نهلة النو : اعملوا الخير وارموه البحر

2014/05/10

[JUSTIFY]توقف بتاع الامجاد ويقابلك بابتسامة عريضة ويقول ليك اتفضل تجي تسألو من سعر المشوار يجاوبك بابتسامة اعرض تخجلك وقبل ما يرد تقول فينفسك ده انا سالتو ليه ! ويجاوبك بعدها مايهمك ادفع الفيها البركة والأرزاق بيد الله ياخ تركب وانت محتار ده طبيعي ولا انت بتحلم ولا شنو ، يجي يكمل عليك لما تسمع صوت عبد الحليم حافظ فجأة وتحس بالجد انك بتحلم اها الزول ده يستفزك تتونس معاه عشان زول زي ده ما بتلاقيه كل يوم و الونسة تحلي علي انغام عبد الحليم وتوصل محل ما انت ماشي والسكة بقت ليك قريبه مع الابتسامة والكلمة الطيبة وأنت نازل تناولو القروش وتقول ليه شكراً وهو بنفس الابتسامة القبيل يقول ليك العفو مرحب بيك ، ويلا كتار حسي منتظرني اقول ليهم وصحيت من النوم ولقيت نفسي فعلاً بحلم بس ده فعلاً حصل لي ، واليوم ده كل ما تحصل حاجة تكدر علي اتزكر توكل بتاع الامجاد وابتسامته رغم التعب والشقي وأقول في نفسي سهليها بتتسهل وسبحان الله كل شي يمشي في اجمل صورة ، فليه ياخ ما يكون ده اسلوبنا اليومي نصحي نصبح علي ناس البيت والأحباب المنتظرين رسالة ونقول للكمساري اتفضل ويرجع الباقي ونقول ليه شكراً رغم تكشيرة وشو خلينا نكون احسن ، ولي ست الشاي صباح الخير لو سمحتي كباية قهوة اذا ممكن ما بتكلفنا شي اذا عجبتك قول ليها قهوتك سمحة و اذا ما عجبتك قول ليها الليلة شكلو المزاج ما رايق لأنو القهوة ما زي كل يوم حنكون نبهناها بدون ما نضايقها ياخ العليها كتير بالحيل فما نبقي عليها نحنا والزمن ، بعد ما تقعد مع اصحابك وترجع البيت رسل رسالة لصاحبكم الكان زعلان في القعدة قول ليه من غير ابتسامتك القعدة ما بتكمل ، استاذك بعد المحاضرة قول ليه شكراً علي المحاضرة بس النقطة الفلانية ما فهمتها تأكد انو حيشرحها ليك بصدر رحب .. كلمات بسيطة لو عودنا لسانا عليها حتعود علينا بالخير ، خلونا نكون ناس مقابلتهم سمحة صدقوني حنكسب كثير و حنستمد من بعض قيم وتفاصيل جميلة خلونا نتشبه ولو بحاجة بسيطة من صفات رسولنا الكريم عليه الصلاة والسلام لان الدين معاملة والمعاملة الطيبة ماف زيها واذا حتقولوا لي الناس ما بتفهم الحاجه دي صح ، حقول ليكم اعملوا الخير وارموه البحر )علي نياتكم ترزقون ( وما ننسي انو دي كانت من سماتنا زمان وبسبب الظروف اختف منها حاجات كثير فياريت نكون اقوي من الظروف . فشنو شكراً لأنكم مستحملين نقتي دي طوااالي كده ودائماً دافعني للامام وللأفضل ، اقعدوا طيبين ..

بوح شعري:

ياخ شكراً.. والف عفواً علي بعادك.. يانا اهلك مهما تجفي..
بابنا ما بينسد قصادك.. ياخ شكراً.. لما ترجع تلقي باب الريد متاكي..
والقلوب بيك ديمه تسعد.. ما بيدوم الحال بلاكا.. ياخ شكراً.. والف
عفواً نحنا والاعزار معاك..

صحيفة الجريدة
ع.ش

[/JUSTIFY]