العصمة في يد (الإتحاد)

انتوا يا ناس اطهر الطاهر ذاتكم غلطانين ..كيف تنتصروا على فريق دون (الاستحواذ) على الكورة
نكلمكم..نحدثكم..وانتوا الموضوع جديد عليكم دور الاربعة ما فيه (الاتكالية) دي ..اي فريق ياكل نيمو

قالوا ليك بعد الشوط الاول ما انتهي 2 / صفر للعلمة …الشغل (الدبلوماسي) دور ليك بين البلدين

ناس المريخ كورتهم زي الموسم الزراعي ..ممكن (مطرة) تؤثر فيه ..وتحدد نجاحه من فشله
******************************

· العزيز (سلك) بعد فوز الهلال على مازيمبي وتسجيله لهدف من الدقيقة السابعة ..(هدف عديل ما ضربة جزاء) طلع علينا امس عبر زاويته وقال : (ايها الناس .. نسبة استحواذ مازيمبي كانت 64 في الميه.. وابو الهل 16 في الميه).

· خلاص كدا النتيجة ممكن تتلغي ..ويعتبر الهلال مهزوما!!.

· نحن ضعنا!!.

· سلك ترك ضربات الجزاء التى انتصر بها المريخ ومنحت له في كل مبارياته الافريقية بما في ذلك مباريات المريخ الخارجية وقال ان نسبة استحواذ مازيمبي كانت 64 في الميه.

· فكرة واللـه.

· مفروض الاتحاد الافريقي يفك الاشتباك الحاصل في المجموعة الاولى بين الهلال ومازيمبي والتطواني بالاستحواذ القالو بابكر سلك دا.

· الاستحواذ جميل.

· ما فيش اجمل من الاستحواذ.

· انتوا يا ناس اطهر الطاهر ذاتكم غلطانين ..كيف تنتصروا على فريق دون (الاستحواذ) على الكورة.

· برضو منطق.

· وممكن كمان نحسب ليكم عدد المرات التى دخلت فيها (النقالة).

· اصلو ما في مشكلة.

· انتوا يا سلك ..وقت بتعرفوا (الاستحواذ) ليه ما تكلمتوا عنو وقت الهلال خسر امام التطواني في ام درمان صفر / 1 والتطواني الكورة ما كان شافها.

· مازيمبي ذاتو في لوممباشي عندما لعب امامه الهلال ..مازيمبي الكورة ما شافها إلّا بعد صفارة النهاية.

· الاستحواذ …الوقت داك كان وين؟.

· غايتو نحن مقدرين ظروفكم يا سلك …عارفين حالتكم صعبة ..انتوا عايشين في (رعب).

· في خوف ..لو الهلال قابلكم بي دفاعكم (الشوارع) دا…ح تشربوا ما تروا.

· ناس المريخ عندهم (دفاع) المهاجم لو ما عندو رغبة في القون ..بقوم يلقى الشوارع دي يجيب ليه قون.

· العلمة فريق درجة تانية ..ضرب ليك المريخ في الشوط الاول اتنين ..لمن نحن شلنا هم (الوحدات).

· قلنا المطر.

· والبرد.

· بس ناقصين اكرم الهادي سليم.

· جمال سالم ذاتو بقى اكرم.

· سليم وسالم ..ما في فرق كتير.

· قالوا ليك بعد الشوط الاول ما انتهي 2 / صفر للعلمة …الشغل (الدبلوماسي) دور ليك بين البلدين.

· سفارتنا وسفارتهم.

· ونحن شعب واحد.

· وبلد الميلون شهيد ..والمليون ميل مربع (سابقا)..ما في داعي للبشتنة دي.

· جمال الوالي قالوا ليك بعد الشوط الاول ما انتهى (بطارية) تلفونو نزلت من الكلام مع الجزائريين.

· كنت عاوز اقول ليكم رصيدو انتهي من المكالمات الدولية..لكن اتذكرت دعم الحكومة.

· اتذكرت (النفط).

· قالوا ليك الدعم الذي منحته الحكومة للمريخ ..كلو استهلكو جمال الوالي في مكالمات مع السفير السوداني في الجزائر.

· يا ربي كانوا بتكلموا عن (المليون شهيد).

