أحلام وتفاسير

الحلم :
حلمت يا أستاذ بانني اسير عاريا (كما ولدتني أمي) في برندات شارع الجمهورية وأنا أحمل في يدي كوب مثلج من عصير الليمون !
التفسير :
سير الإنسان عارياً يعني أنه مقبل على درجه عظيمة من (الفلس) ، الثلج في العصير مؤشر لتقبلك الأمر بروح رياضية أما كونو العصير (ليمون) فهذا يعني بأنك سوف تبلغ مرحلة عصية من (القرف) والطمام فخليك مستعد.

الحلم :
حلمت إني واقف في موقف (الشهداء) راجي المواصلات وفجأة يجي شاب وكف يختف الموبايل الجلاكسي بتاعي ويجري ويجري لحدت ما إختفي عن الأنظار علما بأنو الموبايل بتاعي تلاتين عشرة !
التفسير :
إنتظار المواصلات تفسيره الصبر وشدة الإحتمال ، أما ختف الحرامي للموبايل وجريه دون أن يقبض فعادي شفتا ليك الزمن ده حرامي بينقبض؟ أما كونو موبايلك تلاتين عشرة وما جلاكسي فأنصحك بفحص الدم إحتمال أنيميا وكده
الحلم :
رأيت في المنام أنني أسير بينما المطر ينهمر بشده فيغسل الشوارع وتنساب المياه نحو فتحات في أطراف الشارع وبينما أنا كذلك إتجه شخص نحوي يحمل مايكرفون وإلى جانبه شخص يحمل كاميرا ظننت أنهما سوف يسألاني عن هذاه التجهيزات التي تمت للخريف فإذا بالمذيع يسألني عن رأيي في الإنتخابات فأفقت ..
التفسير :
من الواضح انك كنت تسير في شارع القصر (دون سواه) والحلم بان تسير في شارع القصر مقروناً بسؤال المذيع لك عن رائك في الإنتخابات يعني أنك سوف تترشح للرئاسة في الإنتخابات الجاية … ما تقول ليا ما بحصل لأنك زول مغمور والناس ما بتعرفك هسه الخمسطاشر الإترشحو ديل في زول بيعرفهم ؟
الحلم :
حلمت بأنني تزوجت وأنجبت عشرة من البنين والبنات علماً بأنني عاطل عن العمل مع إني خريج ليا عشره سنين
التفسير :
يخرب بيتك .. حلم تلاته دقئق تنجب فيهو عشرة أرواح ؟ تمشي من حتتك دي ديوان الزكاة وتقول ليهم الأستاذ قال ليكم أدوني من الخمسين ألف دولار الأديتوها لقناة (الضحي) عشان أكل نصف ديني لأنو الوضع شكلو بعد شوية ح يكون خارج السيطرة !
الحلم :
رأيت في المنام أنني اقود عربتي واسير في الطريق وعندما حاولت دخول أحد الشوارع إستوقفني شخص يرتدي ثياباً بيضاء وقال لي مبتسماً :
– يا عزيزي عد أدراجك هذا الشارع إتجاه واحد فلا تدخله !
التفسير :
كنتا ح أقول ليك ده (رجل مرور) من ملابسو (البيضاء دي) لكنو ما رجل مرور بدليل وقوفو في (أول الشارع) الإتجاه واحد !
الحلم :
حلمت بأنني أضع أمامي صحن (شية جمر) وقدامو صحن فيهو (خمسة) قرون بتاعت شطة خدرا ومعاهم رغيفة (سغيرووونه) قدر حبة البندول وأول ما جيت آكل لقيت (يد) جات من وراي شالت (قرن من قرون الشطة الخدرا) ودخلتو ليا في خشمي وقفلتو .. قمتا من سخانة الشطة صحيت !
التفسير :
صحن الشية يرمز للنعمة وللخير وكونو إنو الرغيفة قدر حبة البندول ده بيعني إنك ما ح تقدر تاكل منو وح ياكل منو الناس العندهم رغيف (كبار) والخمسة قرون شطه ديل وديهم لي (عالم تاني) يفسرهم ليك وكويس إنو اليد دخلت ليك القرن في خشمك !

الحلم :
حلمت بأنني قاعد (أعوم) في بحيرة من (الفول المصلح) شئ زيت سمسم وشئ جبنة وشئ شماااار .. وكل شوية البحيرة تجف … كل شوية البحيرة تجف .. لحدت ما فضل فيها (فولاية) واحدة قمتا شفتا ليا زول سمييين قاعد ليهو جوه عربية برادو جديدة مشيت عليهو قلتا ليهو :
– يا زول إنتا السحبتا الفول من (البحيرة ) دي دي؟
طوااالي قام قطع فيني كف وقال ليا :
– خلاس (الحاويات) عملت مفعولا !! – (وقمتا صحيت)
التفسير :
– ده حلم يا إبني غريب شوية … لكن كل الأقدر أقولو ليك إنو بعد صحن الفول المصلح بقى بي عشرة ألف قصة العوم و(التجدع) فيهو بتبقى صعبة بالنسبة ليك كمواطن (الجفاف) ، أما باقي (الحلم) فخلي (الزول بتاع الشطه) الفوق ده يسوقك معاهو !!!
كسرة :
– قال لي : رأيت فيما يرى النائم إنو واقف في كاونتر بنك قاعد أورد ليا في كميات من القروش لمن طلعتا من البنك لقيت واحد موقف ليهو حافلة وبيكورك : مكة نفر .. مكة نفر !
قلت ليهو : الحلم ده تفسيرو إنك ح تختلس قروش المصلحه وتعمل (تحلل) وتقوم الحج !!

– كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و