اختصروا وقتكم ..وسجلوا كلتشي
<وضح وثبت ..وتأكد للجميع ان (المحترف) الجيد ...عملة صعبة ، ولا يمكن الوصول اليه حاليا (باقى 12 يوم) ، وهو زي (لبن الطير) معدوم. <في القارة الافريقية اصبح الحصول على محترف جيد امر في غاية الصعوبة ..ان لم يكن هو المستحيل نفسه ، جنبا الي جنب مع الخل الوفى والغول والعنقاء. <اوروبا ودورياتها بصورة عامة اصبحت تفتح ابوابها وخزائنها للمحترفين الافارقة ..خاصة اذا كان المحترف صاحب موهبة. <لا يلعب في افريقيا إلا المحترف (المصاب) او صاحب تمن موهبة. <الاندية العربية الكبيرة نفسها ما مقصرة.. فهي تخطف اي محترف فيه (رقشة) وتقدم له عروض افضل من العروض التى يمكن ان تقدمها الاندية السودانية. <اندية السعودية ودول الخليج بصورة عامة وتونس ومصر فيها الكثير من الوكلاء والسماسرة والخبراء مع الامكانيات المادية الضخمة يمكنهم ذلك من التعاقد مع الموهوبين ..اي لاعب يظهر في افريقيا وغاباتها اوادغالها تتلاقفه تلك الاندية في لمح البصر ان كان يملك نصف موهبة ..لأن صاحب الموهبة الكاملة يذهب الي اوروبا. <عليه فان اي محترف يأتي للسودان بكون (راسب) في الفنيات ..وعنده ملحق في (الاخلاق)..وكبير في السن كمان...واحتمال كبير يكون (مصاب). <ويمكن مجازا نطلق عليهم (مواسير) كما يعرفهم الوسط السوداني بذلك المصطلح ..اي لا جدوى تنتظر منهم. <المحترفون الذين اتوا الي السودان في السنوات الاخيرة اثبتوا ذلك لا فائدة منهم.. وهم عديمي الموهبة ..وفقراء في الامكانيات الفنية والمهارة. <ويمكن ان نثبت ذلك بسنكارا والمامي وبمبا الذين تعاقد معهم الهلال في الموسم السابق ..فكانوا صفرا كبيرا ..لم يجن الهلال منهم غير الحسرة والشكاوي والبلاوي ..وشيل الحال. <لم نجد منهم إلا التلتلة والمحاكم وغرامات الفيفا وقراراتها. <محترف يكون ما بسوى (بصلة) من حيث الامكانيات الفنية يطالب بـ (90) الف دولار ..وهو قد قضى فترته في مطاعم السمك ..وصالات عفراء وحفلات طه سليمان. <ومحترف اخر ..كل الذي قدمه هو (استعراضات) قبل تسجيله بالكورة ..ثم خرج بعد ذلك ليقول ان زوجته هى التى تصرف عليه الان. <والله انا ما شفت (بمبا) دا ..قلت خلقتو دي خلقة زول بتصرف عليه زوجتو. <اصلو ما خلقة زول بصرف على نفسه ..او بتصرف عليه كورته. <هذا اللاعب (الراسب) ..خرج في صحف المريخ يتطاول على الهلال ..والمريخاب كانوا سعداء بهذا (السخف). <اعود واقول ان الحصول على لاعب محترف جيد امر غاية في الصعوبة ..واللاعب المضمون (نصف موهبة) افضل الف مرة من محترف لا نعرف عنه شيء كامل الموهبة. <المريخ كان اشطر من الهلال في السنوات الاخيرة ..وهو يلجأ الي محترفين ...الناس شافوهم وجربوهم في الدوري السوداني. <اتجه المريخ في تسجيلات هذا العام الى مالك وباسيرو ودخل بقوة لكسب تراوري ..