التطواني اهـ .. مازيمبي اهـ .. الهلال لا

كيف للمريخ ان يسافر لمصر من اجل معسكر لمرحلة دور الاربعة وهو مرتبط بتواريخ في الدوري والكاس في نفس توقيت المعسكر؟
“”””””””””””””””””””””””””””””””
يتخيّل لي كدا الجماعة ديل عاوزين يهربوا من مباراة الاهلي شندي – عشان كدا عملوا (معسكر) في نفس تاريخ المباراة
“”””””””””””””””””””””””””””””
لو الاتحاد العام وافق للمريخ على اقامة معسكر والدوري مستمر يبقى ناس معتصم واسامة ديل احسن يشوفوا ليهم منافسات (سباق خيل) يمشوا عليه
“”””””””””””””””””””””””””””””
الشكاوي التى قدمت ضد المريخ لو اتكسبت ..المريخ ممكن عادي يلعب ليكم سنترليق الهبوط او البقاء في الممتاز
“””””””””””””””””””””””””””””””’

· قالوا ليك مريخابي …النوع البيسابق (القرعة) داك ..وقبل الحاجات ما تظهر بيقعد يحسب فيها.

· زولكم المريخابي دا لو عاوز ليه باسطة بقيف ليه ساعة عشان يحدد سفري وإلّا محلي؟.

· بحسبها ليك بالمل.

· المريخابي دا عايش الايامات دي في هلع شديد ..(الهلال – مازيمبي – التطواني).

· مازيمبي – التطواني – الهلال.

· التطواني – الهلال – مازيمبي.

· المريخابي بكون ماشي في الشارع وهو بردد في سرو (يا الـله احسن لينا الهلال وإلّا مازيمبي وإلّا التطواني؟).

· ينوم ويصحى على التساؤل دا.

· ناس التطواني طوال ..ناس مازيمبي عراض ..اللاعب زي الباب المن خمسة ضلف.

· وناس نزار حامد والشغيل كمان ..اخير لينا مازيمبي.

· آخر حاجة المريخابي قال يمشي ليه لي خبير (توقعات) ويشوف الموضوع دا عند (ابوكلمبو).

· ابوكلمبو زول معروف في الحاجات دي – ما تقعدوا تصنقعوا لي في الفاضي.

· زولكم اليوم والتاني كان واقف في باب (ابوكلمبو).

· ابوكلمبو فتح ليه الباب ..قال ليه ان شاءالـله خير؟…الجايبك في الوقت دا شنو؟..الواطة ما صبحت.

· المريخابي قال يدخل في الموضوع..طوالي قال ليه يا ابوكلمبو احسن لينا نلاقى الهلال في نصف النهائي ام نلاقى مازيمبي ام التطواني؟.

· ابوكلمبو قال ليه الموضوع دا عاوز ليه (بياض)..عشان نشوف ليك الحاصل شنو؟.

· المريخابي قال ليه جدا – ودخلو ليك جوة على الراكوبة.

· ابوكلمبو قال للمريخابي اسمع ..مازيمبي دا خطير في الضغط النفسي والثقل قبل المباراة والارهاب بالاسم والسمعة…اما التطواني فهو خطير في التكتيات داخل الملعب ..وفي اللعب القصير والممرحل.

· ابوكلمبو قال كلامو دا وسكت.

· المريخابي قال ليه : والهلال؟.

· ابوكلمبو قال ليه الهلال خطير في الاتنين ..في الضغط النفسي وفي التكتيكات داخل الملعب.

· زولكم عاوز يقع.

· المريخابي قال لي ابوكلمبو طيب يا ابوكلمبو لو قابلنا مازيمبي نعمل شنو؟.

· ابوكلمبو قال ليه تعملوا حسابكم من الضرب في (الزوي)..ديل اخطر ناس بضربوا في التمانيات.

· المريخابي قال ليه ولو قابلنا التطواني؟.

· ابوكلمبو قال ليه لو قابلتو التطواني تعملوا حسابكم من الخبث الكروي بتاع شمال افريقيا – ديل بكتلوا ليكم الكورة ما بتفهموا فيها اي حاجة.

· المريخابي قال ليه طيب لو قابلنا الهلال؟.

