* كيف بدأت علاقتك بكاكي؟
أول يوم التقيت به في مناسبة ومن ثم بدأت علاقتنا كأصدقاء واستمرت العلاقة لست سنوات وبعد ذلك بدأ كاكي يلمح لي بحبه، بس أنا كنت دائما بقول أحسن نكون أصدقاء ولكن مع الأيام تحولت مشاعري تجاهه وأصبحت أبادله نفس المشاعر وقمنا بالفعل بتتويج حبنا وتزوجنا وأنا فخورة جداً أن أكون زوجة لكاكي الإنسان الطيب الحنين البسيط قبل أن يكون كاكي البطل العالمي.
* ما سبب تحول مشاعرك فجأة على الرغم من أنك كنتِ رافضة في البداية أن تكون بينكما علاقة حب؟
اكتشفت أن كاكي يمتلك قلباً كبيراً وهو متواضع وحنين وبسيط و(حمش) ودي مواصفات بتتمناها أي فتاة في فارس أحلامها.
* تم زواجكما دون أي ضجة إعلامية وتفاجأ به الجميع على الرغم من أن كاكي شخصية عامة هل تم ذلك عن قصد؟
فعلا نحن كنا قاصدين أن يتم زواجنا دون أي ترويج له وهو مناسبة خاصة وكنا عايزين في الليلة دي أقرب الناس لينا بس وبالفعل دا الحصل.
* علاقتك بألعاب القوى قبل وبعد زواجك من كاكي؟
علاقتي بألعاب القوى تكاد تكون معدومة قبل الزواج ولكن كنت أعرف أن هناك بطلاً اسمه كاكي وأنا عندما كنت في الثانوي كان كاكي لاعباً باسم السودان والمدرسة كلها كانت بتهتف لكاكي وبتشجعوا وأنا بتذكر كتبت في تشيرت حقي كاكي كنوع من التشجيع فقط، أما بعد الزواج فقد توطدت علاقتي بألعاب القوى كثيراً وأصبحت ملمة بكل التفاصيل ومتابعة المنشط شديد.
* كاكي شخصية عامة ومشهور والشهرة لها ضريبة هل أنتِ جاهزة لدفعها؟
أنا قبل أن أتزوج كاكي كنت أعلم ذلك وأعلم أن كاكي ملك لكن السودان وليس لي وحدي، بالعكس أكيد ما حأزعل نهائي وأنا واثقة من كاكي وهو واثق مني ودا يكفي.
* وماذا عن المعجبات؟
لم اصطدم بهن حتى الآن، ولكن كل شيء وله حدود.
* حدثينا عن كاكي في البيت؟
شخصية تانية وبصراحة لمن يكون ما في الناس كلها (بتفتقدوا) بشدة والبيت بكون بدون طعم.
* علاقة كاكي بالمطبخ؟
طباخ ماهر ومرات بيخترع أكلات من راسو وبتطلع لذيذة شديد وكاكي بحب العصيدة بالتقلية شديد وعصير البرتقال مشروبه المفضل.
* وعلاقته بالفن؟
صوته جميل ويغني لي دائماً ويستمع للأسطورة محمود عبد العزيز وأغنية (لهيب الشوق) عندها واقع خاص عند كاكي.
* كاكي غير مستقر في مكان واحد بحكم المشاركات والمعسكرات.. هل ترافقينه في كل السفريات؟
لا أنا مستقرة بالسودان ولا أسعى لتقييده إطلاقاً، وأدعه يتفرغ للمشاركات والبطولات (بس نفسي أحضر ليهو منافسه لايف ونرفع علم السودان سوا).
* عندما تكون لديه مشاركة هل تتابعينه عبر التلفزيون؟
في البداية بكون متحمسة شديد عشان أشاهد كاكي أثناء المشاركة، بس مجرد ما يبدا السباق بنسحب وبتوتر وبسأل من النتيجة من بعيد لبعيد لأني بكون (خايفة عليهو شديد).
* سماح.. بصراحة هل أنصف الإعلام كاكي؟
هناك من أنصفه وهناك من ظلمه… وكاكي يحتاج لدعم الشعب السوداني بشدة.
* ما هي أسباب إخفاق كاكي في الفترة الأخيرة؟
كاكي محتاج لدعم كل الشعب السوداني بشدة عشان ترجع إنجازاته ويواصل رفع علم السودان في منصات التتويج.
* هل وجد كاكي التقييم المناسب من الدولة؟
للأسف لا… والكل يعلم ذلك… الدولة لم تقيم كاكي نهائي وهو يستحق الكتير.
* إذا عرضت على كاكي أي جنسية أخرى كما عرضت عليه من قبل.. هل ستوافقين؟
سأعترض بشدة وكاكي حيرفض طبعاً أكيد لأنو كاكي بعتز بالسودان شديد.
صحيفة السوداني
خ.ي
مقالات ذات صلة
-
-
-
-
-
-
-
-
