فكّ (بيرك).!

* ناس كتيرين جداً هاجموني خلال الأيام الفاتت بي سبب سلسلة المقالات دي.
* مشكلتهم الرئيسية كانت في التناول الساخر لعدد من الفنانين فيها.
* في قراء-بحبهم جداً- اتصلوا علي وقالوا لي: (يادندش.. ياخي الطريقة الدارجية دي ماحلوة في الكتابة).
* وفي قراء-ما بحبهم- اتصلوا علي وقالوا لي: (إنت بتتريق على الناس بالطريقة دي ليه..؟… إنت قايل روحك منو).؟
* وبين ديل.. وبين ديلك.
* الليلة حنكتب عن (فك البيرك).!
* طبعاً أصعب حاجة في الدنيا دي لما واحد (يفك منك البيرك).
* سواء من عربيتك أو من (شخصيتك).!
* و(فك بيرك الشخصية) دا كمان.. حكايتو حكاية.!
* قبل كدا في واحدة (فكتّ بيرك شخصية راجلها) ومن اليوم داك هي صاحبة الكلمة في البيت.
* تقول يمين.. يمين.!.. تقول شمال.. شمال.!
* كيف ما تتحكم في البيت وهي قبل كدا (فاكة ليها بيرك).؟
* مرة و(الرجال ورا).
* بالمناسبة.. برضو في (بيرك) بتاع فنانين.!
* لكن بختلف شوية عن (البيارك) البنعرفها كلنا.
* (بيرك الفنان) دا لما يتفكا.. عينك ما تشوف إلا النور.
* أما الأخطر.
* لما الفنان ذاااااتو براهو (يفك البيرك).!
* خصوصاً.. لو (قابض عربون).!
شربكة:
* بالمناسبة.. في عوالم العشاق برضو في (فك بيرك).. ودا بيحصل أول ما البت تفتح خشمها وتقول للولد: (جاي البيت متين).!
شربكة ونص:
* يا جماعة.. آخر مرة فكيتوا فيها (بيرك) كانت متين..؟
شربكة ونص وخمسة:
* أنا شخصياً الأيامات دي (فاكي بيرك) من برنامج (أغاني وأغاني).!