انضباط او استئناف ليكون اتحاد معتصم جعفر الوحيد في العالم الذي يمارس نشاط دوري بدون لجان عدلية .. وللمعلومة فقط بان اتحاد معتصم بدون ميزانية مراجعة لموسمين 2014 و2015 ونحن في موسم 2016 ورغم ذلك يحدثوننا عن ديون اسامة عطا المنان ووكالته !

يلا الحساب ملحوق عايزين نلحق نشوف مباراة اليوم .. تشوفا وين يا خالد عزالدين .. النيلين غير قادرة علي نقل المباراة ! ليييه ؟ مش قالوا عندهم عربية تلفزة من عربسات .. دولارات زي دولارات الاتحاد جات من عربسات ! ما يكون عندك (تاكس) برضو يا جابر الزين !

الغريبة معتصم جعفر لسه بتكلم عن (بي ان سبورت) رغم ان النيلين لها عقد مع اتحاد الكرة والمالية بتدفع المليارات لنقل الدوري وعربسات سات بتدفع لحصرية النقل برضو ! انتو ما بتحترموا العقود لييه يا دكتور !

قلنا النحل بكانا عشان (عض) كم شخص برئ ما عندو ذنب سوي انو جا لاستاد مهجور عشان يشاهد افتتاح بطولة ! وضحكنا عشان ناس كادوقلي ما عارفين انو عندهم نحل قدر ده وما قادرين يستفيدوا منو في التشجيع ! واحد ثقيل قال في مادة في القواعد العامة بتقول (في حال عدم قيام اي مباراة في ملعب كادوقلي بسبب النحل .. يتم تحويل نقاط المباراة للمريخ .. ههههه اصلا المريخ متعود علي نقاط كادوقلي بدون لعب او بدون فوز .!! مرة لجنة الاستئنافات حولت النقاط بسبب مشاركة جنوبي مع فريق سوداني ومرة حولت المباراة زاتا لكوستي بسبب سماع طلقات في كادوقلي .. طيب النحل ده صوت وصورة عديل .. ما تحولونا يا طارق عطا !

لكن كافالي وغير من طريقة مباراة قورماهيا .. قرر يلعب بمهاجمين .. وابعد ايشيا واشرك الجزولي .. وقرر يشرك ابو عاقلة في الوسط وابعد نيلسون .. واشرك مساوي وابعد ابيكو للطرف الايمن .. تبديلات بالجملة ان شاء الله يكون معاك حق يا خواجه .. بس خلي بالك في نحل برضو مترصدك .. ما تغير كتير عشان النحل ما يلقي فيك فرصة اثناء التغييير !

نجي للموقف البضحك وببكي التاني ! مزمل قال في مفاجأة .. المريخ عندو عقد مع شيبوب !!! يا اخوانا نبكي ولا نضحك .. مفاجأة في شنو ؟ مش انت من يوم فشل عملية الذراع الطويلة وحتي امس بتكتب انو شيبوب لاعب متعاقد ومحترف طالما انو المريخ بدي مرتب شهري وبشربوا بيبسي بعد التمرين وبعالجوا في الامارات وبرسلوا بتذكرة من وكالة دانا ! ما عارف لييه مزمل مصر يؤكد بانو التذكره ما من تاكس .. يعني عايز يورينا القصة (احتراف) لدرجة انو قيمة التذكرة معروفة ومن وكالة ما عندها علاقة باتحاد الكرة !

مزمل يفاجئ مزمل ! في عقد لشيبوب ! طيب الكنت بتكتب عنو كل يوم ده شنو ؟ مش برضو عقد !

تصدق عقدك الخيالي احسن من العقد النشرتو في الصدي !! والله عقد يضحك .. مقدم عقد 50 الف .. وشيبوب قال مليم احمر ما شافا .. والعقد كان رايح ! وطالما انو عندو عقد بتفاوضوا فيهو الوقت ده كلو لي شنو ! عايزين تعملوا لي عقد فوق للعقد ! وشايف في فقرة غريبة بتقول العقد ده مكمل لعقد الاتحاد !

شايفك بتعترف بانو المريخ بعمل عقودات داخلية عشان يهرب من حقوق اللاعبين ! يعني شيبوب ده ممكن يعتمد علي كلامك ويقول ما احترمت العقد عشان المريخ عايز يهرب من حقوقنا لما ينهي العقد معانا ! وين الاخلاق الرياضية ! سرقها الطرف التالت ولا شنو !!!

والله المساحة ضيقة ما بتكفينا للضحك علي العقد ده ! لكن شايفك قلت ما عندو قيمة في السودان ورغم ذلك طالبت الاتحاد بعدم ارسال بطاقة اللاعب بناء علي العقد !!!

قوووول في عقد رسمي وشيبوب عايز يفسخوا .. برضو الاتحاد ملزم بانو يرسل الشهادة وانت تمشي تشتكي الفيفا لو عايز .. وتاني بقول ليك .. الاتحاد ما حول القضية للفيفا رفض الشكوي بشكل (ثقيل) قال ليكم انا ما جهة اختصاص هههه عدم الاختصاص وراك وراك !

قبل ما نمشي البوليس .. ورينا العقد الانت محترف بيهو ياتو .. المكتوب الظهر فجأة ده ولا بتاع الغداء والعشاء والعلاج في الامارات عشان نقدر نناقشك فيهو.. ماشاء الله شيبوب فجأة بقي عندو عقدين غير عقد شبيبة القيروان .. شايفك استعنت بالاخ مدثر خيري لكن ما كتبت اسمو .. يكون في عقد سري بيناتكم !!هههه افتكر نقيف هنا .. خلي البوليس للجماعة !!