الاختبار والامتحان

> أيها الناس
> احباطات بدت تدخل نفوس بعض الشفوت
> مافي داعي ليها
> والحرب كر وفر
> فلا يعقل أن نطمئن عند الكر
> ونفقد الثقة في نفوسنا عند الفر
> بل يجب أن نستغل الفر في إعداد الصفوف من جديد
> ونواصل الكر
> الى أن نصل ساحة المطار التي تحبنا ونحبها
> وعندها نحمد الله كثيراً
> ايها الناس
> في الفصل في المدرسة
> نتيجة الاختبار لاتعني الفشل في الامتحان النهائي
> فالاختبارات تبين الضعف وين
> والزول الواعي بستفيد منها للامتحان الكبير
> ايها الناس
> البحصل محلياً ده كلو اختبارات ساي
> ومجموع نقاطنا التي حصلنا عليها دورياً حقتنا
> لم يخطئ التحكيم لصالحنا اطلاقاً
> واظنكم تذكرون هزيمة الخرطوم الوطني الموسم الماضي من الهلال
> الخرطوم يتقدم بهدف محمد موسي
> ويحرز محمد موسي نفسه الثاني
> ولكن الحكم يخطئ
> بدل يصفر قون ويؤشر علي السنتر
> صفر سااااي واشر علي الواطة دي
> وواصل اخطائه الي ان توج الهلال بالنقاط
> وهي بدورها توجته بالدوري
> الموسم ده
> كورة النسور في الدورة الاولى
> ضربة جزاء راعي الضان في الخلا يحتسبها لصالح النسور في الدقيقة سبعة
> ومعاها طرد كمان
> وضربة جزاء اخرى للنسور في الشوط التاني
> لكن بقدرة قادر خرج النسور من المباراة مهزوماً
> يخطئ يا عمك ولا يظلم
> وفي مباراتنا ضد الهلال
> ضربة جزاء مع كوفي
> اوضح من الشمس
> ومعاها طرد
> لو ماسك الصافرة الكاردينال
> كان احتسبها
> لأنه برضك الراجل بخجل شوية
> ولكن الحكم ماشافها
> اللهم متعنا في ابصارنا وفي اسماعنا واجعلها اللهم الوارث منا
> قال ماشافها
> يعني ندخل جوه عينو ونقول ليهو شفتها ؟؟؟
> اما في كورة الميرغني كسلا
> فحدث ولا حرج
> في تقدير اي زول شاهد المباراة
> هناك هدف صحيح ملغي للميرغني المسكين
> وضربة جزاء ضاعت بسبب اخطاء التحكيم
> فالحكم يومها اخطأ ولكنه لم يقصد ظلم الميرغني المسكين
> وربنا بعلم بالنوايا
> وبحاسب عليها
> دنيا واخري
> ديل اسي كم نقطة جاية ساي اخطاء تحكيم ؟؟؟
> المهم
> صدقوني
> بعد ده اذا تلاشت عبارة يخطئ ولا يظلم
> لفارق الهلال الصدارة فراق الطريفي لي جملو
> لكن طالما الطريفي لامي في جملو
> يبقى يخطئ ولا يظلم حاتتحكر في نفوس النزاهة ردحاً من الزمن
> ايها الناس
> حكم يدير لقاء للمريخ
> متغدي بالحاج يوسف في نفس اليوم
> افصح عن رغبته في هزيمة المريخ علناً
> تقدروا تصدقوا الكلام ده ؟؟؟
> ابقوا معنا والتبقى تبقى
> ايها الناس
> كل الشفوت لهم بصمات واضحة في مسيرتنا للمطار
> والاختبارات لا تؤثر في الامتحانات سلبياً
> بل ايجاباً
> ونواصل في نفس الدرب
> -جميعنا يقدم ما يستطيعه في مجاله
> وصدقوني بنصل المطار
> ايها الناس
> الحبيب عراقي يجدد العهد
> عهدك ما محتاج تجديد يا عراقي يا اخوي
> لكن صدقوني
> خبر الشوم خبر الروم لو في مصر اتناقلنو الحروم
> يبقى كلو زول عرف حجمو
> الكرستالة الصغيرة بتكتشف انها لا تضاهي الحجم العائلي
> الكرستالة الصغيرة
> في مصر بقولوا عليها الشحرورة
> غايتو يا الشحرورة لو خبر الشوم جاب ضقلك ملولح وخبر الروم يضحك علي الداير يتفولح
> الحجم العائلي بفرش عليك
> صغيرة وجاهلة يا حليلة
> المهم
> مباراتنا ضد الاتحاد ما فيها ضغوط
> ويجب ألا نجازف فيها بلاعب مصاب
> او بلاعب يتوقع انذاره لنفقده في دور الاربعة
> الفوز فيها زيادة خير
> ولكنه ليس بالضرورة ولا كسر رقبة
> يبقى على الشفوت أن يعوا النقطة دي جيداً
> ولايشكلوا ضغوطاً على الجهاز الفني واللاعبين
> نحنا صعدنا بدري نحمد الله
> جوه دور الأربعة
> لاعندنا لولوة
> ولا احتمالات
> لكن ما عارف الذكرني الجزارة شنو
> في الجزارة تلقي الكلب حايم بي برة
> لابقدر يدخل
> ولا بقدر يمشي
> يلف بي بره كده بس
> يوماتي القصة دي
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> لاناقشين البينا ولا العلينا
> شبكتنا طاشة بقينا
> تلاقيك واحدة ملطخة البودرة لي اضنينه
> تقول ليها ياخالة اظهاراً للاحترام الفينا
> تقول ليك يخلخل ضروسك اسي انا اكبر منك يا اخينا
> تلاقيك غيرها الكريم مقطع بشرتها باقية زي بصل السخينه
> تقول ليها يا اخت تعبيراً عن زوقا فينا
> تقول ليك انا قدرك يا عجوز يا المابتشبه زول فينا
> نقول ليهن شنو يا والينا ورينا
> كان اتغابينا فيهن العرفة وعملنا ما شايفين يبحلقن فينا
> زي ديل باقي ليك يا والينا بتعددن لينا ؟؟؟؟؟
سلك كهربا
ننساك كيف والكلب حايم بره الجزارة ويتمطق
والي لقاء
سلك