· وإلّا عن (المطرة) الوقفت في الشوط التاني.

· هي المطرة براها – الوقفت.

· وبابكر سلك ..بتكلم عن (الاستحواذ).

· يا سلك …كلامك دا اوعك تقولو لي في (عطبرة).

· رزاق – كلام زي دا ما بنفع معاهو.

· بعدين نحن بـ( 16 في الميه) من الاستحواذ ..غلبنا مازيمبي ..لو الاستحواذ كان فيفتي فيفتي يا ربي مازيمبي كان بتغلب كم؟.

· تعرف يا سلك ..(والكلام دا ما يطلع من العمود دا)..نحن لو قابلنا المريخ في دور الاربعة بي نسبة استحواذ 4 في المية بنغلب المريخ تلاتة.

· وانتوا (التلاتات) مجربنها من الهلال في البطولات الافريقية.

· لو نسيتوا اسألوا (عمر بخيت) القاعد في كنبتكم الآن.

· قالوا ليك الهلال بي استحواذ 16 في المية فقط …بتصدر مجموعته الآن.

· انتوا يا سلك ..اتأهلتو بي استحواذ (اتحاد العاصمة الجزائري).

· يعني انتوا استحواذ مع الناس ما عندكم.

· بتصعدوا بي عرق الآخرين.

· بي استحواذ الناس التانين.

· حدث ذلك مع كمية ضربات الجزاء التى منحت للمريخ ..ومع الاهداف العكسية وحالات الطرد.

· والاهداف العكسية.

· جماعتكم لقوا الحاجات دي كلها وبصعدوا بي فضل اتحاد العاصمة الجزائري.

· نكلمكم.

· نحدثكم.

· وانتوا الموضوع جديد عليكم دور الاربعة ما فيه (الاتكالية) دي ..اي فريق ياكل نيمو.

· تصرفوا براكم.

· لا في ضربات جزاء بتنفع ليها زول.

· ولا حالات طرد.

· تاكلو ناركم بس.

· مجموعتكم دي (العصمة) في يد الاتحاد.

· شوفوا مجموعتنا …الاندية الثلاثة بتتخابط.

· دخلنا ليك مازيمبي (مدرسة).

· مازيمبي فاكر نفسو حسم الموضوع …غلب سموحة في الاسنكدرية ..واتعادل مع التطواني في المغرب.

· يعني اصلو ما قصر.

· عمل اي حاجة.

· نحن عقدنا ليه الحسابات.

· اتعادلنا معه في لوممباشي ..وغلبانه في ام درمان ..شلنا اربعة نقاط من مازيمبي.

· تاني نعمل ليه اكتر من كدا شنو؟.

· الحاجة الحارة ..هدف اطهر الطاهر اتسجل في مازيمبي من الدقيقة السابعة من عمر المباراة.

· اديناهم وقتهم الكافي.

· سلك في عموده امس ..استبعد مبدأ اللعب النظيف ..واعترض على دخول (النقالة) ارضية الملعب لاسعاف اللاعب المصاب.

· ناس مازيمبي ما اعترضوا على الكلام دا..ناس سلك ومزمل اعترضوا على (النقالة).

· طيب سيسيه الذي خلع كتفه …وذهب الى رويال كير (مصابا)..يدخلوا ليه باوركسترا الاذاعة؟.

· زول خلع كتفو ..يدخلو ليه بي شنو؟.

· بعدين انتوا (النقالة) دي في مباراة الهلال والتطواني ما كانت ساكنة عديل كدا في الملعب ..ليه ما اتكلمتوا عنها.

· غايتو الزول وقت يكون شايل ليه هم من دور الاربعة …بقعد يتكلم ليك عن (النقالة).

· والاستحواذ.

· الكلام دا كلو ما بحلكم.

· دفاعكم العامل زي (استراحة) السكة الحديد ..مع ناس بشه ونزار وكاريكا ومحمد عبدالرحمن إلّا تشوفوا ليكم حكم خامس مع الحكام الاربعة عشان يستروا دفاعكم دا.

· اربعة حكام ما بثبتوا الجماعة ديل.

