المريخاب بيلعبوا بي فريق اطول لاعبيّه تحت (سطح البحر)

· الهلال افريقيا لم يخسر غير مرة واحدة اما في الدوري الممتاز فان مجرد الوصول لشباك الهلال اصبح (مستحيل)

· في الهلال مدثر كاريكا (كورة واخلاق) – وهو افضل من جسد المقولة على ارضية الملعب

· المصريون قالوا العملوا نزار حامد دا – نحن في حرب اكتوبر ما عملناه

· قالوا ليك علي جعفر من القعاد الكتير في (الجزائر) بقى حافظ ليه (21) كلمة فرنسية

· قبل ما ادخل ليكم في العمود (عشان ما انسى) والكلام يطير من رأسي … اقول ليكم امس بابكر سلك رجع عشرات السنوات زي (مامون ابوشيبة) وقال عيسي صباح الخير عملها قبل (ميسي).

· المعنى (نزار حامد).

· الجماعة فلسوا.

· طبيعي يا سلك (عيسي) يعملها قبل (ميسي) عشان الوقت داك ميسي ما كان مولود.

· يعني عاوز ميسي يعملها قبل الولادة.

· وان كانت ميسي ما بعيدة عليه.

· ممكن يعملها.

· انتوا (الجزائر) دي مالها دخلت عليكم كدا يا سلك؟.

· يوم داك مشيت فطرت مع مريخابي ..جاب لينا صينية الفطور بعد (التراويح).

· وبلح ما جابوا لينا.

· قلنا ليه دا شنو دا؟.

· قال لينا : واللـه نزار حامد مرق (الاكل) من نفسنا…الفطور دا لو جابوه لينا مع السحور بقى ما فارق معانا.

· في هلالابي النوع البقولو عليه ناس مامون ابوشيبة (حاقد) – قال لي شفت هدف نزار حامد في سموحة اجمل منو عدم احتساب هدف شيبون في اتحاد العاصمة الجزائري.

· حقارة كدا بس.

· اما اذا كنت عاوز تقارن يا سلك بين هدف عيسي صباح الخير وهدف نزار حامد بنقول ليك هدف عيسي كان هدف (جري) لعبت (السرعة) فيه دور كبير – وهذا لا يقلل طبعا من (جمال الهدف).

· جمال الهدف – ما جمال الوالي ..(عشان الامور توضح).

· اما هدف نزار حامد فقد كان بالعمق عديل كدا – ما طرف ..نزار شق الميدان قوة قلب ..ما جري ساكت… المهارة والقوة والجسارة لعبت في الهدف الدور الاكبر.

· المصريون قالوا العملوا نزار حامد دا – نحن في حرب اكتوبر ما عملناه.

· بعدين يا سلك ..هدف عيسي في افارقة (روش)..وهدف نزار في افارقة (مصريين) مفتحين ..صعب يجي قون فيهم زي دا.

· انت ما شفت المعلق المصري كان بقول على الشغل دا شغل (ماردوني).

· ندخل ليكم على الموضوع.

· بصورة مستمرة ودائمة اصبح يشارك في تشكيلة الهلال اطهر الطاهر ووليد علاءالدين.

· اثر اطهر ووليد في مباريات الهلال اصبح واضحا…فهما لا يلعبان فقط من اجل المشاركة.

· ويتواجد في التشكيلة الكلية للهلال عماد الصيني ومعتصم عبدالقادر.

· ولولا الاصابة لحجز محمد عبدالرحمن (موقعه) في تشكيلة الهلال ولاصبح الآن منافسا على القاب الهداف في البطولات المحلية والافريقية.

· وهناك (وليد الشعلة) المستقبل المشرق.

· كل هذه العناصر – هي عناصر وطنية ..صغيرة في السن ..وقادرة على العطاء لاكثر من عشر سنوات قادمة ان إلتزموا بالتمارين والانضباط والسلوك القويم والاحترافية داخل وخارج الملعب.

