زاهر بخيت الفكى : ما تمسحنى يا حاج بالأرض..!!

[JUSTIFY]في ليلة باردة وليها زيف..
اتلمت الناس في البيوت..
حتى الطريق أصبح نضيف..
لا حركة فيهوا ولا مرور..
أرصادنا حذروا من برد..
أوعاك من تلبس خفيف..
الصدفة ساقتني الفجر..
للمشفى شان أسعف مريض..
قول يا لطيف..
شفت كان منظر عجيب..
كرتونة وأكوام من وسخ..
يا حاج أنا.. راقد هنا..
يا زول أقيف..
ما تمسحني يا حاج بالأرض..
يبقى الأجل..تحت العجل..
قول يا لطيف..
بِسمِلة مالك يا جنا..؟
بردان أنا .. جيعان شديد..
أديني يا خال شان أجيب..
رغيفة أسكِت بيها جوع..
معاها كباية حليب..
اسمك منو..؟
أمي سمتني الحبيب..
موجودة وين..؟
ماتت هنا..
قبل ما يشوفا الطبيب..
شالوها ناس الخير وفاتوا..
فاضي جابوا العنقريب..
خلتني يا خال للعذاب..
لا يمة لا زولاً حبيب..
وين فات أبوك..؟
عرس قريب..
خلاني غاب ..
لي واحدة تانية بلا قلب..
ورتني ألوان من عذاب..
خلتني عايش زي غريب..
جيت أشم ريحة أمي قايل..
من عيني ما وقف الصبيب..
سموني متشرد أنا..شماشي بس..
أنا منكم.. من دمكم.. أنا زيكم..
القسمة يا خال والنصيب..
خلتني نكرة بلا اسم..
أمي سمتني الحبيب..

صحيفة الجريدة [/JUSTIFY]