غارزيتو كلامو بقى كتير

طريقتو كدا…فرنسي ورأسو قوي…رأسو زي الحجر – زي الزول النازل آخر محطة
الشيء العاوز اقوله ليكم يا مريخاب ..يا شيلوا غارزيتو من منصبه – يا كمان نفذوا ليه طلباته
غارزيتو طبعا يشوف العمى ما يشوف (محسن سيد)..العلاقة بيناهم سلام ما فيها
من هسع سجلوا ليكم اربعة لاعبين من مريخ الفاشر – عشان يشتغلوا (حجازين) بين محسن وغارزيتو
• الزول وقت يكون عاوز يتخلص ليه من زول – بقوم بدون ما يشعر يقول ليك : (الزول دا كلامو بقى كتير).
• وكأنو (الكلام الكتير) سبب ومبرر كافي للتخلص من الزول الكلامو كتير.
• وهو كأنو سبب مقنع لانهاء العلاقة واي واحد يمشي ليه في طريق.
• الزول وقت يكبر – كلامو بيبقى كتير.
• ووقت الزول يكون فاضي وما عندو شغلة – كلامو بيبقى كتير.
• الواحد يكون خاطب ليه واحدة سبع سنوات.
• صابر عليها سبع سنوات.
• نازل وطالع معاها.
• يجيب ليها في (الهدايا) ..ويرسل ليها في (الرصيد).
• الجلاكسي دا جابو ليها.
• وما خلى ليه شارع نيل.
• سبع سنوات ما قادر يقول حاجة.
• ولا كلمة.
• لمن يفسخ الخطوبة ..والناس ياكلو لحمو ويسألوه من سبب فسخ الخطوبة – بقوم يقول ليهم الزولة دي كلامها بقى كتير.
• كلامها كتير عرفتها بعد سبع سنوات.
• وقت كنا بنقول ليك – وبنحذر فيك – ما كنت بتقول دي (حسادة) منكم ساكت.
• وممكن الراجل يرحّل زوجتو نص الليل ويوديها لبيت ابوها مجرجرة ليها سبعة عيال.
• ولمن الناس يسألوه ويقولوا ليه عملت كدا ليه؟.
• بقول ليهم الزولة دا كلامها كتير.
• كلامها كتير – اكتشفتها يا ود الناس بعد ما جبت ليك سبعة عيال.
• هسع وبناء على الكلام الفوق دا – والنظريات البقول ليكم فيها دي لو فيها فائدة بنقول ليكم غارزيتو كلامو بقى كتير.
• عشان اختصر ليكم الموضوع.
• واريح ليكم المريخاب.
• غارزيتو اصلو ما بعرف يعيش في اجواء مثالية ..(رغم من اننا بنقول دا من حقو).
• طريقتو كدا.
• فرنسي ورأسو قوي.
• رأسو زي الحجر – زي الزول النازل اخر محطة.
• ما بتفاهم.
• وقبل ما نفتح في غارزيتو..بنقول ان اعلام المريخ ما كان يملك انتقاد غارزيتو والاعتراض عليه قبل ان يظهر ذلك من جمال الوالي الذي امتعض من ما يفعله غارزيتو.
• جمال الوالي اجتمع بي غارزيتو ..وقال ليه اكرا قاعد وكوفي قاعد.
• كان ترضى وكان تزعل.
• بل ان جمال الوالي ذهب ابعد من ذلك وقال لي غارزيتو (محسن سيد) ذاتو يقعد.
• يعني شنو؟.
• يعني قطعها معاه للاخير.
• غارزيتو طبعا يشوف العمى ما يشوف (محسن سيد)..العلاقة بينتاهم سلام ما فيها.
• الشيء العاوز اقوله ليكم يا مريخاب ..يا شيلوا غارزيتو من منصبه – يا كمان نفذوا ليه طلباته.
• الزول دا لو ما نفذتو ليه طلباته ممكن يعمل ليكم (كوارث) والبدفع الثمن في النهاية المريخ.
• يا شيلوه.
• يا اعملوا ليه الحاجة العاوزها.
• كلام واضح وصريح.
• يعني مثلا ..لو قال ليكم ما عاوز محسن سيد ..وقلتوا ليه محسن دا إلّا يقعد …غارزيتو دا ممكن كل يوم يعمل ليكم مشكلة مع محسن سيد.
• ح يجيب ليكم (فلايت) من المشاكل.
