(سيلا) فترتك في المريخ ح تلعبها فقط في عمود صلاح ادريس

· لو سيلا كدا – كان على الاقل يكون بيلعب في (تتونهام)…او بالميت كدا هال سيتي

· تقول الهلال دا بيلعب (تنس)…يا ربي الهلال (المجموعات) البيلعب فيها دي …بمثل فيها (يوغندا)

· زحمنا صلاح ادريس

· بـ (120) مقال في عموده الصحفي عن (سيلا) وعن مميزات سيلا

· القُاعد في (الكنبة) لا عاوز ليه (شفتنة) – ولا تقعدوا تنظروا لينا ساكت..الموضوع دا ممكن موسى الزومة يقوم بيه

· عندما اعار فريق الاهلي شندي لاعبه (سيلا) الى فريق المريخ في آخر دقائق فترة التسجيلات…صلاح ادريس اعتبر ان هذا الامر ..من اجل الوطن.

· وهاك يا وطن.

· وكاسك يا وطن.

· والدور الوطني والاحساس بالوطن – والشعور بالمسؤولية والخروج من النفق.

· والنظرة الشاملة.

· والانبثاق الداخلي لمرايا الروح.

· والقضية العامة وما يمكن ان ينبثق في هذه الحالة.

· كلام كبير كدا.

· وان الاعارة ..اعارة (وطنية) لأن المريخ مشارك في بطولة الاندية الافريقية للابطال.

· والهم الوطني هو الذي اكمل اعارة سيلا.

· والنظرة العامة …من اجل الوطن والسودان هي التى جعلت الاهلي شندي يعير دكتور سيلا للمريخ.

· تقول الهلال دا بيلعب (تنس).

· يا ربي الهلال (المجموعات) البيلعب فيها دي …بمثل فيها (يوغندا).

· وزحمنا صلاح ادريس بـ (120) مقال في عموده الصحفي عن (سيلا) وعن مميزات سيلا.

· واخلاق سيلا.

· ومهارات سيلا.

· وتضحيات سيلا.

· وروعة سيلا.

· ومميزات سيلا.

· وفوائد سيلا.

· وروعة سيلا.

· بكرر ليكم روعة سيلا ..لأن صلاح ادريس اتكلم عنها مرتين.

· وسيلا الصنديد.

· وسيلا الخطير.

· وسيلا الصعب.

· وسيلا الشفت.

· ما شفنا ليه اي (شفتنة).

· القُعاد في (الكنبة) لا عاوز ليه (شفتنة) – ولا تقعدوا تنظروا لينا ساكت..الموضوع دا ممكن موسى الزومة يقوم بيه.

· الكلام الكتبو صلاح ادريس في سيلا ..مزمل ابوالقاسم في (رمضان عجب) ما قاعد يكتبو.

· بابكر سلك في (مجدي ام بدة) ما بقولو.

· سيلا الخطير.

· سيلا ما في زول متلو.

· سيلا ذو الاخلاق الرفيعة.

· سيلا ذو الاخلاق الحميدة.

· قربوا يطلعوه لينا (امام).

· الشيء شنو؟.

· الشيء (تحتمس الثالث).

· ونحن نشيل ونقول يا جماعة الكلام دا – في الزول دا …(معقولة) سيلا بالمواصافات دي.

· سيلا خطير كدا.

· لو سيلا كدا – كان على الاقل يكون بيلعب في (تتونهام).

· او بالميت كدا هال سيتي.

· وكتب صلاح ادريس ضمن سلسلته بتاعة (ليالي الحلمية) السيلية ان (سيلا) سوف يكون مكسبا كبيرا للمريخ وألمح رئيس نادي الهلال السابق الى ان (سيلا) سوف يشكل اضافة للمريخ.

· ونحن ونشيل ونقول كل ما نقرأ لينا حاجة عن سيلا : (دا سيلا).

· سيلا خطير كدا.

· وانتوا عارفين صلاح ادريس وقت يكون عاوز يرفع الشيء ..ما بتلفت.

· صلاح ادريس رفع لينا (سيلا) السماء ..رغم ان سيلا لم يشارك مع الاهلي شندي الفترة الماضية كلها.

· ولا شوط.

· ولا دخلوه في مباراة من اجل تأخير الزمن.

· من بداية الموسم لم يشارك سيلا في مباراة مع الاهلي شندي.

· قد يكون فريق الاهلي شندي اتخلص من (سيلا)..وارتاح من لاعب شغل ليه خانة بدون فايدة.

· ومن غير اي جدوى.

· والدليل على ذلك ان صلاح ادريس من فرحته اتكفل بصفقة (سيلا) للمريخ كليا.

· قالوا ليك حوافز المباريات وراتبه كله – كله متكفل بيه صلاح ادريس.

· قالوا ليك حق الامجاد بدفعو صلاح ادريس.

· بعد الكلام دا كلو ..والمميزات التى لا حصر لها ولا عدد …سيلا جاء قعد ساكت في المريخ.

· يرجعوا علاءالدين يوسف للدفاع …سيلا ما بيلعب.

· يطلعوا علاءالدين يوسف الذي تبعده (الاصابة)..يرجعوا سالمون عشان يلعب في الدفاع.

· وسيلا قاعد.

· وينو سيلا يا صلاح ادريس؟.

· هسع دا لاعب يعيروه الساعة اتناشر منتصف الليل ويكتبو عنو (120) عمود ويفشل في المشاركة في مباريات المريخ رغم معاناة دفاع المريخ.

· عاوزين نعرف سيلا وين؟.

· جايبنو في تسجيلات مايو الماضي ليه؟ ..وقت ما بشارك.

