بابكر سلك
حلايب وشعار الهلال
* الحاضر يكلم الغائب.
* الغائب ذاتو دقس وغاب.
* أمبارح.
* بالأمس.
* لعب رديفنا مباراته الثانية فى دورى الرديف.
* كانت ضد النسور.
* والنسور فريق قوى وجسور وأهل حماسة.
* وكالعادة أنتصر أولادنا بهدفين ولا أروع.
* ولكن لسه نشعر بأن الصورة الأخيرة لم تكتمل.
* وعلى الجهاز الفنى تقع مسئولية كبيرة.
* لاحظنا غياب معظم عناصر الموسم الماضى.
* وبرغم ثقتنا فى الجدد ألا أن الجماهير أيضاً تفتقد عناصر الموسم الماضى.
* المهم فزنا.
* ستة نقاط كاملات.
* وأربعة اهداف وعلينا هدف.
* متصدرين ومروقين نحمد الله.
* أيها الناس.
* سمعت بأنو رديف هلال الفاشر ما جاء الميدان فى كورتهم ضد هلال الشجرة بالفاشر.
* فى الفاشر هلال الفاشر ما جا الملعب فى كورة الفاشر.
* شئ غريب جداً.
* وأتمنى يكون ما سمعته غير صحيح.
* لكن لو بقى صحيح.
* يبقى لا يصح الا الصحيح.
* فى كورة رديفنا أمس لاحظنا وجود صلاح احمد محمد صالح.
* بكتب ساااااااااااااااااى.
* قلنا يمكن براقب فى مستوى حكامو.
* عشان تانى ما يقول يخطئ ولا يظلم.
* حامدبدوى قال لى أحتمال بعزل فى الحكام البحتاج ليهم للشجرة أقصد الممتاز.
* وما تستغرب من شئ أيها الأنسان أخوى.
* غايتو رجل الخط البى هناك الفوت تسلل واضح كاد ان يهدى النسور التعادل عندما كنا متقدمين بهدف.
* الزول ده انا بضمن ليكم ترقيته للممتاز سريع.
* الزول ده ممتاز مع ناس صلاخ.
* بجى منو ويبقى دولى يشرفنا ويشرف قبلنا ناس صلاح.
* واحد قال لى صلاح ده قعد فى كراسى الأدارة أكثر من قعادو فى كشف الحكام.
* قلت ليهو برضو قدامى لاعبين.
* نسوى شنو عاد.
* وكراسى الأدارة ما فيها كوبرتست.
* المهم.
* أتمنى ان يكون الأخوة الأهلة قد وجدوا زول يلعب معاهم فى قطر.
* وقالوا فى قطر حسب الأنباء الجات من قطر.
* أنو واحد من هلالاب قطر قال ليهم فى قطر دى غيرو أسم خليفة.
* خليفة دى فى قطر صعبة شديد.
* سموهو ان شاء الله الكمسارى.
* ولما ترجعوا السودان قولوا ليهو خليفة.
* أحتراماً للعلاقات السودانية القطرية.
* خليفة دى فى قطر كبيرة شديد.
* الجماعة ديل حننونى شديد.
* ما لاقين زول يلعب معاهم فى قطر.
* ذكرونى الزول الخرخار فى الحلة.
* زول بيلعب معاهو مافى.
* أيها الناس.
* كروجر يعد فى الفريق ويجرب.
* لانطالبه بالأنتصار بأى صورة فى فترة الأعداد.
* يمكن يريد يجرب طريقة دفاعية بحتة تعينه فى مشواره الأفريقى.
* أصلو الطريقة الهجومية جربها فى الممتاز وفى السودان.
* والعودة ليها ساهلة.
* خلوا الخواجة يشتغل.
* أن أصاب نشكره.
* وأن أخفق نحاسبه.
* ولكن الحساب ليس فى الأعداد.
* الصبر يا ناس.
* الخلالاب صابرين خمسة وتمانين سنة على بطولة جوية ولسه بيأملوا.
* أتعلموا منهم الصبر.
* صبروا لمن حيروا الصبره ذاتها.
* وأتصبرى.