• والحكاية كان تكونوا عارفين ح تنعكس بصورة سلبية على المريخ.
• ما تقعدوا تطيروا لي في عيونكم كدا متل يوم الاحد الصباح.
• كل يوم بيدور ليه مشكلة مع محسن سيد.
• بتفالقو عديل كدا.
• لو ما عاوزين تشيلوا محسن سيد شيلوا غارزيتو.
• ولو خليتوا غارزيتو مع محسن سيد …جهزوا ليكم (حجازين).
• من هسع سجلوا ليكم اربعة لاعبين من مريخ الفاشر – عشان يشتغلوا (حجازين).
• تاني ما في تمرين ح يكتمل.
• غارزيتو لو قال ما عاوز اكرا وكوفي – يبقى ما عاوز اكرا وكوفي.
• ولا بقتنع ليكم.
• لا اكرا ولا كوفي – ما تقعدوا تشكروا فيهم ساكت.
• كان تخلوهم كدا – او تجنسوهم.
• عليكم اللـه انتوا لو ما بتخجلوا – هو قال ليكم ما نافعين ..تقوموا تجنسوهم ليه.
• يعني نحن الحاجة الما نافعة بنجنسها – وبنمنحها الجنسية السودانية.
• زي كأنو الجنسية دي خرابة.
• قال ليهم اكرا وكوفي ما بنفعوا ..قالوا ليه خلاص بنجنسهم ونمنحهم الجنسية السودانية.
• الجنسية السودانية هملة.
• الجنسية السودانية لعبة.
• الجنسية السودانية دي بتمنحوها ليهم من بيت ابوكم.
• ممكن غارزيتو يدخل في تجارب ويقدم ليكم مباريات عشان يثبت ليكم انو ما في جدوى من كوفي واكرا.
• بدخل ليكم كوفي واكرا في (احراجات) لا نهاية لها.
• وبرضو سوف تكون الخسارة على المريخ.
• ما ح تقدروا تفرضو عليه لاعب هو ما عاوزو.
• الزول دا صعب ورأسو قوي.
• اسألونا منو نحن.
• عارفنو.
• ومجربنو قدر كدا.
• غارزيتو اول حاجة قصد برهان.
• قال ما عاوز برهان.
• يا انا يا برهان.
• المجلس ضحى ليك بي برهان.
• برهان مسكين ما زي محسن ..ما بقول حاجة.
• طبعا اول حاجة غارزيتو سفّر ليك (برهان تية) برة البلد.
• قال ليه تمشي تراقب سيكافا.
• برهان سافر ..جاء راجع لقى نفسو شالوه برة.
• بعد برهان …غارزيتو قبل ليك على (تراوري).
• قال ما عاوز تراوري.
• كيف الكلام دا يا زول.
• قال يا انا يا تراوري.
• شالوا ليه تراوري.
• واللـه ما قصرت معانا.
• بعد كدا – قبل ليك على مدرب الحراس حكيم.
• مدرب الحراس ما عندو اي ذنب.
• غارزيتو قال ما عاوزو.
• شيلوه برة.
• شالوه برة.
• غارزيتو قعد يتلفت ..لقى ليك محسن سيد واقف.
• قال ليهم بس – انا ما عاوز محسن سيد.
• شيلوا لي محسن سيد.
• قالوا ليه كترتها يا كوتش.
• غارزيتو قال ليهم كترتها شنو؟.
• اكرا وكوفي ذاتو ما عاوزهم.
• الشيء الغريب ..غارزيتو مع حركاتو دي جاب ليهم (عنبر عظام).
• قال ليهم سجلوا لي محترفين ..اصغر واحد فيهم عمرو (30) سنة.
• وكلهم بشكوا من اصابات خطيرة.
• الزول دا قصدو شنو؟.
• الحركات دي غارزيتو وقت كان في الهلال ما كان بعملها.
• غارزيتو ..الظاهر عليه عندو خطة بطبق فيها.
• خلاص الزول دا سيطر على الاوضاع.
• وقال احسن يتخارج قبل المجموعات.
• الجزائرين ديل لا بقدر عليهم ولا حاجة.
• غارزيتو اذا استمر في المريخ – اراهن ليكم منذ الآن ان مشكلته القادمة سوف تكون مع بكري المدينة.
• بكري المدينة ح يوقفو غارزيتو قبل (لوزان).
• اتذكروا الكلام دا.
