صعـــاليك

صعلوك في اللغة العربية هو الفقير الذي لا مال له.. يعني زول علي الحديدة وأحيانا حديدة زاتا مافي.. الكلمة اخدت معاني كتيرة حديثة عندنا تدل علي الزول الصايع.. المتشرد.. المهم يجيب مال ويصرفو في أي حاجة بعد الأكل.. ما عندو حدود لا لي حرام لا لي حلال.. وممكن يضارب اي زول.. ويقلع من اي زول.. غير مستقر.. ديمة فوق كرعيهو من بلد لي بلد..
صعاليك العرب زيهم زي الهمباتة.. الهمباتة برضو صعاليك وفايتين الصعلكة بي غادي.. وما داسنها.. وبتشرفوا بيها.. كذلك صعاليك العرب.. واشهر صعاليك العرب هو “عروة بن الورد”. كان صعلوك بي فهم وكان رئيسهم وأشهرهم.. واخو اخوان.. بيلقوهو ساعة الشدة.. صعاليك العرب هم مجموعة من الرجال لفظتهم قبائلهم.. وقنعوا من خيرا فيها.. ووقعوا الخلا وبقوا ناس خطف وقلع وجري.. مجتمعهم القبلي أجبرهم علي كدا.
ونحن برضو في مجتمعاتنا قاعدين نجبر ناس كتيرين علي انهم يكون خطافين وحرامية.. الفقر يا سادة لا دين له.. الجوع يلغي كل الأخلاق والقيّم.. المهم الزول يسد رمقه.. بعد داك اليحصل يحصل..!!. الموت والحياة عند الفقير الجيعان واحد.. اصلا ميتين وهم احياء.. وما عندو حاجة يخسرها.. ودي مرحلة لو وصلتها مجموعة من الناس الله يستر بي سترو..
الصعاليك لأنهم ضاقو مرارة الفقر.. والتهميش.. كانوا بيقلعوا من الغني ومن البخيل ويوزعوا علي الفقراء.. ولا يحس بالفقر إلا من جرب الفقر.. ولا يحس بمعاناة الفقراء إلا من كان فقيرا.. ولا يحس بمرارة التهميش إلا من كان مهمشا.. اما الاغنياء البيجوا يتباكوا علي الفقراء كذبا ورياء ويستغلوا فقرهم ليزيدو من ثرواتهم.. ديل محتاجين لصعاليك يقلعو منهم..!!!.
وهناك من كان فقيرا وربنا فتح عليهو واتفلهم وبقى قابض بإيديهو وكرعيهو في الدنيا وخايف يرجع فقير تاني.. زي دا خطر شديد والله لا رماك في دربو..!!!!!.
من أشهر صعاليك العرب.. والذين كانت أشعارهم سببا في شهرتهم غير عروة بن الورد.. والشنفرى الأزدي، تأبط شرا، والسليك بن السلكة.. تأبط شرا اسمو ثابت بن جابر الفهمي.. لا يقل شهرة من إخوانه قيل انه سمي بذلك لأنه في يوم كان يبحث عنه بعض الناس فجاءوا لأمه وسألوها منو قالت ليهم: “تأبط شرا وخرج” وتقصد انو حقب سيفو تحت اباطو ومرق.. يعني زول قتال.. وان لحقتوهو ياهو الما واقف محقب ايديهو يعاين لكم.. وفي روايات تانية لكنها ساذجة زي انو مرة ماشي في الخلا لقى ليهو كبش خماهو شالو تحت اباطو والكبش يقعد يتبول.. وتقل عليهو جدعو.. الكبش اتقلب غول!!. والناس سألوهو الرميتو دا شنو ؟ قال ليهم غول.. قالو ليهو لقد تأبطت شرا.. الرواية الأخيرة رواية ونسة شفع ساكت.. اصلا الغول مخلوق اسطوري.. ونقول انو في غول.. (غول شنو الدِّلاهة دا وبيخلي تأبط شرا يخمو ويختو تحت اباطو ويمشي بيهو، زيو وزي اي شنطة هاندباق)؟..!!!!!
* دِلاهة = بومة، حِمْبِرّة.