طالبة من مامون حميدة: غير جامعتنا ستمية جامعة فيها دشلمية زول قرر يمشي للدولة .. ليه التركيز الشديد علينا
كتبت طالبة من جامعة العلوم الطبية والتكنولوجيا (UMST) المشهورة بجامعة مامون حميدة ، مدافعة عن جامعتها بخصوص موضوع انضمام طلاب من الجامعة لداعش وذلك على حسابها بفيسبوك مايلي.
ديل افراد في نص مجتمع .. كانوا من جامعتنا او من غيرها .. و علي فكرة ما صغار و لا راسهم فاضي ناس واعيين و اخدو قررارهم انو يعيشو حياتهم كيف .. دي ما حاجة بتخص زول ..
وانت لو ما ملم بالموضوع من كل جهاته ما تتفلسف و تتنقنق و تاخد قرارات ما بتخصك .. بغض النظر عن اي شي ياخ عندك راي و شايف روحك انت الصح و الباقي غلط علم الشي ده لي روحك و اولادك بعدين ما تجو تتبلو فينا..
شنو بالنسبة للعاملين فيها ليبراليين ديل !! و حرية الرأي و بتاع دي ما حرية برضو .. و اصلا الشعب ده بائس جدا و بحب يلوك و يعجن و يسوط الامور مع بعضها .. في غير جامعتنا دي ستمية جامعة تانية و فيها دشلمية زول قرر يمشي للدولة دي و فيها المشو ليه التركيز الشديد علينا ..
(معليش لكن القمم مستهدفة ) .. و عن تجربتي الشخصية الجامعة اكتر من جامعة دي اكبر من انكم تلوكو و تعجنو فيها .. قدر ما اتكلم ما حاوفيها حقها ما بس بتديك اكاديميات هي بتبني شخصيتك برضو مهيئة من جميع النواحي كان اكاديمية كان ترفيهية كان ثقافية .. و اتحدا اي زول يجيب لي زول اتخرج مننا و قاعد عاطل .. ماف مااااف بنطلع ناس مؤسسين و الحمد لله ..
بس في شي بالنسبة للاستهتار الشديد ده ما بضر غير سيدو كلمة واحدة بس تقولا و وانت ما ماخد ليها بال تغطس حجرك في جهنم و انت ما عارف في شنو امسكو خشومكم دي عليكم بالله .. و شوفو ليكم موضوع تاني امسكو بيهو زمن ..
# خارج النص : مرارتي اتفقعت ..
# خارج النص شديد : فضل يومين بس ..
# جوه النص : بحبك يا جامعتي .. بحبك شديد يا باتشي .. الباتش المجنون شديد الحلو شديد .. بحب و بقدر اي استاذ مره علينا فيها .. بحبك يا عم جوزيف مسختا علينا اخر سمستر .. بحبكم يا برالمتي و يا سنايري واحد واحد .. و ممتنه جدا لاي شخصية عرفتها جوه الجامعة دي الاتعلمتو منكم ما هين .. شكراً جميلا و معليش شديد عل اللت و العجن الكتير .
بقلم: اواصر عيدروس
نقلاً من حسابها الرسمي بفيسبوك
دا شنو يا ناس النيلين ناقلين لينا السخافه بتاعت البت دي
خت فى بالك العيال ديل خطرين و ما عايزين نحتك معاهم عندنا عيال بنربي فيهم ! معليش مافى زول قصدو يزعلكم !
الجامعه دى ياتطلع سطلنجى يابتاع السنجه فى الرنجه ياداعشى غايتو محن
دى واحده هايفه
لو واحد بقرا فى هارفارد ما كان قال كلامك ده .. الرمم مستهدفه
معقولة دي تكون طالبة جامعية وللعلوم الطبية كمان .. أنا أفتكرت حبوبتي الله يرحمها هي كاتبة المقال .. وهذا نموذج من خريجي جامعة حميده .. الله المستعان .
وأنا افتكرت انو دا واحد شماسي الكاتب المقال دا من كترة الألفاظ الخارجة !!!
عالم هايفة جنس هيافة … ديل بدفعو للواحد 150 مليون في السنة حيطلعو كيف؟؟؟
الغلبتو بنسبتو يجيبها بقروشو!!!
