الجمعية العمومية الليلة لو ما لقت ليها موضوع بتمنح المريخ كاس الكونفدرالية

الازمة الرياضية الاخيرة كشفت لنا حقيقة الاشياء في السودان – الكثير من (القبب) بنعتقد تحتها (فكي) …وهي تحتها (دبابة)
كل القرارات تكتسب (قانونيته) من الواقع ووضع اليد وليس من المواد واللوائح المنظمة
الجمعية العمومية حسابيا بتتكون من عدد من الاشخاص لكنها في الحقيقة هي تتكون من اسامة عطا المنان واسامة عطا المنان واسامة عطا المنان
قرارات الجمعية العمومية لاتحاد كورة القدم السوداني يمكن الليلة ان تجدوها في صحف اليوم قبل صدورها من الجمعية العمومية
//////////////////////////////////////////
كل قرارات الجمعيات العمومية واللجان المكونة للنظر في (قضية) في الغالب تصدر قبل الانعقاد.
تصدر في (الغرف المغلقة) …من ثم تعرض على اشعة الشمس من اجل عدسات التصوير وفلاشات الاضواء.
ما تسمعوا لي التنظير دا – وما تشوفوا لي (البدل) الكتيرة دي.
البدل دي كلها (صور) ساكت.
كرفتات ما اكتر.
الناس ديل ما عندهم اي وزن – في ناس مهمتهم في الدنيا دي بس يبصموا على قرارات الجهات العليا.
يشوفوا الناس الفوق عاوزين شنو ؟..ويقوموا ينفذوا ليهم رغباتهم.
هذه الاشياء لا تحدث في كورة القدم فقط – بل في كل الاشياء في السودان.
من المرحلة التمهيدية لي سد مروي.
نحن نضع (القرار) اولا ثم نبحث عن (قانون) له بعد ذلك.
كل القرارات تكتسب (قانونيته) من الواقع و بعد وضع اليد وليس من المواد واللوائح المنظمة.
المواد واللائحة ..دي حاجات ساكت بتسمعوا بيها في الاذاعات وبتقرأوها في الجرايد.
في الواقع نحن ما عندنا حاجات زي دا.
ما تغشوا الناس ساكت.
تعالوا نعترف بهذا القصير – عشان الاجيال القادمة على الاقل تطلع من الحفرة دي.
ما نقعد كل مرة نعيد في (الازمة).
ما نكرر مشاكلنا في كل موسم – ومع كل جيل.
تعالوا نعترف ان التربية (القانونية) للناس في السودان تربية ما صحيحة.
وان الاجيال الحالية عندها مشاكل في (التطبيق) وعندها مشاكل في قبول القانون.
الوضع الحالي – قنعنا من خيرا فيه.
خلوا الاجيال القادمة تقوم على اسس صحيحة بدل (شوربة) القوانين الشغالين لينا بيها ناس مجدي شمس الدين ديل.
انفطوا ايديكم من (الخمج) دا.
ما عشان الهلال – ولا عشان الكورة السودانية – عشان الاجيال القادمة.
نحن بنرتكب في (اثم) كبير – بتلك التجاوزات والخمج الممارس في كورتنا.
وفي حقيقة الامر الخمج ليس في الكورة فقط – الخمج في اي شيء.
ما نقعد نغش نفسنا ساكت.
عشان كدا بنشوف خمجنا الحالي ..خمج اسامة ومجدي ما فيه مشكلة – طالما يوجد (الخمج) على اعلى المستويات.
اكيد اي واحد فيكم ح يقول يعني بقت على مجدي واسامة ومعتصم جعفر.
المشكلة اكبر من كدا.
انتوا ما قاعدين تسمعوا بـ (الباب يفوت جمل).
تفتكروا الكلام دا طالع من فراغ.
طالع من حالة (قرف) مستعصية.
او مستفحلة.
الازمة الرياضية الاخيرة كشفت لنا حقيقة الاشياء في السودان – الكثير من (القبب) بنعتقد تحتها (فكي) …وهي تحتها (دبابة).
او مدفع.
او (سكين) على اضعف الفروض.