· ابوكلمبو قال ليه لو قابلتو الهلال تعملوا حسابكم من الاتنين..ديل عندهم الضرب في الزوي وعندهم الخبث الكروي.

· زولكم عاوز يموت.

· المريخابي قال ليه طيب يا ابوكلمبو من ناحية العنف القانوني بتقول شنو في الجماعة ديل؟.

· ابوكلمبو قال ليه مازيمبي معروف بضرب في (الرقبة)…والتطواني بضرب في (النخرة).

· ابوكلمبو قال كلامو دا وسكت.

· المريخابي قال ليه والهلال؟.

· ابوكلمبو قال ليه الهلال بضرب في الاتنين ..في الرقبة وفي النخرة.

· زولكم خلاص الفيه خلصت.

· المريخابي ما عرف يمشي وين؟.

· المريخابي قال ليه لو قابلنا مازيمبي كيف يا ابوكلمبو؟.

· ابوكلمبو قال ليه لو قابلتو مازيمبي إلّا تشوفوا ليكم بلد ..بتنضربوا والشمس حية.

· المريخابي قال ليه ولو قابلنا التطواني؟.

· ابوكلمبو قال ليه لو قابلتو التطواني ..لا جمال الوالي ولا جمال سالم بقعدوا ليكم تاني…جمال الوالي تاني يوم بقدم استقالتو ..ناس التطواني ديل بعد الضرب بيبهدلوكم.

· المريخابي قال ليه طيب لو قابلنا الهلال؟.

· ابوكلمبو قال ليه لو مازيمبي والتطواني اجتمعوا سوا ..احسن ليكم من الهلال.

· المريخابي طوالي رجع وقال لي ابوكلمبو اسمع قلت لي مازيمبي كيف؟.

· ابوكلمبو قال ليه انتوا كدي اول حاجة اتخارجوا من الهلال.

· المريخاب سوف يتابعوا الجولة الاخيرة في مباريات المجموعة الاولى (الهلال وسموحة – التطواني ومازيمبي) وهم في حالة لا يعلم بيها إلّا الـله.

· اخير نحن – رغم من اننا الى الآن لم نصعد ومازال مصيرنا مجهولا ..لكن (الخوفة) الفي المريخاب …خلتهم يندموا على تأهلهم لمرحلة دور الاربعة.

· نصف النهائي مرق من نفسهم.

· الناس ديل في حالة صعبة شديد.

· ما عارفين يعملوا شنو؟.

· ديل في الممتاز ما انستروا.

· جماعتكم الى الآن ما عارفين ح يقابلوا منو؟…الهلال – مازيمبي – التطواني.

· عشان اثبت ليكم (النظرية) قبل (الطحنية)..ناس المريخ حددوا معسكرهم لدور الاربعة منذ الآن في مصر.

· عارفين الموضوع صعب عليهم – قالوا احسن نعلن المعسكر من الآن ..عشان بعدين لو (النتائج) ظهرت ..بتبقى شينة في الوقت داك يطلعوا يعسكروا للهلال.

· عاوزين يتخارجوا من البلد.

· لكن الشيء المحيرني ..كيف للمريخ ان يسافر لمصر من اجل معسكر لمرحلة دور الاربعة ؟ وهو مرتبط بتواريخ في الدوري والكاس في نفس توقيت المعسكر.

· يتخيّل لي كدا الجماعة ديل عاوزين يهربوا من مباراة الاهلي شندي – عشان كدا عملوا (معسكر) في نفس تاريخ المباراة.

· اصلو مباراة الاهلي شندي دي قدر ما تقرب ..ناس المريخ بهربوا منها وبعملوا ليهم سبب عشان ما يلعبوا.

· مباراة مفروض تلعب الاسبوع الـ (21) الى الاسبوع الـ (25) ما تتلعب ليه؟.

· عملتوها ظاهرة.

· الآن اخترع مجلس المريخ وجهازه الفني معسكر لدور الاربعة عشان يلعب مباريات ودية ويتمرن ..والمنافسات المحلية شغالة ..والمباريات صعبة…بدليل ان المريخ اصبح يخسر عادي في ملعبه.