· لا نريد ان نعرج على (احمد بيتر) الموهبة التى يقصد تدميرها ..حيث لا متضرر من ذلك غير المنتخب الوطني.

· الهلال يحرس مرماه الآن حارس فيه كل مواصفات التميز والكمال ..حيث تبقى حاجة الهلال لاحمد بيتر محدودة – غير ان المنتخب الوطني هو الذي يعاني في حراسة المرمى.

· احمد بيتر حارس سوف ينفع المنتخب الوطني – وهو قادر على منافسة مكسيم وجمعة لو حلت مشكلته.

· لكن لأن الاتحاد لا يرى إلّا بعين (المريخ) – ابقى على مشكلة (أحمد بيتر) هكذا بدون حل.

· يزايدون عليه – من حين لآخر ويجعلوه في ميزان المزايدات والانكماش والانفتاح حسب متطلبات المرحلة.

· الهلال مثلما فيه هذه العناصر (المستقبلية) المشرقة – عنده كذلك عناصر تتميز بالقوة والخبرة والموهبة الكبيرة.

· في الهلال ما شاءاللـه كدا – وتبارك اللـه (غزلان).

· حيث (الطول) والقامات الابنوسية القادرة على ارهاب اي فريق ينازلها في المقبرة او في الكنغو.

· قوة وجسارة مع الرشاقة والمهارة العالية.

· كل الملاعب اضحت (مقبرة) لخصوم الهلال ان نازلوا فيها سيد البلد والزعيم الاصلي الهلال.

· في الهلال نصرالدين الشغيل …طول وقوة ..لو طوح يمين ..بقطع الموية..ولو طوح شمال … بقطع النور.

· وفي الهلال الصاقعة نزار حامد ..غزال السافنا الغنية ..واحد اهم مواهب الكورة السودانية في السنوات الاخيرة.

· وفي الهلال اتير توماس ..الابنوسي الهادي … افضل من يحسن لالعاب الهواء ..حيث اضحت (اجواء) الهلال مؤمنة تماما.

· سيطرة تماما على كل شاردة وواردة (جوا).

· وفي الهلال سيف الدين مساوي …خبرة وعقلية كبيرة واهداف حاضرة متى ما كان هناك حاجة لها.

· في مباريات كدا – ما بحلها إلّا سيف الدين – حيث اذا استعصى الهدف على الهلال كان سيف الدين مساوي في الموعد.

· وفي الهلال مدثر كاريكا …كورة واخلاق – هو افضل من جسّد المقولة على ارضية الملعب.

· مدثر كاريكا اللاعب (الرسالي) الاول للكورة السودانية.

· وفي الهلال (بشه) زي ما عاوز بعمل في الكورة.

· خفة وحرفنة …ومساحات.

· ممكن يخيط الكورة.

· وممكن يطلع ليك في حتة اصلو ما بتتخيلها.

· في الهلال ايضا مهاجم قوي – يحسن ألعاب الهواء ..وهو المهاجم صلاح الجزولي.

· ويملك الهلال حارس مرمى – هو بكل القياسات والمواصفات حارس (بطولات).

· حراسة المرمى في الهلال مع (مكسيم) بقت زي الحراسة في بنك السودان المركزي ..قرد ما بمر.

· وفي الهلال معاوية فداسي – ما بتفوت منو لو جيتو لابس طاقية الاخفاء.

· عناصر الهلال الآن كلها تتميز بالقوة والطول الفارع والمواهب المختلفة المشارب.

· لذلك نقول ان تشكيلة الهلال الحالية تشكيلة (بطولة) – هو يملك قوام الفريق البطل.

· حسابيا يثبت الهلال ذلك ..حيث لم يخسر الهلال في هذا الموسم غير مرة واحدة امام كي ام كي ..وهي خسارة قصد الهلال عدم تحاشيها.

· لعب الهلال افريقيا 8 مباريات …امام مدارس مختلفة وفرق عديدة ولم يخسر غير مرة واحدة.

