ابن حلال يفتح الباب

> الأيام دي أيام خصبة جداً للإشاعات
> تنمو فيها الإشاعة بسرعة الصاروخ
> بل ويبني الكثير منا أفكارة على تلك الإشاعات
> كل زول يكوِّن رأي
> ويتمسك بذلك الرأي
> ويعتقد فيه
> تاني مابغيرو حتي ولو عرف إنو ما استند عليه في تكوين الرأي ليس إلا إشاعة
> ناس يقولوا ليك غرزة قال جايب فلان وعلان
> ومتمسك بيهم شديد
> ناس تانين يبحثوا ليك عن سيرة فلان وعلان ديل
> وهاك يا نتف
> وهاك يا راي
> ويكون غرزة ذاتو ما سمع بي فلان وعلان ديل
> ناس تانين يجوك بي إشاعة جديدة
> غرزة قال لي اوكرا يا انا يا انت في المريخ ده
> يطلعوا عليك ناس تالتين بحبوا اوركا شديد
> يطلعوا ليك بكراهية لغرزة لدرجة التحريم
> لا لشيء، سوى أن غرزة قال لي اوكرا يا انت يا انا
> وبعد يطلع الكلام إشاعة
> ما بغيروا رأيهم
> بتكون كراهية غرزة عندهم نمت وكبرت وتأصلت
> ده كلو كوم
> الناس البحبو غرزة
> قولت غرزة هدد أوكرا
> يكرهوا ليك غانا ذاتها
> يا ناس
> نحنا في وكت حرج جداً
> لايتحمل مع وضد
> فقط مع المريخ
> والانطباعية ممكن تهدر لينا موسم لسه ما بدأ
> والإشاعات ممكن يكون مصدرها عدو
> غالباً ما بكون حبيب
> يا عدو
> يا حبيب صاحب أجندة
> والحبيب صاحب الأجندة أخير منو العدو العديل ده
> أيها الناس
> غرزة يفترض إنو مدرب كبير وخبير وبعرف الفريق محتاج لي منو ولي شنو
> يفترض فيه ذلك
> ويفترض فيه ايضاً إنو النجاحات بتاعت الفريق بتنسب ليهو في المقام الاول
> وبتعلي سعرو
> يبقى قصة يبيع كورة ويفقد لقب دي ما منطقية
> فيها زيادة محلبية شوية
> أيها الناس
> نحنا على المدرجات ما بنعرف الحاصل للاعبين شنو
> نشوف فلان لعااااااااب
> ويكون فلان ده ما بقوم بالمطلوب منو حسب توجيهات الجهاز الفني
> ونشوف فلان زي الحصان
> ويكون فلان ده أقل الناس لياقة
> ونطالب بعلان أساسي
> وعلان ده يكون بزوغ من التمارين وبساهر وغير منضبط
> يبقى حقو ما نفتي ولا نكون رأي في زول ما لم نلم بكل تفاصيلو
> أوكرا لعاب ما فيها نقاش
> حريف ما فيها نقاش
> ولكن أسألوا عادل أبو جريشة عن لياقة أوكرا قبل أربعة أيام من مقابلة مازيمبي
> اذا سمعتوا الإجابة من عادل
> بتعرفوا ليه غرزة استبعدوا من التشكيلة
> أيها الناس
> نحنا في مرحلة حرجة
> حقو نهيئ الجو للناس عشان تعمل
> للمجلس عشان يعرف يخرجنا من عنق الزجاجة دي
> للجهاز الفني عشان يعرف يكمل النواقص ويفاضل بين المتاحين
> ومجلس ونسي مجلس يفتح أحضانه لمن يريد أن يقدم للمريخ
> عندك رأي هات
> عندك قروش جيبها
> عندك فكرة أشرحها
> لا لإقصاء أي فرد
> لا لإنكار أي جهد قدم
> لا للكيمان وتبع المان وعنصرية الألمان
> أيها الناس
> إن كان غرزة يرى إبعاد أيمن لكبر السن
> يبقى ما ممكن غرزة نفسو يرشح موبوتو للمريخ
> إلا اذا كانت السنة في مصر بي سنتين في الكنغو
> أيها الناس
> نحتاج أجانب
> ومع إشكالية التجنيس
> بتبقى فرصة الأجانب ضيقة جداً
> لازم زول يصنع الفارق
> لأننا بنحتاج لخانة ليهو من خانات أجانبنا القاعدين
> وأجانبنا القاعدين هم كوفي واوكرا وديدي
> اذا كان كوفي خط أحمر
> واوكرا له أنصار ومريدين بالكوم
> وديديه بدا في تثبيت أقدامو
> يبقى اي بديل ليهم مفروض يكون خارق
> وإلا سيصاب بلعنة الجماهير عليه
> الحتة دي دايره تروي شديد
> تروي دي قريبة لي تراوري موش!!!!
> المهم
> ياخد مجراهو عشان نقفل الباب ده
> ياخد مجراهو عشان الناس تحترمو
> ياخد مجراهو عشان نقفل باب التفلتات والعنتريات
> ياخد مجراهو عشان نحنا دولة محترمة
> دولة قوانين
> لازم ياخد مجراهو
> ياخد مجراهو عشان الزول يملي الكسكتة موية ويشرب ما يروي
> ياخد مجراهو عشان شخصية البراس نادي في البلد دي تتحدد من بدري
> عشان الخطوط العريضة للشخصية الرئاسية تترسم
> عشان يسود الاحترام والوئام الوسط الرياضي
> عشان نتفرغ لتطوير المستوى وتعظيم المحتوى
> لازم ياخد مجراهو
> أيها الناس
> كان لازم يعني غرزة يركب عربية في الكنغو قدام الناس ويمشي لي كاتومبي؟؟؟
> موش كان كاتومبي ممكن يرسل ليهو الشيك مع اي شماسي كنغولي ولا حدي شاف ولا حدي دري ؟؟؟
> حبكة القصة ما كانت دقيقة
> وحكاية غرزة صفق بعد الكورة لي جمهور الكنغو دي
> حقو نقارنها بي ميشو الصفق لينا بعد كورة يوغندنا معانا
> فهل يا ترى ميشو كان قابض مننا في عوضية للاسماك قبل الكورة ؟؟؟؟
> احذروا الاشاعات والشائعات عشان ما تكونوا رأي ساذج
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> في ناس محتاجة للادوية المنقذة للحياة بينا
> أدوية معدومة وغالية يا والينا
> ولان الخير لسه فينا
> شباب قرروا يمدوا الايادي لي اهالينا
> قرروا يوفروا تلك الادوية لينا
> من خلال منظمة صدقات يا والينا
> مبادرة بنك الدواء الخيرية تصدت للموضوع ده تصدت لينا
> وفروا قدر ما قدرو يا والينا
> لحظة كتابة هذه الاسطر بكون ماتوا ستة يا والينا
> ولحظة قراءة هذه الاسطر بكون ستة تاني فارقوا الفانية الحنينة
> واسي برضك ماتوا ستة يا والينا
> والشعار المرفوع لينا
> ابن حلال يفتح الباب لينا
> فهل تكون اول من يفتح الباب يا والينا ؟؟؟؟
> للاتصال والتفاعل والانفعال 0912243914 دكتور محمد مالك بدري
سلك كهربا
ننساك كيف والكلب كتب التلفون وماشي يتصل
والي لقاء
سلك