بلداً ما فيهو تمساح يقدل فيهو الورل

ظهر أمس تمساح ضخم يبلغ طوله نحو ثلاثة أمتار أسفل كوبري المك نمر بالخرطوم، حسب شهود عيان، وقال أحد الشهود إن التمساح (ظهر على الشاطئ أسفل الكوبري وأوضح أن عدداً من رواد النيل أصيبوا بالذعر عقب ظهوره أمس، محدثاً صوتاً مخيفاً داخل المياه، وأضاف أنه ضخم ويقدر طوله بنحو ثلاثة أمتار، وواصل الشاهد حديثه بأن الحاضرين أخلوا المكان بسرعة، فما ابتعد بعضهم وظل يراقب الموقف عن بعد، وقال إن التمساح لم يمكث طويلاً وعاد أدراجه وأضاف أنهم أبلغوا الشرطة بالأمر).
خبر ورد في إحدى الصحف السيارة.. علاقة أهل السودان بالتمساح علاقة وطيدة.. علاقة خايف وخايف منه.. حتى إننا أخذنا نمده في أغانينا.. ونحن أصلو أي حاجة بتخوفنا وتبهدلنا قاعدين نشكرها ونغني ليها.. وأول ما تضعف ونسيطر عليها.. نديها بالجزمة.. وقد ذكرت في أكثر من موضوع أننا نضطهد الحمار وهو صاحب فضل علينا وصاحب خدمات لا تحصى ونمجد التمساح الذي يقوم بترويعنا وبشتنتنا وياكلنا وياكل بهايمنا.. وفي قصص تراثنا يأخذ التمساح حيزا ومساحة كبيرة.. قصة التمساح الذي يتحول إلى بني آدم ويخطف أجمل بنات القرية مع أن التمساح كل همو أن يأكل.. وهنا الجمال عندو يصبح ما ليهو أي قيمة.. إن بقت سمحة وإن بقت شينة طعم اللحم واحد عندو والاتنين بيشبعنو لكن في هذه الأسطورة محاولة لنبيشة البت الشينة بطريقة غير مباشرة وإنو حتى لحمها دا في الأكل ما عندو طعم يا كافي البلا.. للمرة التانية يظهر تمساح على جهات كوبري المك نمر ومنطقة القصر الجمهوري.. ويتابعه الجمهور بكل شغف وعاوزين يشوفو أخبارو شنو؟.. وخايف في النهاية ما يطلع تمساح..!!!! قبال كدي.. وليدات كانوا في البحر على جيهة الفتيحاب.. جوا جارين داخلين الحلة الشايل هدومو في إيدو.. والخلا هدومو جنب البحر.. والجا جاري حفيان بلا نعلات.. يا اولاد مالكم؟ قالوا اسكتوا ساكت تمساح قدر الهجمة وكان ما مرقننا كرعينا كان أكلنا واحد واحد.. ذهب خبراء البحر إلى الشاطئ واتضح أن هؤلاء الأشاوس قاموا جارين من “ورل” والورل من الزواحف المسالمة كل اليقدر عليهو عشان يخوفك يقيف ويرفع راسو وينفخ “بووووووف” الما بيعرفو بيقوم جاري.. والما بيعرفو بالحيل وقلبو رهيف حيلو يبرد ويصاب بشلل رباعي مؤقت وعدم السيطرة على عضلة المثانة ويشهّد ويرجا يومو.. والورل براهو إن شاف تمساح قلبو يتقطع من الخوف..!
محتاجين لي لافتات إرشادية على الشواطئ التي يتردد عليها الناس مع الصور.. صورة كبيرة توري التمساح.. صورة كبيرة توري الورل.. صورة كبيرة توري أبو القدح.. صورة كبيرة توري زول شين وقاعد يعوم عشان ما يجي حنكوش يشوفو ويقوم جاري ويقول شفت لي بعاتي. وتجي واحدة من الجرايد الفارغة وتكتب لنا ظهور بعاتي على شاطئ النيل.. برضو المناطق الضحلة والغريقة.. والمناطق البيحصل فيها هدام أيام الفيضان.. والمناطق الفيها طين لكوك وممكن الواحد يوكر فيها..