رأي ومقالات
زاهر بخيت الفكى : مات الوالد .. دفنوا الجثمان .. جات اﻷم شايلة البرضع
أكبر واحد عَشَرة سنين.. واحد برضع
مرق الوالد في يوم بارد
شال طوريتو وفاسو
فات لي رزقو يطارد
دنقر شال كُُورية الكسرة وصنقع
بالعافية مشيت يا ناس البيت
عوافي عيال.. فاتُم ودع
مر اليوم عقبو التاني
كمان أسبوع
مرقوا الناس في الحلة يشوفوا الراجل وين
شموا الريحة الجابا الريح
بين القش والحطب الفوقو مجدع
شافو الحدث اﻷفزع
حتى الطير الكان في الغابة هناك.. طار اتفرزع
كان أفظع ..مشهد شافوهو الناس في الحلة
لقوهو الراجل مكتول
الرأس مقطوع بي هناك مجدوع
لا كراع لا يد ..فصلوهو الكوع
قطعوهو اﻷصبع.. كلو مقطع
الفاعل مجهول
شال الفأس والطورية.. حتى الكُورية أكل الفيها
زي الحيوان يأكل يرتع.. خلاهو وفات
فات الكاتل يتسكع
دفنوا الجثمان
جات اﻷم شايلة البرضع
تفتِش لُقمة عيش في مصنع
كيف الراتب يَكفي الشُفع
جنب المصنع سَوت راكوبة شاي لو ينفع
مرن شهرين والتالت لسع
زي ما الكل اتوقع
جات الكشة.. وين التصديق لازم تدفع
في رمشة عين كان الحطب اتقلع
شالوا العدة وفاتوا والكفتيرة الشاي الفيها منعنع
فاتوا وخلوها عيونا بتدمع
لا راعوا ظروف… لا الحال الفيها بيشفع
صحيفة الجريدة
ت.أ
شنو المآسي الفظيعة دي يا زاهر من الصباح … التحية لك
يعني ماكان ممكن تلدغوا عقرب اويلدغهدبيب
كتلتوا وقطعتوا خليتوا جق