البت تكلمت معاكم بالدارجية السودانية وكلامها جميل وبسيط لانها تخاطب البسطاء من الناس بدون تعالى
وشكرا يا دكتورة
شي عجيب وحميده القواد وزير الفساد
قالت قمم اسلوب ركيك ومابتعرف تكتب
ديل الناس البدخلو بالقروش بس …
اقول ليها سجم امك الراجياك
اللهم اني صائم .
اقتباس (الرمم مستهدفه) عجبية بتاعة راندوك …دي مسطولة بجد ….. يا ما في السواهي دواهي…. الي اين تقودنا هذه الجامعة ومامونها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ظ
لوكنتي شاطرة وقمة كنتي دخلت طب الخرطوم وبي حقك يااواصر السجم وبعدين اديتينني إحساس انك بتدرسي في أكسفورد
قالت اااي زول من جامعتنا اتخرج اشتغل. ما كلكم واسطات في واسطات. كرهتونا السودان
مامون حميدة وراهو دائما مصائب مرة دكتور ابوسن مره ضفاضع مره داعش مره بنتو عامله عرس غريب
و اصلا الشعب ده بائس جدا و بحب يلوك و يعجن و يسوط الامور مع بعضها ..
بالله شوف جنس الكلام البتكتب فيهو البت دى … قبل كده قلنا مامون حميدة متعالى ونرجسى والظاهر أنو بيتقل هذه النرجسية والتعالى لطلابه … شعب بائس يالبت ال………..
معذوره البنيه .. شكسيها شتت للبغدادى .. وخلاها تلت وتعجن في المامون حمادى ..
دي بت هايفه وفارغة و للاسف الكلمات والالفاظ المستخدمه في المقال لايمكن ان نقول عنها كلمات او الفاظ انما هي نوع من انواع المصطلحات التي يستخدمه الشماسه في الشوارع
( الباتش المجنون شديد الحلو شديد ) ههههههه
(غير جامعتنا دي ستمية جامعة تانية و فيها دشلمية زول قرر يمشي للدولة دي) بالله عليكم دا اسلوب ؟؟ الله يرحم اللغه فى السودان
بالنسبة لي حب الجاااامعااات اي زووول بحن جااامعتو وبقدرها وبشوووفوا احسن جاااامعه
اسلووووب الكتااابة واللغة باللغة العااامية هو الخلااااانا نفهم المقااال ونحس بي الداااايره تقووول الطااالبة
بس في تعليق بسيط :
ماافي حاااجه اسمها الطلاااب ديل واااعييييين فاااااهمين نتيجه عمااايلهم تقووولي شنو للابااااء والامهاااات الربوووا وكبرووا ودخلوووا اولاااادهم الجااامعه جزااااتهم انو في النهااايه اولااادهم ينضموا لي تنظيم ارهااابي داااعشي متطرف
للاسف التعليقات الموجوة بتدل انو احنا شعب تحت الحضيض زاتو … والله المستعان …. ما تشتغلي بكلامهم يا دكتورة وبتمنى ليكي كل التوفيق ان شاء الله
تسلم يدك يا اواصر ،، ابدا ما كان غالبها تكتب ليكم باللغة العربية الفصحى لكن اختارت تكتب بلغة بسيطة توصل رسالتها بأسلوب لا يمل منه ،، القارئ الواعي هو البقرأ الرسالة والمغزى الوراء السطور
كل التعليقات بتوضح مدى حقد المجتمع على طلبة جامعة العلوم الطبية..
يعني عشان شوية ناس طايشة مشت داعش حتحكمو على جامعة كاملة و طلابها
أي ذنب إقترفوه بقية الطلاب، عليكم الله أرحمو نفسكم و كل زول يخليه في حاله.. كفاية تشويه في صورة الطلاب و الناس البتقول اي زول في مامون بدفع ١٥٠ مليون..انت جاهل دا السعر للسنة الدراسية ٢٠١٥-٢٠١٦.. يعني انا واحد من الناس حتخرج حسه و كنت بدفع في السنة ٥ مليون
و ابوي زول على قدر حاله ولا رجل أعمال ولا ملياردير، لو حكمنا على كل مجتمع او مجموعة ناس بي شخص او شخصين يبقى على الدنيا السلام..
