في البلاد (المتقدمة) المسئول بيمسكوهو من لسانو بمعنى أن تصريح المسئول أو وعوده التي يقولها للمواطنين شئ (مقدس) يعني المسئول قال ح يعمل الحاجة الفلانية معناتو ح يعملا .. طيب إذا (ما عملاااا؟؟ (وده بالمناسبة ما بحصل عندهم كتير) .. الإجابة هي إنو إذا ما عملا طبعن ح يتقدم بإستقالتو ..
أما في البلاد (المتعسمة) زى حلاتنا فالمسئول ما عندو حاجة يمسكوهو منها .. فيمكن للمسئول أن يقول الحاجة وما يعملا .. وبرضو ممكن أنو يعمل الحاجة وما يقولا .. وكمان برضو ممكن لا يعمل الحاجة ولا يقولا .. الحاجة الوحيده الما ممكنة هي إنو المسئول عندنا يقول الحاجة ويعملا !!
لو عاوزين أمثلة .. على قفا من يشيل .. هنالك بعض الأمثلة (تودي في داهية) لكني أعطيكم مثالاً (خفيفاً) واحداً لذلك الوزير المبتسم الذي صرح قبل سنين عددا عندما كان والياً بأن الفراخ سوف يصبح في عهد ولايتة وجبة شعبية فإذا بالفول اليوم يخرج من كونه وجبة شعبية ليصبح سعر أقل طلب فول بخمسة ألف !! ويذهب التصريح أدراج الفراخ أقصد الرياح !!
أيه لزوم الرمية الفوق دي كما يقول (أستاذنا البوني) .. لزوم هذه الرمية أعزائي القراء هو التصريح الذي أدلى به السيد وزير التجارة الأستاذ عثمان عمر الشريف والذي يفيد فيه بأن خروف العيد لن يتجاوز سعره الـ 450 جنيه أي والله 450 جنيه بس ! على الرغم من أن الجميع يعلم بأن أسعار (الخرفان) طايرة في السماء وفاقت (المليون) وكل ما العيد يقرب المسألة بتمشي في زيادة .
طيب .. هل الكلام القالو الوزير ده ح يعملو؟ العبدلله يعتقد إعتقاداً جازما بإنو الكلام ده مش ح يحصل إلا في حالة واحدة وهي أن يختف السيد الوزير رجلو للصين ويطلب من الصينيين صنع خراف صينية 110 فولت تنتهي صلاحيتها عند (الباع) العاشرة !!
طيب .. إذا المواطن المسكين (زي حلاتنا) صدق كلام السيد الوزير وضبط ميزانيتو على إنو الخروف بي 450 جنيه .. والعيد جا .. والمواطن ما لقى ليهو خروف بالمبلغ ده وقام جاتو (جلطة) من نقة (المرا) وسؤال (الشفع) ووقع (كاضم) في الحالة دي مش السيد الوزير مسئول من (روح) المواطن دي؟ يعني المسئولين ديل يصرحو سااااي وناسين الأرواح دي؟
المسئولين عندنا للأسف الاسيف ممكن يقولوا أي حاجة وممكن يصرحوا أي تصريح .. يتحقق ما يتحقق مش مهم .. شفتوا ليكم مسئول إستقال عشان تصريح؟ كل يوم طيارة بتقع ومفيش حد بيستقيل تقولوا ليا تصريح .. صرح يا عم ولا يهمك !
من ناحيتي فالعبد لله ح (يحول) للسيد الوزير رصيد بي 450 جنية ومعاهو وصف البيت ومطلوب من السيد الوزير أن يختو في أي بوكس وأنا بحاسب السواق !
كسرة :
السنة الفاتت قالوا الاضحية تجوز بالتقسيط .. أها المرة دي بالتقسيط ذاااتو مافي طريقة .. تطير عيشتنا نحنا .. ندفع أقساط المدارس وللا أقساط العربية وللا ندفع أقساط الخروف ؟
كسرة ثابتة :
أخبار ملف خط هيثرو العند النائب العام شنو(ووو وووو ووو)؟
الفاتح جبرا
ساخر سبيل
[email]gabra-media@hotmail.com[/email]
