حاضر يا حبوبتى ! ان شاء الله خير !!
خير تب يا ولدى.
الرادى دا، جمبى هنا ليهو عشرين سنة، اول مرة الليلة اسمع منو خير.
الرادى قال شنو يمه؟
قال الحكومة دى انقلبت!
يمه الحكومة ما انقلبت الحكومة غيروها!
كيفن يا جني، أتغيرت وما انقلبت؟
رئيس البلد كان منو ؟ والليلة منو؟
يمه: رئيس الحكومة الفاتت عمر البشير، ورئيس الحكومة الجديدة عمر البشير
يا جنى: قوم افتح الرادي دا .. سمع اضانى دى، الرادى قال الحكومة اتغيرت، اكان ما شالو عمر البشير… الرادى مابقول كده!
يمه: الشالوهم برة ديل، نواب البشير!
والبشير هرب وين؟!
يمه: البشير قاعد بس غير نايبينو وكم ضرس كده مسوسات قلعهم برا.
قوم ياجنى، جيب لى حبوب الضغط ديل، وتعال فهمني ليها شوية شوية. استغفرتك يا مالك روحي… هاك ادفر الكوز دا تحت العنقريب.
اها نايبو دا ياتو فيهم ؟
انت بتعرفي منو فيهم؟
في واحد نضيضيم! وكلامو ما بنفهم لى تب! وفى واحد دقوه بالمركوب. ياتو فيهم ؟
بس يمه شفتى الكلامو ما بنفهم ليك دا، دا ياهو الشالوه برا. والدقو بالمركوب برضو شالو برا.
الدقوه بالمركوب دا، عجبتنى ليهو، البركه الشالوهو لسانو بالحيل طويل. لكن الكلامو عجمى دا، شايلنو مالو ؟
والبقود البشير منو تانى؟ قادوه يا يمه، المتعلمين، الفاهمين، وبعد دا خرب الدنيا، و قسم البلد، و دمر زراعتنا، وماتت سعيتنا، وشرد جنياتنا، وخل لينا الحته كلها حروب.
يمه: هو تانى فضل شنو نخاف عليهو من الخراب؟ الجوع والفقر كتلن فينا المروءة، والكرم والهيبة، والغربة، غيرت طبعنا، وطبع أولادنا، وغيرت عاداتهم بقي يمه، لبسهم ما زى لبسنا، وكلامهم ما زى كلامنا، واكلهم ما زى اكلنا.
يمه: نحن بناتنا بعد ما تفشي عنوسه، ماشين نرسلن خادمات لبلاد برا !!
أجي يا ولدى!! تطير عيشتم! شكيتن على الله! والله يا جنى، اكان من الأول الراجل دا، خلو براهو، دا كلو ما كان حصل.
النميري الله يرحمو كان بجى طيش المدرسة! بس بعد دا، زراعتنا كانت ناجحه، ومخازنا مليانه، وزرايبنا مليانه، وكل البلد سالمه، و عايشين فى أمن وأمان، ولا بنعرف الغربه ولا بنعرف الكربه.
المتفلسفين ديل هم الضيعوا البلد! وملوا ليهو راسو شريعة ..شريعة ! مالنا؟ اكنا كفار؟! احمدالله مصلايتى دى من زمن جدك أتكلم فوقى، ما فارقتها. الله يرحمو ياولدي، زمنا كان سمح شهرين الضبايح شغاله، والناس تمشي وتجى فى صالون جدك، مازى زمن ديل ضليعه صغيرونه الطفل ما تشبعو!
يمه: قصة العرس دى طويلة للعشاء مابتنتهى، وقبل كم يوم سمعناها، وقت الضهر دخل يمه، قصة تغيير الحكومة دى، وقعت ليك اقوم امش قوم يا جنى، امش.
لى زمن منتظرا التغيير التغيير هسع طممت بطنى منو !
ياهو التغيير كدي؟!! استغفرك يا الله، كلنا باقي عمر ياولدي الله اكون في عونكم.
يمه انت الترابي والصادق ديل قدرك؟
اجي يا ولدي! ديل قدر جدك الخليفه الله يرحمو. عمر ،وعلي، ونافع، والخضر، ديل ياهم جيلي.
اها.! عشان كدا يا حبوبتي افكاركم واحده، ما بتدورو الفيسبوك دا تب؟
الله اقطع سيرتو يا ولدي دا عميل زي ما قال الخضر! كل زمن ليهو ناسو، الزمن زمنكم والله.ونحن ضيوفكم، بس بعض الضيوف عيونهم زايغة
حاتم أرباب
[/JUSTIFY]
مقالات ذات صلة
-
-
-
-
-
-
-
-
