لكن في الكلية عادة بيكون الدفعة فيها ميتين دكتور وتلتمية دكتورة , يعني الخلعة…دي مافي , والشباب بيكونو ماخدين راحتهم والحالة ون شديد , بالذات أيام الامتحانات , والله الجكس ده بيكون عليهو حالة كده , ممكن الواحدة فيهم عادة تسب ليك لي جدك الأربعطاشر لو ماجبت ليها الشيت بتاع الباثولوجي الشلتو منها عشان تصورو , وممكن تطلع جزمتها وتديك بالحتة الفيها الحديدة وعلى نافوخك عدل لو ماتندست ليها في المحاضرة البيض الزاغت منها
يعني الناس تكون في قعدة مراجعة في نص أيام الامتحانات والواحدة فيهم تجيها عطسة , تقوم فجأة كده تسمع :
هههههااااااتتتتششششششوكككررررررررووروروروطااااااااخطرررررااخ لمن الطير الراكي في الشجر زاتو يطير , وبعدداك تقول لينا : إنتو ياحيوانات إتو مابتقولو لي يرحمك الله ليه , في حصة الدين شكلكم كنتو بتنومو ياوهم
ونفس الجكس دي في الأيام العادية لمن يكون في ضيوف أو خطيبها جاييها الجامعة عشان يلاقينا ويتعرف بينا وكده وصاحبتنا دي تجيها عطسة تسمع : آتسو , بس كده والله مابهتها, والآتسو دي زاتها لاترى بالعين المجردة , يعني ياسمعتها يا ماسمعتها
نقوم نقول ليها : يرحمكم الله , تقول لينا بي منتهى الرقة : هداكم الله وأصلح بالكم , وتقبل على واحدة من صاحباتها وتقول ليها : عليك الله ياسوسو دايرة لي تيشوز لو سمحتي , ولو ممكن تكون كلينكس لأنو فاين خشنة وبتهيج لي بشرتي
والله كان خشنة ماعارف , وهي أيام المشرحة بتدافس عشان تخش قدامنا وتقول لينا : ياخ زحو ياخ أنا والله ريحة الفورمالين دي بقيت بخرم ليها عدييييييل
مايرشد إليه البوست : نحنا دافنينو سوا , يعني ياتقولو نحنا برضو حناكيش ولا نفتكم
والله من وراء القصد
التوقيع : مشروع حنكوش لو ربنا سهل
الكاتب : د.أحمد الفحل
-
-
-
-
-
-
-
-
