الاولو شرط ..اخرو نور.
جيمس كود بار ..اخترعتو براي..عملتوا هسع دي…وح انتج ليكم في كل قضية
..(محقق) من رأسي ..عشان يشوف الحاصل شنو؟.
جيمس كود بار ..جاء من واشنطن ..عشان يحقق مخصوص في هدف ساني …المحقق
دا بعثته لينا الامم المتحدة.
قالوا في ابادة شاملة حصلت لكراسي (الرد كاسل)…وفي مجزرة بشرية حصلت
في الدقيقة (84).
الحضري لعب 8 نهائيات امم افريقية ..وحقق مع المنتخب المصري 4 بطولات
كأس امم افريقية ..وما اتسجل فيه هدف بالشكل دا.
الحضري ضبحوه عديل كدا ..بالهدف الذي سجله ابراهيما سانيه في الدقيقة 84.
والله انت يا عصام الحضري ..مفروض يركبوا ليك (درب) في العراضات القعاد فيها دي.
الحضري قاعد يعاين في القون ..زيو وزي (عمر حسن الامين) تاجر بقوليات في شندي.
زي تاجر الاقمشة حماد زين العابدين في الابيض.
ما فاهم أي حاجة.
عصام الحضري بعاين في الكورة وهي ماشه القون …تقول اخصائي عيون.
دا موضوع تاني.
خلينا هسع دي مع المحقق الامريكي الخطير جيمس كود بار.
المحققون الامريكيون طبعا في الافلام الامريكية ..بظهروا ليك في هئية خطيرة.
عارفين أي حاجة.
حافظين كل شيء.
ما في مجرم بقدر عليهم.
من طق طق …للسلام عليكم.
اي محقق تقعد معاه …بقول ليك : (احكي لي أي شيء …مهما كان ذلك
الشيء صغيرا)… ما قد تراهو انت (صغيرا)…قد يكون بالسنبة لنا نحن
المحققين كبيرا.
أي محقق بقول كدا ..في فيلم امريكي ..في فيلم هندي …حتى في الافلام
العربية ..اتعلموا الحركة دي ..(أي حاجة مهما تكون صغيرة احكيها لينا).
و…..
وسم اب درق البصقع جدرى القيع البفقع.
اصبروا يا جماعة انا الموضوع دا ماشي عليه …خلوني اول حاجة اكمل ليكم
قصة المحقق الخطير (جيمس كود بار).
قلت في الافلام الامريكية ..(المحقق)…بكون زول غامض ..لا بيأكل ..ولا
بيشرب …بلبس ليه (كاب)..ونظارة (سوداء)…وبتردد على مناطق
مشبوهة…وعندما يجلس في قهوة او مكان عام ..بدس وجهو بي (جريدة) ..وبعمل
فيها ما شايف وما سامع حاجة.
هسع جيمس كود بار …جاء يحقق في هدف سانيه ..بنفس جينات المحقق في
الافلام الامريكية.
زولكم جاء يعمل لينا هنا نفس الحركات.
وصل جيمس كود بار للخرطوم قبل 72 ساعة من المباراة ..ونزل في فندق 5
نجوم ..وحاول ان يكون مبتعد عن الاحداث.
ما عاوز زول يجيب سيرتو.
زول غامض كدا ..ما بتفهم منو أي حاجة ..وقت تلفونو يضرب ..بمشي يقيف بعيد.
الرسالة البتصلو ..بمسحها طوالي..(زول بديك احساس انو خطير من اول وهلة).
جابوا ليه (الفطور)..قال ليهم رجعوا فطوركم …انا لمن اكون بحقق في
قضية هامة ..ما بدخل لي شيء في خشمي.
ولا حتى (سمكة).
هسع السمك الدخلو هنا شنو؟.
ثم انتفض جيمس كود بار ..وقام ينظر لينا ..ويعمل لينا فيها ..انه خطير
..وانو فاهم أي حاجة …وانو الموضوع دا ما بفوتو ساكت.
موضوع شنو؟.
موضوع سانيه دا.
سانيه والكراسي.
اول يوم لجيمس كود بار في الخرطوم …اطلع فيه على كل الصحف الرياضية
..وبعض الصحف السياسية.
قال عاوز اشوف الناس ديل بكتبوا شنو؟.
اول حاجة اطلع جيمس كود بار على عمود مامون ابوشيبة …لقى ليك العمود
كلو (حكام).
ابوشيبة فاضل بس يجيب مشكلة ابيي.
ما خلى حاجة.
عندنا ضربة جزاء سنة 1996م.
عندنا جدعة تماس الحكم ما حسبها لينا سنة 1976م.
عندنا مخالفة في السنتر سنة 1980م.
كرت اصفر سنة 1970 مفروض ينالو امين زكي ..الحكم تغاضى عنه.
وعندنا اربعة كراسي مكسرة 2012م.
