والكدايس زاتا انواع

واحد من النوع…دا من الكدايس .. واقف ليو فوق كارو .. و ضنبو مرفوع ..قالو بلدياتنا عينو حااارة .. عاين ليو .. وقال ليو ( الشى دا كديس ولا مفرمة لحمة ) ..لُببببببببببببب قال ليك الكديس جا واقع ناشف !

وفى الكديس المشرد .. المقطع .. من كوشة لكوشة .. من مدرسة لمدرسة .. ومن قراش لقراش .. كديس شوارعى .. مفتح .. جنو ونسات مع الجنس الاخر… كل يوم طالع مع كديساية .. ونازل مع كديساية .. ..وبحب التجمعات .. والكواريك بليل .. و الشكل .. و الخفج .. و حريف كيف .. يعنى بينط أحسن من فليكس ..لا كنترول روم .. ولا بدلة فضاء .. ولا ام بى سي اكشن .. لما يقرر ينط بينط ! و أياك ثم أياك تنهرو .. بينط فيك ! بينخشمك! بيمزقك ! و تحصل عليك الحصل على العامل شفت .. الكديس معزبو .. قال ليهم يا انا يا الكديس دا .. استدرج الكديس جوة الاوضة .. وشال العكاز .. وخشا عليو .. و قفل الباب البليد .. وبُعيد لُحيظات .. الكوراك ضرب .. قيس وت ! .. ليقو ليك الكديس مكنكش فى رقبة عمك .. و عمك يكورك ! حكمة : الكديس لا يقتله الا المسدس !
و عزابة كدة يوم طقو الكديس .. الكديس جا طاير و وقف ليهم جمب الباب .. صوفو قايم .. و سنونو براااا ..وعيونو محمرة .. وفى وضعية الانقضاض .. النتيجة : غاب كل العزابة من عملهم فى ذلك اليوم ! كديس يجرسكم ! بالغتو ووووو ومن ثم بالغتووووووو !
وفى الكديس البيتوتى .. المسالم .. الطيبان .. البيجى يتملس تحت كرعين الضيوف .. و دا البخلينى ما بريد اكل برا بيتنا .. و دا ذات نفسو بتقسم لى نوعين من الكددس …

النوع الاول البيتوتى المرطب .. المدلل ..الحنكوش .. النوع البيجبو ليو حليب غير مغشوش بنكهة الفانيليا .. و اكلات جاهزة من المولات .. خاصة بالقطط .. و بيحموهو .. وبيسرحوهو وبيريحوهو .. وصورو منتشرة فى الفيس .. تلقا البت شايلاو ذى المطبقة .. و كاتبا فى الصورة ( سوووو كيوت) .. (سووو كووول) .. ( يو ميد ماى داى) ! و عاملة تاق لى كل الكرة الارضية ! و تلقا عندو اسم ! و تاريخ ميلاد ! و هوايات ! و اشهر كديس فى النوع دا اسمو توماسو .. ايطالى_ 4 سنوات_صاحب مجموعة كبيرة من العقارات منها شقق ومنازل متوزعة في مختلف المدن الإيطالية من ميلانو في الشمال إلى كالابريا في الجنوب، تقدر قيمتها بحوالي 10 مليون يورو ! بعد ما ورثها مؤخراً من سيدة غنية ! دى خمسين مليار جنيه سودانى .. جمال الوالى ما اظن عندو !

النوع التانى ..البيتوتى .. المجهجه .. المزعزع .. ناس بيتوم ما شغالين بيو .. يشيل و يكابس براو .. بياكل اى شى .. ما بقيف .. سلطة .. طعمية .. عدس .. بوش .. الموجود بس .. ودا ذى باشورى .. دا كديس صاحبنا .. بيحكى عنو اكتر من حكاياتو عن نفسو … لامن بقيت بعرفو ذى اصحابى .. باشورى زول مستور .. و بياكل البتجيهو .. يوم صاحبنا قرر يمنتشو .. يرطب بيو .. جاب ليو قطعة بيرقر ! قال لى باشورى من الخلعة ما قدر يلمسا ! قدر ما شال وختا باشورى ما مصدق ! مصدوم !

انا سخشيا لستو من محبى الكدايس .. و لا املك كدايس .. و متأكد أنها نمر صغير .. وسوف لن اتصور مع كديسة .. و الكديسة الوحيدة التى أحبها و لا احبو ضربها ..كانت صغيرة و اسموها سميرة !