• السيناريو القادم سيناريو يستهدف فيه غارزيتو بكري المدينة.
• نحن ما عاوزين نشمت في المريخاب.
• وما عاوزين نقول حاجة.
• لكن بس بنقول يا مريخاب دا حقنا.
• غارزيتو خلص لينا حقنا فيكم.
• وراكم النجوم عز الضهر.
• ولسه ح تشوفوا (عجائب) من غارزيتو.
• هناك الكثير من السيناريوهات المرسومة.
• سوف ينفذها غارزيتو بالحرف.
• انتظروا وشوفوا.
• ………..
• ملحوظة : غارزيتو مشي ياتو فريق وما عمل فيه مشاكل.
هوامش
• مشاكل المريخ ولعت قبل المجموعات.
• قلنا ماشين نعسكر في تونس.
• قالوا يمشوا يعسكروا هناك.
• مازدا ذاتو قال نتلاقى في تونس.
• التسجيلات تبقى لها خمسة ايام.
• او قل اربعة.
• الليلة اليوم انتهى.
• ولسه موضوع المحترفين ما اتحسم.
• في طيارات.
• ووكلاء لاعبين.
• واندية يفترض مفاوضتها.
• وكشف طبي.
• اللـه يستر من ملف المحترفين.
• لو فشل المجلس في انجاز ثلاثة صفقات او اربعة صفقات ..انجزوا لينا صفقة واحدة لكن تكون على مستوى.
• اذا لقيتوا جهودكم يمكن ان تفرق ساكت – والزمن ما بيسعكم …اتجهوا لانجاز صفقة واحدة على مستوى.
• الوقت ما في صالحكم.
• الاتحاد العام ذاتو عمل ليه فترة تسجيلات زي (الفسحة).
• ما بتعمل اي حاجة.
• الحمدلله المجلس انجز ملف وليد الشعلة بنجاح تام.
• وليد الشعلة مكسب كبير للهلال.
• اي محترف تجيبوه كانتقال حر ما بكون نافع.
• محترف عاطل لا بنجح ولا حاجة.
• محترف من الخليج اقنعوا من خير فيه.
• …………
• عاجل : في الانتظار.
Hamed Hamza
15/05/2015 05:10 صباحاً
Hamed Hamza
غارزيتو كلامو بقى كتير
طريقتو كدا…فرنسي ورأسو قوي…رأسو زي الحجر – زي الزول النازل آخر محطة
الشيء العاوز اقوله ليكم يا مريخاب ..يا شيلوا غارزيتو من منصبه – يا كمان نفذوا ليه طلباته
غارزيتو طبعا يشوف العمى ما يشوف (محسن سيد)..العلاقة بيناهم سلام ما فيها
من هسع سجلوا ليكم اربعة لاعبين من مريخ الفاشر – عشان يشتغلوا (حجازين) بين محسن وغارزيتو
• الزول وقت يكون عاوز يتخلص ليه من زول – بقوم بدون ما يشعر يقول ليك : (الزول دا كلامو بقى كتير).
• وكأنو (الكلام الكتير) سبب ومبرر كافي للتخلص من الزول الكلامو كتير.
• وهو كأنو سبب مقنع لانهاء العلاقة واي واحد يمشي ليه في طريق.
• الزول وقت يكبر – كلامو بيبقى كتير.
• ووقت الزول يكون فاضي وما عندو شغلة – كلامو بيبقى كتير.
• الواحد يكون خاطب ليه واحدة سبع سنوات.
• صابر عليها سبع سنوات.
• نازل وطالع معاها.
• يجيب ليها في (الهدايا) ..ويرسل ليها في (الرصيد).
• الجلاكسي دا جابو ليها.
• وما خلى ليه شارع نيل.
• سبع سنوات ما قادر يقول حاجة.
• ولا كلمة.
• لمن يفسخ الخطوبة ..والناس ياكلو لحمو ويسألوه من سبب فسخ الخطوبة – بقوم يقول ليهم الزولة دي كلامها بقى كتير.
• كلامها كتير عرفتها بعد سبع سنوات.
• وقت كنا بنقول ليك – وبنحذر فيك – ما كنت بتقول دي (حسادة) منكم ساكت.
• وممكن الراجل يرحّل زوجتو نص الليل ويوديها لبيت ابوها مجرجرة ليها سبعة عيال.
• ولمن الناس يسألوه ويقولوا ليه عملت كدا ليه؟.