وجميعم ما فيهم كلام والناس شاهدوهم في مباريات الدوري السوداني المنقول على قناة النيلين. <الي جانب هذا هم اعتادوا على الاجواء السودانية وليس هناك عقبة محتملة ان تواجهم في المريخ بعد التأقلم على اجواء السودان مسبقا. <واهم من ذلك كله ..انهم غير مصابين ...وهذا (صك) واجب الاعتماد والعمل به. <الهلال لم يتعظ من تجاربه اتجه نحو محترفين (البطيخة المقفولة)..ولا بد ان مجلس الهلال سوف يقع في الكثير من الاخطاء و(المواسير) لا سيما وان المجلس جاء في وقت عصيب وضيق وهو اصلا قليل التجربة والخبرة في التسجيلات وكرة القدم بصورة عامة. <لذا الله يتسر على الهلال ساكت ..وقد مضت الي الان (7) ايام من انطلاقة التسجيلات ولم يوقع اي محترف اجنبي او مجنس في كشوفات الهلال. <بل لم يضف الهلال لاعبا جديدا في كشوفاته غير وليد علاءالدين رغم انه فقد (5) محترفين مرة واحدة (تراوري وسيدي بيه وسنكار والمامي وبمبا). <قطر بتاع مواسير...عدا سيدي بيه وتراوري طبعا. <تبقى من التسجيلات فقط (12) يوما ...والهلال لم يحسم امر المحترفين ومازال يتعامل مع الامر على طريقة (الاستقبال في المطار). <كان افضل للهلال ولمجلسه ان يحسم امر (سيدي بيه) الذي سافر ..واصبح في عداد المفقودين الان. <اضاعوا سيدي بيه الذي كان بين ايديهم ..وذهبوا ليطاردوه بين المطارات وعواصم الدول الافريقية والاوروبية. <موهبة مثل موهبة سيدي بيه التفريط فيها ..سجعلنا نفقدها ..خاصة ونحن قد جربنا ما حدث في شأن هذا اللاعب في التسجيلات الرئيسية الماضية. <ان لاعب تفشلوا في ان تحسموا امره وهو بينكم وانتوا (20) عضو في لجنة التسيير يبقى شبه مستحيل ان تحسموا امره وهو قد سافر وغادر البلاد ..وقد حذرنا من ذلك ..ولكن لا حياة لمن تنادي. <مجلس الهلال بقيادة الحاج عطا المنان مازال يتعامل بمثالية وطيبة فوق الحد مع امور تحتمل للحفر والغدر والبيع. <ومثلما اضاعوا سيدي بيه اضاعوا تراوري الذي كتبنا عنه واوصينا باعادة قيده الف مرة حتى ذهب للمريخ في طبق من فضة وهو مطلق السراح. <الكارثة التى نخشاها ..ان الهلال قد يدخل في كشوفاته سنكارا اخر ..والمامي اخر ..وبمبا تاني. <تتذكرون (بمبا) هذا عندما قدم للتوقيع في الهلال. <استقبلوه (فجرا) في المطار ..وجاء وهو يلبس الكاب والتي شيرت والجاكيت ..والجينز القصير...ومركب السماعات في اضنينو. <نظام الولد لاعب كبير. <بمبا ملأ البلد تصريحات ..ووعود ..وعمل مهرجان استعراضي في استاد الهلال بعد ان كان مجلس الهلال وقتها يبشر بمحترف كبير قادم للهلال. <حتى اذا جاء بمبا هذا وجدنا ان المحترف الكبير طوله لا يتجاوز الـ (160) سنتمتر. <وليته على هذا قدم شيئا ..ان كل الذي قدمه استعراضات يمكن ان يقدمها (سكسك) الذي اعتزل قبل (20) سنة الان. <اخشى من (بمبا) تاني ..