جيمس ..قال قبل خمس سنوات جيت السودان …لقيت ابوشيبة بكتب في نفس الكلام دا.
والله يا مامون ابوشيبة ضربة الجزاء (الوهمية) التى ارتكبها احمد النور
مع عبدالمجيد جعفر سنة 1996 مفروض تعمل ليها (حولية).
حفظتنا ليها حفظ.
مفروض تعمل ليها صيوان ..وذكري سنوية في ميدان المولد الكبير في الحلة الجديدة.
عبدالمجيد نسى موضوع ضربة الجزاء دي ..ابوشيبة …ما بنسى.
ينسي كيف؟..وابوشيبة دا أي حاجة مسجلها.
الغريب والمدهش …عبدالمجيد جعفر دا عنده اكثر من 50 هدفا مع المريخ
…ابوشيبة ما بتذكر ليه إلا ضربة الجزاء (الوهمية) التى لم تحتسب.
طيب يا ابوشيبة بالمنطق كدا.
نحن عندنا ضربة جزاء عديل كدا ..احتسبت ..والحكم صفر فيها …وحكم
الراية اكد صحتها …وزاهر مركز عاوز ينفذها ..(زيكو) شال الكورة وفات.
زيكو دا بيلعب في النيل الحصاحيصا؟.
لا.
بيلعب في جزيرة الفيل؟.
لا.
حي العرب بورتسودان؟.
لا.
وقت لا بيلعب في النيل لا في جزيرة الفيل ولاف في حي العرب بتتفاصحوا فينا مالكم.
اها يا جماعة …الاحق بالتوثيق …ضربة جزاء وهمية لم تحتسب ..ام ضربة
جزاء حقيقة ..احتسبت ولم تنفذ ..عشان ناس المريخ انسحبوا.
جيمس كود بار ..وضع ليه دائرة حمراء في جملة من جمل مامون ابوشيبة
..ومشي شاف ليه عمود تاني.
امس العزيز مامون ابوشيبة كتب عن حكم المباراة الفاضل ابوشنب …( بويا
كان يستحق انذارا لمخاشنته العنيفة تجاه قلق ، وكذلك بكري لمخاشنته
الحضري لحظة استلام هذا الاخير للكرة).
يعني دا كلو ما مسكوه على الحكم.
طيب يا ابوشيبة …الزول الضرب بكري المدينة (شلوت)…ضفر ام نجم الدين
بستحق شنو؟.
وسام النيلين من الدرجة الاولى.
بكري المدينة خليه.
نجم الدين الذي ضرب سانيه في عينو ..وكان عاوز يقدها ليه …(شوف
الصور)..بستحق شنو؟…جائزة نوبل للسلام.
ممكن يمنحوا نجم الدين جائزة نوبل للسلام …السادات منحوه جائزة نوبل للسلام.
علما ان احتكاك بكري المدينة مع العجوز عصام الحضري كان نتيجة لاستفزاز
الاخير للمهاجم السوداني بكري المدنية ..بعد ان ظل الحارس المصري يوجه
اساءات بالغة لاللاعبين ..وللجمهور السوداني ..انتهى بتلك الاحداث
الكارثية التى حدثت في استاد المريخ.
الحضري ..وليس الاعلام ..يقود الساحة الرياضية الي الخطر.
ويمكن ان ينقل ذلك الحارس الذي فشل اهلي القرن في تأديبه ..احداث
بورسعيد الى ام درمان اذا لم يجد من يردعه ويوقفه في حده.
و…
وسم اب درق البصقع جدرى القيع البفقع.
المحقق جمع كل المعلومات ..وبقى جاهز للتحقيق في هدف سانيه (الكارثي).
وصل المحقق جيمس كود بار الي ان ريكاردو ..يفتقد القدرة في التعامل مع المباراة.
وهو مدرب ضعيف في (ردة الفعل)..وهذا شيء يعيب المدربين
البرازيليين..كلهم فهمهم تقيل في التعامل مع المباراة.
وجاء في تقرير جيمس كود بار السري ..الذي حصلنا على نسخة منه ..(ينشر
لاحقا)…الاتي:
لذلك يفشل ريكاردو في التعامل مع المباراة ..ومع احداثها …وبسبب سوء
قرأته الفنية تلك كان السبب الرئيسي في ان يخرج الهلال من البطولة
الافريقية سنة 2007م..بعد ان كان الهلال الاقرب للكأس.
ويمكن ان نثبت ذلك في ان ريكاردو رأسو ضرب عندما اصيب ريتشارد ..وما
عرف يتعامل كيف؟.
وعندما ابعد المعز محجوب من المشاركة بقرار اداري …ريكاردو فشل في ان
يصنع بديلا له.
جمعة الان يلعب بدون خبرة ..وبدون تجربة ..وذلك لأن غارزيتو ..منحه
الثقة ..فكان في الموعد.