· اما في الدوري الممتاز فان مجرد الوصول لشباك الهلال اصبح (مستحيل).

· كل الاهداف التى قبلها الهلال افريقيا ومحليا (5) اهداف فقط ..(قولوا ما شاءاللـه).

· هذه كانت مقدمة او مسحة خفيفة الى ان نناقش الامر بصور اعرض غدا ان شاءاللـه في (من الغلاف للغلاف).

· عاوزين نعرج بس على جماعتنا ديل.

· الناس البقوا (جزائريين) ديل من كترة القعاد الكتير في الجزائر.

· قالوا ليك علي جعفر من القعاد الكتير في (الجزائر) بقى حافظ ليه (21) كلمة فرنسية.

· بكري المدينة الى الآن حفظ ليه اربع كلمات فقط.

· بكري ما بقدر يحفظ ليكم اكتر من كدا.

· فريق المريخ الآن تعدى معظم لاعبيه سن الـ (35) سنة ..نقعد نحسبها ليكم ..وإلّا ما داعي للاحراجات.

· اظن ايمن سعيد براهو بقف دليل على ذلك.

· والمعز وعمر.

· وما عاوز اقول ليكم علاءالدين يوسف.

· ما نكتر ليكم في موضوع (الاعمار) دا – عشان نخلي ليكم حاجة تعيدوا بيها.

· الشيء الاخطر من ذلك ان معظم اطوال لاعبي المريخ لا تتجاوز الـ 150 سنتمتر.

· القصر كاتلهم.

· ما في فريق بحقق ليه بطولة بهذه الاعمار وتلك القامات.

· اي فريق يلعب امام المريخ لو ركز على العكسيات والالعاب الهوائية ممكن يجعل المريخ يخسر باسهل السبل.

· في المريخ عمر بخيت واكرا وايمن سعيد وديديه وبلة جابر وامير كمال وشيبون..كلهم اصحاب قامات قصيرة.

· ولا يختلف عنهم بكري المدينة ومصعب عمر وكوفي كثيرا.

· الجماعة ديل كلهم اطوالهم تحت (سطح البحر).

· عشان كدا اي فريق يلعب امام المريخ يركز على الموضوع دا.

· دا انتوا ح تتعبوا معانا.

· شوفوا القامات الافريقية القوية في الهلال الشغيل ونزار حامد وصلاح الجزولي وفداسي واتير توماس ومساوي وعماد الصيني وعبداللطيف بويا ومكسيم ..(واللـه ما شاءاللـه).

· اسود بس.

· اسود تاكل النار.

· حتى كاريكا وبشه وجوليام اصحاب قامات مميزة.

· الفرق كبير بين الهلال والمريخ.

· عشان كدا – انتوا ح تتعبوا معانا شديد.

· …..

· ملحوظة : ح ندق ليكم تاني في النغمة دي.

هوامش

· بس ما ح نكتر ليكم في الكلام – عشان ما تصلحوا الامور.

· خليكم في قصركم دا.

· وكلام القصيّر ما بتسمع.

· من هسع بنقول ليكم ..عشان توضح ليكم الصورة.

· الجزائر تاني ح تنضربوا فيها.

· غارزيتو الكورة مرقت ليه من نفسو.

· زولكم قنع.

· السنة دي ما عندكم عيد.

· قبل العيد وبعد العيد …هزيمة.

· شايف موضوع (سيكافا) قرب.

· بكرة نراجع المواضيع دي كلها ان شاءاللـه في (من الغلاف للغلاف).

· اصبروا انتوا بس.

· العيد دا نحن ما بنفتوا ساكت.

· مريخابي قالوا ليه رمضان انتهى.

· قال ليهم واللـه العيد ذاتو انتهى مع هدف نزار حامد دا.

· ……………….

· عاجل : يا ضفر في العيد ما تتقلوا في (الخبيز) منتظرنكم ناس (المليون شهيد).