· المريخ سوف يترك هذه المباريات الصعبة والتنافسية والتى يمكن ان يستفيد منها حقا ويمشي يعسكر في مصر.

· دا كلام يا جماعة.

· لو الاتحاد العام وافق للمريخ على اقامة معسكر والدوري مستمر يبقى ناس معتصم واسامة ديل احسن يشوفوا ليهم منافسات (سباق خيل) يمشوا عليه.

· المنافسات مضغوطة ..والمباريات القادمة مصيرية ونحن في خواتيم الموسم ..ناس المريخ عاوزين يهربوا ويمشوا يعسكروا في مصر.

· انتوا عارفين المعسكر ما عشان دور الاربعة…المعسكر عشان المريخ خايف يفقد (وصافتو) للهلال.

· ناس الاهلي شندي والخرطوم الوطني جوكم دافرين ..خاصة ان هناك شكاوي مقدمة على المريخ من هلال الفاشر والاهلي الخرطوم والامل عطبرة.

· يعني الشكاوي دي لو كسبوها ..المريخ ممكن عادي يلعب ليكم سنترليق الهبوط او البقاء في الممتاز.

· عشان كدا قالوا يعملوا حيلة (المعسكر) دا ..ويهربوا من البلد.

· وربما يكون الامر هو من اجل الضغط على الاتحاد لكي يحسم الشكاوي (الصورية) التى قدمها المريخ في الامل عطبرة وهلال كادوقلي.

· بالمناسبة في واحد قال لي انت تعال هنا ناس المريخ ليه ما اشتكوا هلال الابيض؟.

· قلت ليه عشان هلال الابيض عندو (والي) اخطر من (والي) المريخ ..ناس الاتحاد ما بقدروا عليه.

· ولا ناس المريخ.

· كمان في زول بيشتكي فريق أحمد هارون.

· انتوا جنيتوا؟.

· بس فالحين لي لي امل عطبرة وهلال كادوقلي.

· المهم هسع خلونا في الحالة الفيها المريخاب.

· ما عارفين يقابلوا منو؟.

· يتصرفوا كيف؟.

· يسوا شنو؟.

· نحن ما صعدنا ..مع ذلك عارفين اننا ح نقابل المريخ.

· شفتوا قوة العين دا.

· المريخ صعد وما عارف حاجة.

· شاهد ما شافش حاجة.

· شفتوا الزول وقت يعتمد على نتائجه وتأهله على الفريق الآخر ..بحصل ليه البحصل للمريخ الآن.

· مرة رزاق.

· ومرة عنكبة.

· ……….

· ملحوظة : الـله يجيب لينا دور الاربعة دي ..ونشيل نصيبنا من الجماعة.

هوامش

· الاتحاد العام هل سوف يواقف لمعسكر للمريخ في القاهرة والدوري شغال.

· مباريات الدوري والكاس افضل للمريخ من المعسكر.

· ولو كان المعسكر في ايطاليا.

· الهلال بكرة يلعب امام النسور ..اوعكم من مفاجآت الكاس.

· ما عاوزين نفقد اي حاجة.

· السنة دي نحن ناوين نشيل اي بطولة نشارك فيها ان شاءالـله.

· الفارق بقى كبير بين الهلال والاندية الاخرى.

· في الممتاز الفارق براهو بقى (6) نقاط.

· عشان كدا لقطوا اي حاجة.

· ما تخلوا ليكم شيء.

· لا دوري ولا كاس.

· وبطولة افريقيا طبعا الحلم الاكبر.

· وربنا يحقق الاماني ان شاءالـله.

· مباراة الهلال امام مريخ كوستي في كوستي سوف تكون مباراة بطولة.

· الانتصار في كوستي يعني فوز الهلال بالممتاز.

· من هسع احسبوها لينا.

· وخلوا بالكم.

· ما عاوزين نفقد اي نقطة.

· يا بشه لقطوا اي شيء.

· يا كاريكا …الموسم حقكم.

· يا مساوي السنة دي ح تتعب من رفع الكاسات.

· من كاس لي كاس.

· خليك جاهز.

· وقولوا يا رب.

· ……..

· عاجل : ناس المريخ كابتن عشان يشيل ليهم كاس ما عندهم.