مصرع مواطن وإصابة (2) أجانب إثر حادث مروري

الشارع نفسه وبمساره الواحد الحالي ده يعتبر اكبر جريمة في حق المواطنين
ياكان يعملوهو مسارين او مايعملوهو احسن
على الاقل زمان ماكان في الموت البجملة ده رغم وعورة الطريق واستهلاك العربات
ده طريق بائس وخطير جدا والقيادة فيهو كلها مخاطرة وضرب من الجنون
بعدين الناس في الطرق دي بتتخطى حسب فهمها وتقديرها
والله في ناس سايقين عربات وبيهدروا اوراح الابرياء
الكاروو ابو حمار ده مامؤهلين انهم يسوقوهو
سيبك من عربية بتمشي بالسرعة المهولة دي وتهلك ارواح ناس ابرياء
هسه ناس الاكسنت ديل ذنبهم شنو يموتوا بلاش كده ؟
بس عشان سايق الكليك زول جاهل ومغفل ومابيعرف يقدر المسافة البتمرقوا من العربات الجاية من الجهة المقابلة
عشان سوء تقدير الزول ده و مخه الزنخ يموتوا الناس كده بلاش ؟ والمسؤل منو ؟
السائق الاروش ده ولا الحكومة العملت الطريق المقصلة ده
لازم يتعمل مسارين لهذه الطرق الاربعة وعاجلا والا احسن يوقفوا الحركة فيها
او يخلوها لاتجاه واحد فقط رايح او جاي
والاتجاه التاني العربات الفيهو تنزل التراب او يعملوا ليهم ردمية مؤقته لحدي ماالشارع يتسفلت
طرق الموت الزؤام اربعة

1/ طريق التحدي
2/ طريق الخرطوم مدني
3/ طريق شريان الشمال
4 / طريق الخرطوم كوستي الابيض

ياناس الحكومة حرام عليكم الناس البتموت كل يوم بلاش دي
حرام وانتم تنهبون مال الشعب وتسرقونه كل يوم بمايعادل مايسفلت واطة السودان دي كلها مش شويرع ظلط
عليكم الله المابيقدركم تعملوا مسار تاني للطرق دي شنو ؟؟
خافوا الله في المواطن البموت بلاش ده كل يوم ده
لان ماحصدته هذه الطرق الاربعة يعادل الناس الماتت في الحروب العبثية بتاعة البلد الهامل الاسمو السودان