· نحن جوليام عندنا بشارك.

· واندرزينهو بشارك.

· ووليد الشعلة رغم انه غير مقيد افريقيا برضو قاعد يشارك مع الهلال.

· انتوا (سيلا) الذي ضمتوه للكشف الافريقي وينو؟.

· لماذا لا يشارك؟.

· عندما اصيب اندرزينهو وابعد عن المشاركة ..اعلام المريخ كلو قام.

· واعتبروا ان الاصابة هي ابعاد كلي لي (اندرزينهو).

· المريخاب نسوا (سيلا) وقعدوا يتكلموا عن اصابة اندرزينهو في معسكر تونس.

· زي كأنو (سيلا) جايبنو للترحيل.

· سجلوه عشان يسوق ليهم (الامجاد).

· يمكن المريخاب ما فارقة معاهم كتير ..طالما ان المرتب والحوافز والنثريات كلها بدفعها صلاح ادريس.

· لكن هذا يثبت ان تسجيل (سيلا) او اعارته من نادي الاهلي شندي لفريق المريخ كان ما عندو معنى.

· وان المريخ لن يستفيد من اللاعب طوال فترة الاعارة.

· ح يكون قاعد كدا.

· في مباراة المريخ الاخيرة امام الاهلي الخرطوم شارك (سيلا) لمدة عشر دقائق فقط.

· قالوا ليكم ندّم المريخاب على تسجيلاتهم.

· كلهم قالوا صلاح ادريس عملها في جمال الوالي.

· سيلا اتضح انه (نجاد) البوسني.

· نجاد آخر في المريخ.

· مدرب المريخ ومديره الفني لن يشرك (سيلا) في مباراة – غارزيتو شخصيتو قوية ..وما بقتنع ليكم بي (سيلا).

· عشان كدا – طوال فترة (سيلا) في المريخ سوف يلعب سيلا فقط في عمود صلاح ادريس.

· ح تشوفوه في عمود صلاح ادريس فقط.

· في الملعب والميدان ما تحلموا.

· ما تحلموا تشاهدوا (سيلا) في تشكيلة المريخ الاساسية.

· يمكن يقعد ليكم في (الكنبة).

· يقعد يمسك الساعة.

· ويمكن يشارك في مباراة بعامل الظروف ..لكن في كل الاحوال مشاركته سوف تكون خصما على المريخ.

· سيلا صلاح ادريس ..افياني آخر في المريخ.

· افياني مالو؟.

· انتوا قالوا ليكم (افياني) ساهل .عشان تقارنوه لينا بي (سيلا).

· ابدا يا جماعة المقارنة بين افياني وسيلا ..تتمثل في ان افياني وسيلا دخلوا كشوفات القمة في آخر اللحظات.

· اتذكر (افياني) دا نحن كنا منتظرنو لي (نص الليل).

· التسجيلات قربت تقفل.

· وصلاح ادريس كان وقتها رئيسا للهلال بيبشر بي (مفاجأة) داوية.

· كان بتكلم عن (قنبلة).

· عارفين (القنبلة) طلعت منو؟.

· القنبلة طلعت (افياني).

· اها انا من الايامات ديك – بقى ما عندي ثقة في (القنابل).

· من يقولوا ليك اللاعب دا (قنبلة) بتذكر (افياني).

· وبقنع ليك ظاهر وباطن من (القنبلة).

· هسع صلاح ادريس بنفس الطريقة التى قدم بها (افياني) للهلال قدم (سيلا) للمريخ.

· صلاح ادريس خلى تلحينو ..وقعد يكتب عن (سيلا).

· الايام الآن تثبت ان المريخ وهو في امس الحاجة للمدافعين بيرجع (سالمون) من خط الوسط ويرفض جهازه الفني اشراك (سيلا).

· الايام تثبت الآن ان (سيلا) دعاية اعلامية ساكت لصلاح ادريس.

· لاعب فقط بلعب في عمود صلاح ادريس.

· المريخ لن يستفيد من اللاعب حتى في مباريات كأس السودان.

· …………

· ملحوظة : غايتو يا سيلا لو استفدت من وقتك وفتحت ليك محل اتصالات يكون احسن ليك.

هوامش

· ما تقعد تخم الناس ساكت.

· ما تضيع وقت المريخاب في حاجة ما منها جدوى.

· الجدوى (سيلا) شن خبرو بيها؟.

· دا تلقوه لا بعرف (جدوى) ولا بعرف (كوبري النيل الازرق).

· ولا عندو وقت للحاجات دي.

· ولا فاضى.

· المريخاب عارفين السر دا.

· عارفنو.

· خلوه ..بكلموا بيهم مرة تانية.

· طول ما الموضوع (سر) ابقى اقوله ليه.

· احسن اسكت.

· بس بكرة المريخ سوف يلعب في الجزائر.

· بكرة الجمعة.

· عشان الموضوع يبقى ليكم واضح.

· نحن من برة في اول مباراة رجعنا لينا بي نقطة من امام مازمبي ..اخطر الاندية الافريقية واقواها في الوقت الحالي.

· نحن كنا بنلعب العصر.

· مباراة المريخ غدا منتصف الليل.

· مع ذلك ..المريخ ما ح ينستر بكرة.

· بنقول ليكم كدا – عشان ما تصدموا ساكت.

· ابقوا عارفين.

· عيدكم السنة دي ح يكون مسيخ.

· واحسن ليكم واحسن لي صحتكم ..بكرة ما تشوفوا المباراة.

· في كلام تاني.

· اصبروا بس.

· …………

· عاجل : بكرة مباراة الاتحاد الجزائري وبكري المدينة (المريخ وين هنا؟).