اساسا انتو كلكم م عندكم موضوع.. وحسنو اسلوبكم في الكلام بعدين علقو.. وهي اتكلمت بالطريقة دي عشان الزيكم يفهم وعشان دي اللغة الانتو بتفهموها.. م كان غالبها انها تتكلم باللغة العربية الفسحى بس م كنتو ح تفهمو.. لانو معظمكم اميين وعاطلين ونايمين في البيت وبتشتمو في مامون والجامعة الانتو م طايلينها دي.. ومهما قلتو وعملتو برضو ح تفضل العلوم الطبية في القمة ” والقمم مستهدفة”
انت بتتكلم عن طب الخرطوم ههههههههه.. والله قديم شديد انت من زمن جامعة الخرطوم ياخ.. والناس البقولو انهم بشتغلو بالواسطات.. م واسطات بس لانو كل المؤسسات واثقين من انو طلبة مامون ناس مؤسسين وحتى لو بدخلو بالقروش في النهاية بيدرسو احسن دراسة وبتعلمو افضل تعليم..
مممممم .. بسم الله نبدا
اولا :النيلين اخدت البوست النشرته اواصر في صفحتها الشخصيه منوغير ما تاخد اذنها ..وهو بوست في صفختها في الفيسبوك اي زول بيختار الاسلوب البعبر عنه ،،
حسي لو كان كتبت البوست بالانجليزي كانو الناس قالوا شوفوا بالله البت دي بتقرا في مامون وجايه تترطن لينا بالانجليزي ..
اسلوب الرد ..والتعاطي مع البوست بيوضح السطحيه الي فيها الناس.
ثانيا: رده الفعل اتجاه الحدث او بالاصح الزوبعه الحاصله دي هي كالاتي
اي زول عنده مشكله مع مامون ختاها في الطلبه ..اي زول عنده مشكله مع داعش لقاها فرصه
اي زول عندو عقد من التعليم الخاص ..اي زول عنده عقد مع ابناء دول المهجر ..اي زول عندو عقد مع اسلوب حيات او طريقه لبس ناس معينه ،، نوضح حاجه (عقققققد الناس ما مسؤوليتم)
ردات الفعل كانت تنافي تماما المنطق والعقل وكلها خربشات ناس ما عندها درايه تامه بالموضوع
حاااجه اخيره:
الحصل والحاصل ده ما بيمس بس طلبه الجامعه ديل بس ..بيمس اي زول فينا ..دي زي الوباء المتفشي في المجتمع يفضل الناس تتعامل معاه بحكمه وعقلانيه ..والليله الموضوع ما بهمك وضحك واستهتار باسر الطلبه المشو ..،بكره جوه بيتك ..
والله يهدي من يشاء الى صراط مستقيم
لما (((((الدكتور))))) قال عن مامون حميد ان ردو لاهل الطلاب السافرو كان (احسن من ما يطلعو ليكم (((صعاليك)))) دا كان اسلوب وله بس بنشوف البخدم مصالحنا و معتقداتنا و الحق يتكتم!!!!!!
حسبى الله ونعم الوكيل!
ولما (((الدكتور))) قال عن مامون حميده ان ردو لاهل الطلاب السافرو كان ( احسن من ما يطلعو ليكم ((((صعاليك)))) دا كان اسلوب!؟!؟ وله بنعاين للكلام البخدم صالحنا ومعتقداتنا والحق يتكتم!!!!
حسبي الله ونعم الوكيل!
والله المقال (ولو إنه مسروق) عادي وبيعبر بإحترام عن وجهة نظر لكن كالعادة تأتي بعد التعاليق بما لا يشتهي الأدب
اللهم أشفي مريضنا وعلم جاهلنا… قولوا آمين يا أخوانا
تسلم ايدك.. وسيبك من الحاقدين.. البتكلم عن ال 150 مليون دي رسوم جديدة و لسه ما اتدفعت.. عشان تعرف انك ما عارف حاجه وبتتكلم ساي.. وبعدين انت دافعا من جيبك؟ ناس غريبه جد!
طبعاً والله ابدعتو و ماا خليتو شي هههههههه جنس حقد لكن.. احب اقول ليكم بس كلام بسيط.. الما بتلحقو جدعو و شكراً على حسناتكم .. جزاكم الله خيييير.
اول … الاداكم الاذن تنشرو منو ؟؟
تانيا احترام مشاعر واراء الغير واجب سودانى …. وانتو ماشاء الله عليكم من يومكم بتكروهو الواجبات
تالتا ديل ناس اجتهدو وشغلو عقولهم