تحت مظلة البوبار

وتقعد تحكي.. انو زول كريم وامبارح كان عازمك في امواج..وتكون انت ماكل ليك كسرة بملاح ام رقيقة … عند اهلك .. وربما يكون الملاح في قعر الحلة… رميت فيهو الكسرة……وقعدت تاكل…. لكن عشان يكون عندك قيمة عند سُمارك….تبهت الراجل وتقول البارح غداك في امواج او ربما الهيلتون…ولتدعيم موقفك وعلاقتك بفلان تمرق الموبايل و تعمل نفسك متصل عليهو….. وهاك يا ونسة ويا ضحك…. وكل مرة تعاين للجماعة بطرف عينك عشان تشوف ردت فعل اتصالاك الختري عليهم…. وبعضهم ممكن يصدقك… ولو كنت زول حبرتجي… طوالي تطلب قروش دين من اكترهم تصديقا وانك ح تردهم ليهو في اقرب وقت…. ويكون هو اداك القروش على امل ان يستفيد من علاقتك بفلان الختري…ولو قرب اضانو من الموبايل لحظة اتصالك بفلان لسمع(طيط..طيط..طيط)…لكن انت بتكون قبل الاتصال نومتو مغنطيسيا… وجهزتو تب…البوبار ياخد اشكالا والوانا..بوبار حسب القدرة والمقدرة… بوبار حسب ظروفك… وبرضو ممكن تتبور قدام ناس تضمن في الاول انهم اقل منك في المجال الاخترتو للبوبار اوالكضب….او ربما اندادا لك…. لكن ديل ح يغلبوك شوية…. يظهر البوبار جليا في المناسبات…. افراح او اتراح… ما عندنا فرق… المهم حاجة تلم الناس وتكون انت قاعد تتبوبر..بعض البوبارين يستغلون القعدات جنب ستات الشاي ويقعدو يتبوبرو…لا يميزو ابدا… بعضهم يتبوبر بوطنيتو الرابطها دائما بانو اتقبض عليهو(وانو اتسجن سنة كدي… ومرقوهو سنة كدي واتفق مع ناس الامن يقبضوهو سنة كدي. وممكن يمرق ليك ركبتو ويوريط ظلطة قديمة حدثت ذات حريّنا ويقول لك دي من اثار النضال,, ويعاين لك وزي بقول…امشي يا متقاعس.. يا عميل. وانت خايف وايدك فوق قلبك ما يسحب منك الجنسية ويخليك لافي صينية).. في نكتة قديمة احد النساء البوبارات كانت تركب في المواصلات… وقاعدة تتبوبر بالعندهم..ونحن يا يمة اصلو زول بيشبهنا مافي…. واقف جنبها واحد سكران طينة…وكل مرة يترتع ويدور يقع فوقها…. قالت ليه هوي كدي زح غادي…. وفتحت موجةالبوبار اريتهم يا يمة ولادي ولاد السرور لا سفة لا سجيارة…. ويرد السكران هيغ ونحن؟… انتو يا يابا ولاد التابا واليابا… يرد برضو هيغ وانتو؟…. نحن يا يمة اولادنا ولاد الهنا غير الموية دي شي بيشربوهو مافي….. يرد السكران هيغ ونحن؟… انتو يا يابا انشاءالله ما وليداتي…. ويرد السكران هيغ وانتو؟….. كان النقاش قريب الساعة ..كلو انتو؟ ونحن؟… في النهاية زهجت البوبارة وقالت ليهو جي يا يابا سجمك!..وبرضو السكران مُصّر وقال ليها وانتو؟….. وختمت النقاش بان لوت خشما زهجنا وتبرما وبعد ان فرغت جُعبتها من كل مفردات البوبار المناسبة للمناسبة…. لو داير اي زول بوبار يريدك .. خليهو ياخد راحتو… ووريهو انك مندهش جدا للعندو…. وما عندك…وانك زول عايش ساكت لا امشي لا تعالي… تلقاهو حباك جدا واتبسط منك…… لكن ح يسويك شغلة…. كل ما يلم فيك يبراك بوبارا…