خاصة ان مجلس الهلال ملأ الصحف بالتصريحات والتلميحات بمحترفين كبار ومن الوزن الثقيل. <ان كل المحترفين الذين رصدهم الهلال خرجت صحف الامس تحذر من اصاباتهم ومن المقالب التى يمكن ان يشربها الهلال. <انظروا معي في صحف الامس. <قالت صيحفة قوون امس ( كشف الموقع الرسمي لنادي الاهلي الطرابلسي معلومات خطيرة ومثيرة عن لاعب الاهلي الليبي والظهير الايمن لمنتخب عقارب الصحراء المميز ربيع اللافي الذي خاض تجربة احترافية بنادي الافريقي التونسي الذي يعتبر اقوى واميز مدافع رشحه مواطنه ساحر الكورة الليبية طارق التائب للاحتراف بصفوف النادي الافريقي التونسي وذكر الموقع الرسمي للاهلي الليبي عن تعرض اللاعب ربيع اللافي للاصابة في مباراة فريقه الاهلي طرابلس امام مواطنه الهلال الليبي التى احتضنها ملعب الشهداء بمدينة البيضاء في الدوري الليبي بتاريخ 29 نوفمبر الماضي وغادر ارض الملعب مع نهاية الشوط الاول وبعد الفحوصات الاولية اتضح ان اللاعب سيغيب عن الملاعب لمدة شهر ونص من تاريخ الاصابة وتأكد ان اللاعب مصاب بالتهاب في الحوض وسيغادر لالمانيا لتلقي العلاج وسيعود بعد شهر ونصف من تاريخ الاصابة). <في صحيفة عالم النجوم امس جاء ايضا ( كشفت المعلومات المتوفرة في الفضاء الاسفيري ان الزيمبابوي عباس المرشح لارتداء شعار الهلال يلعب حاليا لنادي النمور السوداء ضمن اندية الدرجة الثانية بجنوب افريقيا ويحتل المرتبة السادسة في روليت الدوري) ...الفاجعة كما ذكرت الصحيفة نفسها ..ان امادو لاعب بديل في فريق درجة ثانية هذا). <عليكم الله لو ما ساي في محترف اسمو (عباس). <انت يا اخوي جايبنك لي كورة ولاّ جايبنك تفتح مطعم في الخرطوم. <في المشاهد امس جاء ايضا عن اللاعب نفسه : ( علمت المشاهد من مصادرها المقربة ان الهلال وضع مهاجم الاشانتي كوتوكو الغاني ايمانويل بابور على لائحة الانتقال للفريق الازرق في فترة التسجيلات الشتوية الحالية كبديل للمحترف الزيمبابوي الذي من المتوقع ان يكون قد وصل اليوم خاصة بعد الشكوك التى حامت حول اصابته الخطيرة لذلك سيقوم الهلال بارسال التذاكر لنجم الاشانتي). <شوفوا قالوا شنو؟. <قالوا اصابته الخطيرة. <نذكر ان التسجيلات تبقى ليها (12) يوم ومطلوب من الهلال التدقيق في الكشف الطبي ..والبحث عن بدائل ..والدخول في مفاوضات عسيرة مع اللاعب وناديه. <قلنا ليكم ..احسموا الامور من بدري ..قعدتوا تتلفتوا. <اري ان الهلال يجب ان يتعامل بفقه عصفور في الكف ولا الف طائر..واظن ان هذا المثل يعني ان يتعاقد الهلال مع محترفه السابق (كلتشي) الذي انهى تعاقده مع المريخ...هذا اضمن ..وافضل. <لا خلاف حول كلتشي ..(ميشو) استغرب عندما لم يجدد المريخ لكلتشي ..وفيصل العجب قال في حوار ينشر اليوم بالداخل ان كلتشي افضل محترف لعب في السودان على الاطلاق. <المريخ اراد من باب المكايدة والاحساس بالنقص التعاقد مع (تراوري)..ردوا للمريخ الضربة بضربة اقوى واتعاقدوا مع (كلتشي). <مهاجم خطير ..