رأي ومقالات
زاهر بخيت الفكى : الدولة جد مُحترمة .. اتحلل ترك للدولة كل أموالوا
اتقطعت أوصالوا
تاب الفاسد السارق
اتحلل ترك للدولة كل أموالوا
خلاها السرقة ديك اتغيرت أحوالوا
لا زور ورق..لا سافر مرق
لا عاود سرق ..لا شال منى حق ..وداهوا لعيالوا
فى ساعة الدوام
مقفولة ديمة هواتفوا
لا داير رسالة ..لا فارغ كلام
طارح وشوا باسم.. بى جد واهتمام
يقضيلك حوائجك..بعد رد السلام
لا ضيق لاضجر.. شان ياكل حلالوا
يا شيخ رزق
الدولة جد مُحترمة
فرحان بيها المواطن
شاعر كمان بى عظمة
لا فيها اﻷنانى
لا فيها الطُغاة الظلمة
مبسوط المواطن بحكومتوا واستقلالوا
يا شيخى المواطن
شبعان حقيقى ورايق
مليان جيبوا ديمة
فى عيشتوا ما مُضايق
وقف النزيف وانطفت الحرايق
حقق كل منالوا
يا شيخنا الكريم
غرب النيل وجنب الخور
ظلموها ست الشاى
فى الكفتيرة عبوها الخمور
جوة العدة ختوهوا الحشيش
زادوها تااانى إمور
قالوا وفيها قالوا
لا رحموا اليتيم
المات أبوهوا زماان
فات خلاهوا لا مصروف يقيتوا
لا لاقى ليهوا حنان
مرقت أُمه تلهث..يمكن تلاقى أمان
ضموها والفاسدات ولخبطوا الكيمان
خلــوا الناس تعيش كلوا زول فى حالوا
سيبوا الناس تعيش كلوا زول فى حالوا
صحيفة الجريدة
ت.أ
