ود أبزهانة.. عاطل وأمو فرحانة

بالرغم من دخول اقتصاد البلد في جحر ضب.. وأن الضب يبدفر فيهو ما دايرو معاهو.. نجد أننا اجتماعيا نسعى سعيا حثيثا وراء البوبار.. ونمدد كرعينا برا من عناقريبنا.. دا للراقد فوق عنقريب.. أما بعضنا يكون متكرفس في بنبر وبرضو يمدد كرعيهو.. ولم نعمل بحرفية المثل (العندو القرش يحنن ضنب حصانو).. بقينا كلنا بدون فرز العندو القرش والما عندو يديّن نحنن ضنب أي حاجة تلاقينا.. والشاهد احتفاليات وحنة أطفال الروضة المتخرجين حديثا.. واحتفاليات وحنة شباب الجامعات المتخرجين ايضا.. شافع يكون داير يتخرج من الروضة يحننوهو.. وأمو تتحنن وخالاتو في بيتو اتلمن واتحنن واخواتو اتحنن.. ما عدا الأب المسكين.. زول يقول ليهو تعال حنن اصبعك، مافي.. كانت الحنة للرجال في غابر الازمان في حالتين الطهور.. والعرس.. يحننوهو للطهور.. ومن ثم تاني للعرس.. وتاني يشمها قدحة.. وأخاف أن تتمدد ثقافة الحنة لتشمل.. حنة الولادة للطفل لما يلدوهو.. ثم حنة السبوع للمولود.. ثم حنة الأربعين للام والمولود.. ثم حنة عيد الميلاد.. كل عام.. تخريج شافع أو شافعة من الروضة.. والاحتفال الإلزامي من رياض الأطفال.. للدعاية للروضة قبل كل شيء.. ويدفع ولي الأمر مبلغ وقدره.. للتجهيز للاحتفال.. دا غير مستلزمات الطفل الخريج.. عليكم الله هو البتخرجو من الجامعة قاعدين يسوو شنو؟.. قاعدين بلا شغل ولافين ساكت.. ويتخرجو وأهلهم يزغرتو.. وناس تبكي.. وناس تبوس.. وبعد يومين نلقاهم في الحلة باركين من ضل لي ضل.. والبشتغل فيهم، خريج طب تلقاهاو سايق ركشة.. خريج هندسة شغال حلاق.. ونحتفل ونكبر ونزغرد فوق شنو؟ وبعضهم يفكر أن يهاجر.. عشان تستفيد منو بلد تانية غير البلد العلمتو وحننتو.. يشتغل فيها وتديهو ربع البتاخدو منو.. شاهدت كم حفل تخريج أطفال روضة.. وشفت الهليمانة الفيها التخريج.. تشوف الشفع.. لابسين هدوم جديدة أحيانا تكون شعبية ويحفظوهم نضم اكبر منهم.. ما فاهمنو.. المهم يرددوهو.. قدام أهلهم.. والأم والأبو الاتنين يعاينو لي شافعهم فاتحين خشومهم فرحانين.. وعيواناتهم يرقرقن.. بعضهم يقشقش في دميعاتو.. أحد الشفع يلقي كلمة الروضة.. نضم كبار كاتبنو ليهو ويكونواسبوع بي حالو يحفظو فيهو.. كلمة لو القاها سيبويه كان اتجهجه.. يجو الشفع كل واحد يردد ما يتمناه له معلمات الروضة في أن يصبح مهندس أو طبيب.. أو معلم.. وعينن للخريجين شغل ما لاقين.. حقو يخلو ليهم مساحة الأماني دي فاضية ويحفظوهم “يا رب أكبر.. واتخرج أي حاجة واشتغل أي حاجة”! بعض آباء زهانة وأمات زهانة وحبوبات زهانة.. بعد حفل التخريج الرسمي.. يمشو البيت ويطبقو ليهو الحنة ويعلقو الهنابيب واللمبات.. ويلمو الشفع ويعملو حفلة تانية.. والشفع الحاضرين الحفلة يمشو يبكو فوق أهلهم ودايرين حفلة زي دي.. وتصبح الحلة كلها حفلات وزغاريت فوق الفارغة!! من حق أي شخص أن يفرح.. ويحتفي ويحتفل بطفله.. لكن.. قدر قدرتو.

مفارقة:-

بذخ في احتفلات تخريج أطفال الرياض.. ورئيس البرلمان يوجه وزير المالية أن يوزع خمسة شوالات ذرة (فيتريتة).. لكل فرد من العاملين بالدولة مؤنة سنة؟