رأي ومقالات
زاهر بخيت الفكي : الغاز صفوف..العيش صفوف..قوم يا أخى..الناس وقوف..لكل شئ..
شِلتَ كُل العِندنا..
لا مروءة لا زولاً سخى..
حتى الصبُر..
أصبح قليـل..
الزول عليل..راقد هزيل..
فى عنقريباً مُترخــى..
جيتنا فى جوة البـلاد..
جايب معاك جيش من ولاد..
حلبوا البقر..طلعوا الشجر..حتوا الثمر..
الساق وقع قال للفروع إتملخى..
قالـت بنـية الحــاج خلـيل..
جانـا الفـقـر يابــويـا ليـل..
ضايقنا جـوة البيت عديل..
ساكن معـاى فى مطبخى..
دارفورنا يا كاسـنا وبليل..
فى دماكى يـوت اتلطخى..
أهل الشمــال..
كل البيوت العامرة ديـك..
تحت الرمـال..
صارت تلال..
يا بومة أنعقى وافــرحــى..
جـاك يا جزيــرة الخـيـــر..
العيش وفير..الخير كتيير..
تشرب حليب..تاكل فطير..
تسمع خرير..
الموية جارية بلا وقـوف..
جاها الفقُر اتوقفت..
يا تُرعة حوضك وسخِىِ..
كان تلقى طين..
إنتى يا ..
عاصمة البلد الرخِى..
قسموكى نُصين..
نص فقير ساكن طرف..
الغاز صفوف..العيش صفوف..
قوم يا أخى..
الناس وقوف..لكل شئ..
التانى داك خليهوا ســــاى..
حاجاتوا هاى..
خاف الفـقر ولـى وهـرب..
ساكــن معــاى..
يا والدة بس شيلى الصـبر..
ما تصرخى..
بالحُســنى أمرُق يا فـقــُر..
بلا أقنعة…
صحيفة الجريدة
ت.أ