ومطلق السراح ..ومضمون وغير مصاب وصغير في السن...وفوق هذا كله لعب في السودان قرابة الـ (7) اعوام ..وهو قد نال الجنسية السودانية. <كلتشي افضل الف مرة من المحترف الزيمبابوي امادوا الذي وصل امس ..(والله دا الرديف كتير عليه). <المحترف دا تصوروا (مطار الخرطوم) بي حالتو دي خلعو. <اها نوع دا راجيين منو شنو؟. <ايضا الاتجاه لتسجيل مهاجم الاهلي مدني محمد عبدالله كول ..اضمن وافضل من المحترفين الذين يكون مستواهم مثل (بمبا). <مطلوب من مجلس الهلال ان يعجل في حسم هذه الملفات ...عشان (السيستم) قرب يقفل يا شباب. <ملحوظة : السيستم بتاع الاتحاد للمريخ في (نيروبي) بفتح ..شفتوا (المغصة). هوامش <اصابة المحترف الليبي ربيع اللافي واضح انها غير خطيرة لأن اللاعب حسب قرار الطبيب الالماني سوف يعود لممارسة نشاطه في منتصف يناير القادم. <يعني قبل بداية الموسم بكثير. <مثل هذه الاصابات عادية ...ونتمنى ألا يتخوف الهلال من اللاعب الذي وضح انه لاعب خطير ويمكن ان يضيف الكثير للهلال. <هذه الاصابات تعرض لها ميسي ورنالدو. <ميسي غائب (8) اسابيع ..يعني ما في مشكلة من اصابة ربيع اللافي الذي تحدث عنها موقع الاهلي الطرابلسي. <على الاقل هي لو اصابة خطيرة ..ما كان الموقع سوف يتحدث عنها ..حتى لا يقلل من قيمة لاعبه. <اما اللاعب الزيمبابوي ..ارجو ان تصرفوا النظر عنه. <دا لاعب (مخلوع)...واضح من فانيلتو. <ما تنتجوا لينا (بمبا) جديد. <العجب واضح ان الهلال لو فاوضه لن يرفض. <وكلتشي يتمنى الهلال. <وعصام الحضري ذاتو (44) سنة وكيله عرضه للهلال. <ردوا الصاع للمريخ. <سجلوا كلتشي على الاقل. <المريخاب دائما بحفروا وبجروا للحاجات الفى يد الهلال. <طبعهم كعب. <زي الطفل ..يخلى حاجاتو كلها لو شاف ليه لعبة في يد طفل تاني. <كلتشي اصلا هو ولد الهلال. <اعيدوه ..وكلنا يعرف الاسباب التى جعلت كلتشي يلعب في المريخ. <قد يكون كلتشي غير منضبط وهناك تحفظات على سلكوياته ..لكن الهلال قادر على ان يحسم هذا الامر. <خليهم يشيبعوا بـ (تراوري)..وسجلوا كلتشي. <فارس عبدالله ..يا هلالاب ..نجم التسجيلات الاول. <صلاح ادريس الان اكثر استعدادا للتفاوض ولاطلاق سراح اللاعب للهلال. <محمد موسي لاعب المريخ ...في الهلال (حارس مرمى) ما بنفع. <يا جماعة. <يا عالم. <عينكم في كلتشي (مطلق السراح) تفكروا في (محمد موسى) اللاعب الذي مازال مقيد في كشوفات المريخ. <الامين العام للمريخ ..في اوقات كثيرة بعطينا احساس بتصريحاته تلك انه ماسك ميز العنبر. <يا سيادة الفريق ..خت الكورة واطة ...بنقوم هسع نلحقك (نيل الحصاحيصا) ونلعبك سنترليق. <اول مرة اشوف لي امين عام مهمتو كلها نفي تصريحات الهلال. <... <عاجل : لكن قالوا في محترف في الطريق ...لو وصل ناس المريخ برجعوا يجددوا تاني للحضري.[/SIZE]وإن طال السفر - محمد عبد الماجد صحيفة قوون