ما عاوز اقول ليكم تحتها (مفراكة)..لأنني اشعر ان الكثير من الاشياء في البلد دي ماشه بـ (المفراكة).
شغل (فرك) ساكت.
القرارات تطبخ قبل ايام من صدروها – ويراعي مصالح البعض وتوضع موازنات عامة كدا ثم يصدر القرار.
القرار بشوفوه بعجب منو؟..وبزعل منو؟..وبعدين بطلعوه.
قرار بزعل زول اصلو ما عاوزنو.
يعني قرارات الجمعية العمومية لاتحاد كورة القدم السوداني يمكن الليلة ان تجدوها في صحف اليوم قبل صدورها من الجمعية العمومية.
يمكن.. لأن خيارات الجمعية محدودة – ونظرتها محدودة وهي آتت او انعقدت من اجل هدف واحد.
دي (تمثيلية) ساكت.
صورة بس.
ديل اتجاه واحد.
واخطر من كدا ديل شغالين بـ (الريموت كنترول).
الجمعية العمومية تتكون من عدد الاتحادات واللجان لكنها في النهاية كلها تبصم على الشيء الذي يريده لها اسامة عطا المنان.
خسارة موية صحة ساكت.
جماعتكم ديل (موية الصحة) كتيرة عليهم.
ما تحرقوا دمكم ساكت.
الجمعية العمومية حسابيا بتتكون من عدد من الاشخاص لكنها في الحقيقة هي تتكون من اسامة عطا المنان واسامة عطا المنان واسامة عطا المنان واسامة عطا المنان.
او هي تتكون من (اسامة عطا المنان) مرفوع للقوة 42 ..اذا كانت تتكون من 42 عضوا.
الاتحاد العام عمل (ورشته) وحدد قراره قبل ايام وهو يبحث عن الصورة التى يخرج بها القرار والتى يكسب بها قراراته الجاحفة الشرعية القانونية.
لذلك تبقى مثل هذه الجمعيات هي وسيلة للتحايل على (القانون) – رغم من الشعارات التى ترفع في مثل هذا اليوم.
عادة نحن في الغالب نسمع الكثير عن اهلية الحركة الرياضية.
ولا اهلية.
ولا يحزنون.
كلام ساكت.
الجمعية العمومية ربما تجتمع اليوم من اجل ان تبصم على قرار صدر من السلطات العليا.
وهذا امر لا يستبعد – خاصة ان اغلب الاطراف اكدت ان الجميع وصلوا لحل.
وان الجمعية العمومية سوف ترضي الجميع.
اعضاء الجمعية العمومية اغلبهم اعضاء في البرلمان او في المجالس التشريعية للولايات ..وذلك يعني ان كلمة رئيس البرلمان السوداني مسموعة.
يؤكد ذلك ان رئيس البرلمان ابراهيم أحمد عمر كان قد اجتمع باطراف الازمة كلها الاتحاد والهلال والمريخ والامل والمفوضية ومحمد الشيخ مدني.
بل ان اطراف الازمة اجتمعت في منزل مجدي شمس الدين _ـ وهذا يعني ان الاطراف وصلت الى (حل).
وان الجمعية العمومية فقط من اجل اخراج هذا (الحل).
الذي يهمنا الآن هو ان لا يتم نقل الازمة الى الموسم القادم – لأن الهلال هدد بصريح العبارة انه لن يشارك في الموسم القادم اذا لم ترد حقوقه.
الجمعية العمومية اذا حاولت ان (التحايل) على الاشياء وعدم حسم الملف بصورة قاطعة يبقى علينا ان نعلن منذ الآن ان ازمات الموسم القادم سوف تكون اكبر.
كذلك نتمنى ألّا يتم الاعلان عن جمعية عمومية اخرى لمناقشة قضايا اخرى بعد الفشل في وضع (حل) في هذه الجمعية.
الكورة السودانية الآن في مفترق طرق – عدم التعامل مع القضايا بمسؤولية او تحورها في النطاق الشخصي سوف يقود البلاد الى ازمة حارقة.
الازمة لن تكون في المحيط الرياضي فقط.
الازمة سوف تستفحل وتعم كل القطاعات ..واذا تعطلت كورة القدم في البلد دي سوف تتعطل الكثير من الاشياء.