• بقول ليهم الزولة دا كلامها كتير.
• كلامها كتير – اكتشفتها يا ود الناس بعد ما جبت ليك سبعة عيال.
• هسع وبناء على الكلام الفوق دا – والنظريات البقول ليكم فيها دي لو فيها فائدة بنقول ليكم غارزيتو كلامو بقى كتير.
• عشان اختصر ليكم الموضوع.
• واريح ليكم المريخاب.
• غارزيتو اصلو ما بعرف يعيش في اجواء مثالية ..(رغم من اننا بنقول دا من حقو).
• طريقتو كدا.
• فرنسي ورأسو قوي.
• رأسو زي الحجر – زي الزول النازل اخر محطة.
• ما بتفاهم.
• وقبل ما نفتح في غارزيتو..بنقول ان اعلام المريخ ما كان يملك انتقاد غارزيتو والاعتراض عليه قبل ان يظهر ذلك من جمال الوالي الذي امتعض من ما يفعله غارزيتو.
• جمال الوالي اجتمع بي غارزيتو ..وقال ليه اكرا قاعد وكوفي قاعد.
• كان ترضى وكان تزعل.
• بل ان جمال الوالي ذهب ابعد من ذلك وقال لي غارزيتو (محسن سيد) ذاتو يقعد.
• يعني شنو؟.
• يعني قطعها معاه للاخير.
• غارزيتو طبعا يشوف العمى ما يشوف (محسن سيد)..العلاقة بينتاهم سلام ما فيها.
• الشيء العاوز اقوله ليكم يا مريخاب ..يا شيلوا غارزيتو من منصبه – يا كمان نفذوا ليه طلباته.
• الزول دا لو ما نفذتو ليه طلباته ممكن يعمل ليكم (كوارث) والبدفع الثمن في النهاية المريخ.
• يا شيلوه.
• يا اعملوا ليه الحاجة العاوزها.
• كلام واضح وصريح.
• يعني مثلا ..لو قال ليكم ما عاوز محسن سيد ..وقلتوا ليه محسن دا إلّا يقعد …غارزيتو دا ممكن كل يوم يعمل ليكم مشكلة مع محسن سيد.
• ح يجيب ليكم (فلايت) من المشاكل.
• والحكاية كان تكونوا عارفين ح تنعكس بصورة سلبية على المريخ.
• ما تقعدوا تطيروا لي في عيونكم كدا متل يوم الاحد الصباح.
• كل يوم بيدور ليه مشكلة مع محسن سيد.
• بتفالقو عديل كدا.
• لو ما عاوزين تشيلوا محسن سيد شيلوا غارزيتو.
• ولو خليتوا غارزيتو مع محسن سيد …جهزوا ليكم (حجازين).
• من هسع سجلوا ليكم اربعة لاعبين من مريخ الفاشر – عشان يشتغلوا (حجازين).
• تاني ما في تمرين ح يكتمل.
• غارزيتو لو قال ما عاوز اكرا وكوفي – يبقى ما عاوز اكرا وكوفي.
• ولا بقتنع ليكم.
• لا اكرا ولا كوفي – ما تقعدوا تشكروا فيهم ساكت.
• كان تخلوهم كدا – او تجنسوهم.
• عليكم اللـه انتوا لو ما بتخجلوا – هو قال ليكم ما نافعين ..تقوموا تجنسوهم ليه.
• يعني نحن الحاجة الما نافعة بنجنسها – وبنمنحها الجنسية السودانية.
• زي كأنو الجنسية دي خرابة.
• قال ليهم اكرا وكوفي ما بنفعوا ..قالوا ليه خلاص بنجنسهم ونمنحهم الجنسية السودانية.
• الجنسية السودانية هملة.
• الجنسية السودانية لعبة.
• الجنسية السودانية دي بتمنحوها ليهم من بيت ابوكم.
• ممكن غارزيتو يدخل في تجارب ويقدم ليكم مباريات عشان يثبت ليكم انو ما في جدوى من كوفي واكرا.
• بدخل ليكم كوفي واكرا في (احراجات) لا نهاية لها.
• وبرضو سوف تكون الخسارة على المريخ.
• ما ح تقدروا تفرضو عليه لاعب هو ما عاوزو.
• الزول دا صعب ورأسو قوي.
• اسألونا منو نحن.
• عارفنو.
• ومجربنو قدر كدا.