* حاجة آمنة أتصبرى.
* ومن الليلة يا فطومة سميناك حاجة آمنة أتصبرى.
* على الصبر الصابراهو ده.
* المهم.
* أمس فطومة لتت وعجنت فى برنامجها يقناة النيلين.
* شالت الشعار من عصمت وأدتو لى الفريق بتاع الشجرة.
* والرائع كبوتش قال الأعلام المريخى يطلع منها.
* يا كبوتش.
* أعلام الحقيقة بقول شنو فى زول عندو تسجيل وكسبان قضيتو حتى مرحلة المراجعة بالمحكمة العليا أعلى درجات التقاضى بالبلاد بالرقم992011؟؟؟؟؟
* ورينا أعلام الحق بقول شنو؟؟؟؟؟؟؟
* أيها الناس.
* حكاية شعار الهلال دى زى حكاية حلايب.
* كل الخرط السياسية المعترف بيها عالمياً والموجودة كوثيقة رسمية تقول حلايب سودانية.
* يبقى كونوا المصريين يجيبوا فيها حنطور موية.
* يجيبوا حلايب كلو يوم فى التلفزيون.
* يدوا سكان حلايب بطاقات تموين مصرية.
* يعملوا ليها محافظ.
* يجيبوا القصر الجمهورى المصرى.
* يقيف فيها فرعون.
* متفرعن أو لابس.
* يصنعوا فيها جبنة أريش.
* يبنوا فيها أستاد للأهلى القاهرى.
* ده كلو ما بغير الموضوع.
* المستندان هى التى تحكم.
* اللبط ما بتغير شى فى الواقع المستندى.
* لذا.
* على الأهلة أن يقتنعوا بأنو حلايب سودانية بموجب المستندات.
* والشعار حق عصمت بموجب المستندات.
* المصريين يمشوا ابوسمبل والهلالاب يعلقوا الشجرة فى خشم الباب.
* لاحلايب بتبقى مصرية ولا الشعار بمرق من عصمت والحصرية.
* وأوعك تقطع صفقة شجرة.
* عشان ما يجينا جفاف وتصحر.
* وتصفر.
* تصحر اكتر من الزول يلعب فى تمرابونا فى قطر!!
* أيها الناس.
* عداً مباراتنا ضد النمساوى.
* فى أستاد وبى حكام وفيها جمهور يجلس ويخلف رجل على رجل وكشف اللاعبين مكتوب بالكمبيوتر وزمنها تسعين دقيقة.
* لا دافورى لا شوت شوت ولا فى تمرابونا.
* الناس مقامات.
* أها.
* نجى لى شمارات والى الخرطوم.
* أكان شفت يا والينا.
* حلمان شفعنا شايلين علم السودان ويغنوا.
* مافى شئ بأثر فينا.
* يغلى الرغيف ما هامينا.
* يتعدم الغاز ما بكفينا.
* ولا هامينا.
* بسبب الرسوم الناظر يطرد لينا.
* ولا هامينا.
* كلو صباح يشرق يضغط أهالينا.
* ولا هامينا.
* كيلو الضان يصل الآلاف ستينها.
* ولا هامينا.
* السيول تقفل مجرى النيل بى طينا.
* ولا هامينا.
* المواصلات تتأندل فينا نمشى كدارى بى رجلينا.
* ولا هامينا.
* المسؤول يخصص ليهو تلتين عربية وخمسين سارينا.
* ولا هامينا.
* الباعوض يساهر بينا ولا هامينا.
* والأمراض تمد لينا يوماتى أيدينا.
* ولا هامينا.
* فار الجقر يقسم اللقمة المقسومة لينا.
* ولا هامينا.
* ملك الموت يلف حوالينا.
* ولا همانا ولا هامينا.
* وموش حانموت الله يخلينا.
* وموش حانموت الله يخلينا.
* وموش حانموت الله يخلينا. سلك كهربا
* ننساك كيف وشعار أولادنا موش حانموت الله يخلينا.
والى لقاء**********سلك
لن ننساااااااااااااااااااااااااااااااااااااك
في السلك – بابكر سلك