· وحارسكم جمال سالم ..بقى زي عضو الفرقة الاثيوبية للفنون الشعبية.

· الزول دا مالو؟.

· الحصل عليه شنو؟.

· التربيزة اثرت في مستواه.

· ألحقوا …دخلوا المعز محجوب في الفورمة …جمال سالم البنشوف فيه دا ..لا بنستر قدام الهلال ولا حاجة.

· نحن كيديابا ما انستر قدامنا.

· من الدقيقة السابعة من عمر المباراة سجل فيه اطهر الطاهر (19) سنة قون.

· ناسكم طاعنين في السن يا ناس المريخ.

· امير كمال (تقيل).

· ومع (التقلة) خايف يصاب ..بفكر في الـ (11) مليار.

· وعلاءالدين يوسف السن ليها احكام.

· ومصعب عمر مع الفلسفة قاعد يرجف.

· ايمن سعيد (43) سنة.

· انتوا ناس المعاشات ديل بتجيبوهم من وين؟.

· ديل عاوزين ينستروا قدام اطهر ووليد والصيني ومحمد عبدالرحمن.

· قالوا ناس المريخ لو عارفين الهلال ح يقابلهم في دور الاربعة …كانوا طاروا من دور الـ (16).

· المجموعات الهملة دي ذاتها ما كان بدخلوا ليها.

· مجموعة المريخ دا ..لو بلعب فيها (ولاد حلتنا) كانوا اتأهلوا.

· هسع انتوا ما بتخجلوا تتأهلوا بي عرق جبين (الاتحاد).

· ما بتخجلوا تخلوا العصمة في يد الاتحاد.

· الاتحاد ينفع فيكم هنا وفي الجزائر.

· اتحاد ناس معتصم واسامة عطا المنان ومجدي الحكام ما قاعدين يقصروا معاكم.

· واتحاد الجزائر صعدكم.

· الحدللـه نحن بنقرر مصيرنا بي ايدنا.

· مصيرنا لا بقرروا لينا حكام …ولا نادي آخر.

· برانا بنحدد مصيرنا.

· بي بشه.

· بي مساوي.

· بي اطهر الطاهر.

· بي كاريكا.

· لا بي حكم.

· ولا بي اتحاد.

· ولا بي مطرة.

· ناس المريخ كورتهم زي الموسم الزراعي ..ممكن (مطرة) تأثر فيه ..وتحدد نجاحه من فشله.

· …………..

· ملحوظة : العجيبة (رزاق) جاب اقوانو بدون اي (مطرة).

· هوامش

· الهلال يلعب غدا مباراة صعبة امام الاهلي مدني.

· اوعكم والتفريط.

· الممتاز زي البطولة الافريقية تلعبوا بي حرة قلب.

· نحن بتاعين الصدارة.

· ناوين على الصدارة الافريقية والممتاز.

· ولا بنقبل حاجة اقل من كدا.

· البسوا لبس خمسة.

· خلاص نحن في وقت الحصاد.

· المسؤولية على الجميع.

· الكاردينال ..عليه ان يوفر كل الاحتياجات.

· خلاص يا الكاردينال ..موسمكم انتهى ..والنجاح والبطولات ان شاءاللـه تكون من نصيب الهلال.

· خليكم قريبين من اللاعبين.

· ابعدوهم من الضغوط.

· حققوا كل احتياجات الجهاز الفني.

· ابعدوا اللاعبين من الصحف والنت والموبايلات.

· لازم يعرفوا ..نحن بقينا على البطولة.

· مباراة الاهلي مدني بتنعكس نتيجتها على البطولة الافريقية.

· لذلك ..ما عاوزين في هذا الوقت اي (عترة).

· لا بتصلح المشي في الوقت دا ولا حاجة.

· جمهور الهلال كما كان في مباراة مازيمبي نريده ان يكون في كل مباراة.

· حتى المباريات المحلية يجب ان يكون بهذه الروح.

· المباراة مباراة.

· مازيمبي زي الاهلي مدني.

· والاهلي مدني زي مازيمبي.

· والانتصار ..هو هدف الهلال الاول.

· ……………

· عاجل : شيلوا (احذية المطر) معاكم بكرة ..يمكن الكاملين يكون فيها (مطرة).