مبدعين بعد عجزو

كبر السن لا يعيق أي شي.. لكن المجتمع الفيهو الزول العجوز هو البي يحجمو.. ويهمشو.. ويهملو.. ما بقصد اهمال صحة وأكل وشراب.. أهمال معنوي.. يعني لو قال رأي.. ممكن زول جنبو عشان يمشيهو يقول لو “أي والله.. نضمك صح”، ويكون عندو رأي في نضمو وما داير يناقشو لانو بيعتبرو بيقول كلام فارغ.. بعد مرات الزول الصغير بيهمشوهو لو قال رأي ما نفع مع المجموعة أو اعتبروهو مشاتر وتلقى الجماعة يغمزو لبعض.. يعني خلوهو يورجغ زي ما داير واخدوهو قدر عقلو.. وممكن يتهموهو بانو حالج او ساطل..
أرجع للشيخوخة.. صحيح أنه بمورو الزمن بيفقد المخ كمية من خلاياه.. لكن نلقى بعض الناس. . فجأة وبعد الستين.. بقو عباقرة.. زمنهم كلو كانو ناس لافين مع باقي الناس.. وجارين ورا درب المعايش.. ويزحزحو في العوارض من الدرب.. لكن لما خلاص يفضو.. ويتفرغو.. يبقو عباقرة “يحفظ لنا التاريخ رجالاً هبطت عليهم العبقرية (فجأة) بعد سن الستين أو السبعين من العمر؛ فالنابغة الجعدي مثلاً هبطت عليه موهبة الشعر في سن الشيخوخة (حتى عرف بالنابغة)، والفيلسوف (كانت) أخرج ثلاثة مؤلفات عظيمة في الانتربولوجيا والميتافيزيقا والخلق بعد تجاوزه سن السبعين. أما أفلاطون فألقى أفضل دروسه (التي تم تدوينها لاحقا) بعد سن السادسة والسبعين..
أيضا هناك العالم الفرنسي لامارك الذي أخرج مؤلفه العظيم في علم الحيوان (التاريخ الطبيعي للحيوانات الفقارية) وهو في الثامنة والسبعين. وأتم جوته رائعته المسماة فاوست في الثمانين، وفي سن المائة رسم المصور الإيطالي تشن لوحته الشهيرة (معركة ليبانتو).. أما الموسيقار فريدي فقد ألف (عطيل) في الرابعة والسبعين وأتم (فاستاف) في الثمانين وكتب (آني ماريا) و(تريوم) و(ستابات مايتر) في الخامسة والثمانين” منقول.
زي الجماعة الفوق ديل لو لمو فيهم ناس كضموهم ما كانو وصلو للمراحل دي. ولا كانو خدمو الإنسانية.. يعني زي النابغة دا.. إن بقى هنا.. يقولو ليك العجوز المخرف دا بيقول في شنو؟ أو (كانت).. وخاصة بيكتب في الفلسفة.. الفلسفة للناس الصغار بيعتبروها نضم برا الراس ونضم خارم بارم.. خليك لما يجي زول عمرو فوق السبعين ينضم فيها.. يقعدو جنبو وهو يشرح وهم يقرقرو ويعتبروهو كلام شايلو الهواء ومن زول مخرف ساكت..
كولينيل ساندرز.. الزول الاخترع جداد كنتاكي.. شفتو حلاة الجداد دا؟..سرو في خلطة سرية.. الزول دا سوا الخلطة دي وعمرو فوق السبعين سنة.. في اللول ما اتباعت.. بقى شايل جدادو دا وحايم بيهو.. من مطعم لي مطعم.. يا الله لقى ليهو خمسة مطاعم قبلت جدادو دا.. اها من ديك وعيك..وبقى جداد كنتاكي اشهر جداد في العالم.
دحين عليكم الله الناس الكبار ديل كدي اقعدو اسمعوهم.. اسمعوهم وادوهم فرصة.. ما تخزنوهم لحدي ما يدخلو بيت حقهم!