لذا لا بد من ان تحسم تلك القضايا العالقة وان تسترد الاندية التى ظلمت حقوقها.
تنفيذ القانون واعادة (الحق) لن يحدث ازمة ..الازمات والاشكاليات تخرج عند مخالفة اللوائح.
ازمة الكورة السودانية سببها الرئيس في مخالفة لجنة الاستئنافات للقواعد والقوانين.
العودة للقوانين وان اغضب البعض – إلّا انه لن يخلق الكوارث.
ليس هناك كارثة ولا ازمة في تطبيق القوانين.
طبقوا القوانين وسوف تجدوا ان الجميع يحترمكم.
لا تتركوا الامور معلقة على هذا النحو.
اما الهلال فهو لا خوف عليه ..لقد وضع الهلال قدمه في الطريق الصحيح وهذا درب اختار ان يمشي فيه الهلال من اجل المواقف والمباديء وعدالة المنافسة.
وقد دفع الهلال الثمن غاليا ..ولن يقبل الهلال ان يدفع المزيد.
حقيقة الاشياء تؤكد ان الهلال هو الفريق الوحيد الذي يعمل وينشط ويبني.
فريق الهلال هو الفريق الوحيد الذي يصرف ويدفع.
حرام بعد كل هذه الجهود ان يظلم الهلال.
البناء شغال في الجوهرة الزرقاء.
والاضافات قوية في كشف الفريق.
ليس على مستوى الفريق الاول فقط – بل حتى بالنسبة لفريق الشباب.
اين الاندية الاخري بما في ذلك نادي المريخ.
لا شيء غير الهلال.
اذا تعطل الهلال تعطلت كورة القدم كلها في السودان.
اكتفى المريخ بـ (خالد النعسان) – بينما ينتظر جمهور الهلال التعاقد مع مهاجم اجنبي ربما يصل سعره الى مليون دولار.
اذن هناك اجتهاد وعمل.
امس لاح في صدر الاخبار نية الهلال ورغبته في التعاقد مع المدرب المصري حسن شحاتة.
هذه الاشياء كلها تصب في مصلحة الكورة السودانية.
بل هي تصب في مصلحة البلد كلها – فلماذا يحارب الهلال.
بل دعونا نقول لماذا يحارب الوطن.
…….
ملحوظة : الليلة يا يوم اسود يا يوم ابيض في تاريخ الكورة السودانية.
هوامش
نتمنى ان يكون قرار الجمعية العمومية في اتجاه القانون.
اي شيء غير ذلك – سوف ندخل في ازمة اخرى.
الهلال اذا ظلم مرة اخرى فان تجميد نشاطه الرياضي امر لا بد منه.
خلوها الكورة لو بقت بالطريقة دي.
ما في داعي ليها.
ولا في لازم.
خلونا نتابع الدوريات الاوربية بدل حريقة الدم دا.
الموسم الحالي كان موسم كله (ازمات).
والسبب في ذلك اتحاد الكورة.
الاتحاد قاد الكورة السودانية الى (الوحل).
وهو الذي يفترض ان يخرجها من هذا الوحل.
اتحرروا من قبضة اسامة.
اعملوا ليكم قرار يصب في مصلحة الكورة.
اي عضو لازم يكون عندو ضمير.
عندو كلمة وقرار.
ما يسوقكم ساكت.
الكورة في ملعبكم.
نشوف البحصل شنو؟.
الشيء الذي نؤكد ..ونثق فيه انه لا خوف على الهلال.
اذا كنت في الموقف الصحيح – ما تخاف من حاجة.
لا بد من (الصبح).
صبحت.
بالمناسبة انا خايف الجمعية العمومية الليلة لو ما لقت ليها موضوع تقوم تتلفت وتقرر ان تمنح المريخ كاس الكونفدرالية.
الجماعة ديل يمكن يطلعوا النجم.
ويطلعوا اورلاندو.
ويمنحوا المريخ اللقب.
الحاجة دي عملوها قبل كدا من الهلال.
ما غريبة عليهم.
…………
عاجل : الكورة في ملعبكم ما ترجعوها تاني في البرلمان.