• غارزيتو اول حاجة قصد برهان.
• قال ما عاوز برهان.
• يا انا يا برهان.
• المجلس ضحى ليك بي برهان.
• برهان مسكين ما زي محسن ..ما بقول حاجة.
• طبعا اول حاجة غارزيتو سفّر ليك (برهان تية) برة البلد.
• قال ليه تمشي تراقب سيكافا.
• برهان سافر ..جاء راجع لقى نفسو شالوه برة.
• بعد برهان …غارزيتو قبل ليك على (تراوري).
• قال ما عاوز تراوري.
• كيف الكلام دا يا زول.
• قال يا انا يا تراوري.
• شالوا ليه تراوري.
• واللـه ما قصرت معانا.
• بعد كدا – قبل ليك على مدرب الحراس حكيم.
• مدرب الحراس ما عندو اي ذنب.
• غارزيتو قال ما عاوزو.
• شيلوه برة.
• شالوه برة.
• غارزيتو قعد يتلفت ..لقى ليك محسن سيد واقف.
• قال ليهم بس – انا ما عاوز محسن سيد.
• شيلوا لي محسن سيد.
• قالوا ليه كترتها يا كوتش.
• غارزيتو قال ليهم كترتها شنو؟.
• اكرا وكوفي ذاتو ما عاوزهم.
• الشيء الغريب ..غارزيتو مع حركاتو دي جاب ليهم (عنبر عظام).
• قال ليهم سجلوا لي محترفين ..اصغر واحد فيهم عمرو (30) سنة.
• وكلهم بشكوا من اصابات خطيرة.
• الزول دا قصدو شنو؟.
• الحركات دي غارزيتو وقت كان في الهلال ما كان بعملها.
• غارزيتو ..الظاهر عليه عندو خطة بطبق فيها.
• خلاص الزول دا سيطر على الاوضاع.
• وقال احسن يتخارج قبل المجموعات.
• الجزائرين ديل لا بقدر عليهم ولا حاجة.
• غارزيتو اذا استمر في المريخ – اراهن ليكم منذ الآن ان مشكلته القادمة سوف تكون مع بكري المدينة.
• بكري المدينة ح يوقفو غارزيتو قبل (لوزان).
• اتذكروا الكلام دا.
• السيناريو القادم سيناريو يستهدف فيه غارزيتو بكري المدينة.
• نحن ما عاوزين نشمت في المريخاب.
• وما عاوزين نقول حاجة.
• لكن بس بنقول يا مريخاب دا حقنا.
• غارزيتو خلص لينا حقنا فيكم.
• وراكم النجوم عز الضهر.
• ولسه ح تشوفوا (عجائب) من غارزيتو.
• هناك الكثير من السيناريوهات المرسومة.
• سوف ينفذها غارزيتو بالحرف.
• انتظروا وشوفوا.
• ………..
• ملحوظة : غارزيتو مشي ياتو فريق وما عمل فيه مشاكل.
• هوامش
• مشاكل المريخ ولعت قبل المجموعات.
• قلنا ماشين نعسكر في تونس.
• قالوا يمشوا يعسكروا هناك.
• مازدا ذاتو قال نتلاقى في تونس.
• التسجيلات تبقى لها خمسة ايام.
• او قل اربعة.
• الليلة اليوم انتهى.
• ولسه موضوع المحترفين ما اتحسم.
• في طيارات.
• ووكلاء لاعبين.
• واندية يفترض مفاوضتها.
• وكشف طبي.
• اللـه يستر من ملف المحترفين.
• لو فشل المجلس في انجاز ثلاثة صفقات او اربعة صفقات ..انجزوا لينا صفقة واحدة لكن تكون على مستوى.
• اذا لقيتوا جهودكم يمكن ان تفرق ساكت – والزمن ما بيسعكم …اتجهوا لانجاز صفقة واحدة على مستوى.
• الوقت ما في صالحكم.
• الاتحاد العام ذاتو عمل ليه فترة تسجيلات زي (الفسحة).
• ما بتعمل اي حاجة.
• الحمدلله المجلس انجز ملف وليد الشعلة بنجاح تام.
• وليد الشعلة مكسب كبير للهلال.
• اي محترف تجيبوه كانتقال حر ما بكون نافع.
• محترف عاطل لا بنجح ولا حاجة.
• محترف من الخليج اقنعوا من خير فيه.
• …………
• عاجل : في الانتظار.