الغربة سترة حال
قالوا الغربة سترة حال.. وخاصة لي زول معاهو وليداتو.. ظروفنا خلتنا نشتت في بلاد الله.. في الكرة الأرضية لو رفعت حجر تلقى تحتو سوداني.. بلادا إن ربطو فيها الحمار يشرد.. برضو دقشناها.. كايسين الرزق.. ورزقا تكوس ليهو ورزقا يكوس ليك.. مهن ما مهنا ولا بتشبه الزول البيشتغلها.. تلقاهو اشتغلها.. الحلم بإنو الزول ما يرجع أهلو إيد ورا وإيد قدام.. خلتو يسوي أي شي.. حتى حاجات ما من طبعو.. ويقعد عشرات السنين.. تلقاهو قاعد تلاتين سنة في الغربة ويقول ليك إن شاء الله لما نرجع السودان.. حأسوي واسوي.. يا رجع في صندوق إن عقابو الهنا طارينو.. يا ما رجع كلو كلو.. حتى لما يجي بعد عشرة عشرين سنة.. داير ليهو ستة شهور حتى يتعرف علي الناس وعلي البلد.. وعلي التحولات الحصلت.. وعشان يركب الزلط مع ناس البلد داير ليهو سنين عشان يواكب ويعرف الحاصل..
المجتمع والبلد في تغير دراماتيكي سريع.. كل يوم في حال..!!!.. حتى الناس القاعدين فيها معتبرنها أرض معبر لأراضي تانية.. الواحد من يلدوهو ويكبر شوية يقول ليك: “البلد دي نحن مارقين منها مخلينها ليكم” مع إنو المخليها ليهم ديل زاتهم ناوين يمرقو وقاعدين يعافرو عشان يمرقو.. السودان بقى فقاسة مغتربين..
كل الشعوب فيها نسبة بتهاجر ويحددو فترة لهجرتهم ويرجعو ونحن قاعدين وأي زول يقول لك القدم ليهو رافع.. كلنا بلا استثناء حتى من رحمته السياسة وخلتو ياكل عيش ويبقى من ناس الجلد والراس.. يفكر إنو يهاجر.. يقول لك والله القصة ما مضمونة أخير من بدري أضمن لي بلد امشي عليها.. وتلقاهو شغال ويصوط فيها وهو مستف شنطو وقريشاتو مشن قدامو.. ناس يقولو ليك لا ما الأوضاع السياسية دي الأوضاع الاقتصادية.. نان الأوضاع الاقتصادية الوصلها كدي شنو؟.. مو السياسة..
والغريبة نقعد نكورك هجرة العقول هجرة الكفاءات هجرة راس المال.. هجرة السجم حتى السجم غلبو يقعد في البلد.. وياما سجم مننا حايم في بلاد الله.. والزول البيقعد يكورك دا وداير الناس تحوش العقول من الهجرة يكون جوازو جاهز وعينو حمرا علي بلد حددو من بدري.. السياسة أيها الساسة.. ساسة شنو؟ هم الساسة براهم بعد مرات بلا بسم الله يحردو ويمرقو.. ويمشو يقعدو برا بالسنين..
تابعت قضية المذيعة المهاجرة إلى قطر.. وما بينها وبين طليقها.. وصراعهم في بلاد الغربة.. والمكايدة لبعضهم حسب ما ورد في الصحف.. هي تتهم زوجها باختطافها هي وابنتها بواسطة متنفذين في دولة قطر.. والداخلية القطرية تطلع بيان.. ان المذيعة أبعدت لانها تمارس الدجل والشعوذة وقد فتحت ضدها عدة بلاغات.. وان الداخلية ليست طرفا في خلافها مع طليقها.. يا جماعة أي أزواج بيختلفوا وممكن يصلو مرحلة الطلاق.. لكن ما بتصل مراحل زي دي اتطلاقوا يا اخي وكل قرد يطلع شدرتو.. لكن تطالقوا وتقعدوا تلبدو لي بعض عشان تنكدو علي بعض.. وتنبشوا بعض بالبلد والبلدين؟ دا ما ببقى!!!!.