الشيء الذي يثبت عدم قدرة ريكاردو في التعامل مع المباراة …انه ظل
يفقد باستمرار امام الهلال في الشوط الثاني.
في مباراة القمة الافريقية الاخيرة …طلع ريكاردو (بطل) لانه تعادل مع
الهلال وفريقه مطرود منه لاعب.
وحقيقة الامر ان كل الذي يملكه ريكاردو مع الهلال لا يتجاوز (التعادل).
ريكاردو لو بالغ كدا بتعادل مع الهلال.
وقبل شطارة غارزيتو ..احسب ان (بلادة) ريكاردو هى التى منحت الهلال
نقطة ..كان يمكن ان تكون من نصيب المريخ ..حسب ظروف المباراة.
ما اريد ان اثبته ..وما جاء في تقرير المحقق الامريكي جيمس كود
بار…هو ان هدف الهلال جاء في الدقيقة 84 من عمر المباراة.
قبل الهدف كان المريخ قد تعرض لضغط رهيب من الهلال..كان نتاجه عدد من
المخالفات على رأس الخط …اضافة الي 7 ضربات زاوية متتالية في زمن قصير.
هذا الضغط جعل ضفر وباسكال في حالة اقرب من حالة محمود عباس العقاد في
شذى زهر (وبي سكر تملكني وأعجب كيف بي سكر).
اما نجم الدين فقد تسبب ذلك الضغط في اصابته ..وقد سقط وحده امام
الحضري ..فاخرج للعلاج واشار طبيب المريخ وهو في الملعب باشارة للجهاز
الفني لاستبدال نجم الدين.
لكن عشان ريكاردو فهمو بجي متأخر …ما اشتغل بالموضوع كتير ..رغم
الضغط الذي كان يتعرض له المريخ وقتها.
المباراة كان متبقي لها 6 دقائق ..كان يمكن ان يدخل البديل (بلة جابر)
حتى بدون ان يسخن.
يعني شنو؟.
بقت على (التسخين) يعني.
او كان يمكن ان يرجع أي لاعب ..من الوسط او المقدمة ..ويسد مكانة نجم الدين.
لكن لا هذا ..ولا ذاك حدث.
وكان نتاج ذلك الشرود الفني ..وضعف خبرات لاعبي المريخ ..(بما فيهم
الحضري) ان جاء هدف سانيه والمريخ بيلعب بـ (10) ..وخانة نجم الدين فاضية
..لم يرجع حتى لاعب اخر من المريخ …ليلعب في مكانته …علما ان (نجم
الدين) كان شايل دفاع المريخ.
تذكروا ..الضو قدم الخير مع المنتخب الوطني عندما كان يدربه اوزريك
…في اللحظة الذي خرج فيها الضو مصابا ..سجل لاعب المنتخب الزامبي هدفا
في السودان.
هذا ما حدث في هدف سانيه ..الذي جاء بسبب خروج نجم الدين ..لأن الكورة
المعكوسة …لعبت في المكان الخالي الذي كان يتواجد فيه نجم الدين (الذب
ابعدته الاصابة) ..فجاء الهدف.
واتكسر نتيجة لذلك 487 كرسي.
487 كرسي ..الكرسي ينطح الكرسي.
اول مرة انا اشوف لي (كراسي) بطّير.
المحقق جيمس كود بار ..كتب تقريره ..هذا وسافر ..قال ما بقعد في البلد
دي كمان يقوم يجيني كرسي طاير.
شفتوا المحقق دا خطير كف؟.
ونحن سكتنا على كدا.
و…
سم اب درق البصقع جدرى القيع البفقع.
غايتو سانيه دا اثبت فعلا انه (سم اب درق البصقع)…قالوا ليك في 50
مشجع اصيبوا في المباراة.
عارفين الاصابة شنو؟.
اصيبوا بي (تسمم).
انتوا يا جماعة داخلين المباراة دي تتفرجوا ..وإلا تأكلوا.
اول مرة اشوف لي (فرجة) بتسبب ليها تسمم.
بطنكم طمت من هدف ساني …(البفقع).
تاني ما اشوف لي مريخابي بشتري ليه في (بطيخة).
انتوا (الفقيع) دا ما بتطيروا منو؟.
ملحوظة : والله المباراة دي ناقصة (المطرة).
هوامش
ريكاردو في المريخ ..بقى يغضب ..وينفعل.
ما كنت كدا يا ريكاردو.
ناس الحضري ديل بخربوا طبعك.
محمد فضل الله ..معلق المباراة ..بعد هدف رمضان عجب ..عاوز يأكلنا في عشرة دقايق.
الدقيقة 24 من الشوط الاول..قال الدقيقة 34.
الحمدلله ما قال لينا الدقيقة 34 من الشوط التاني.
المريخاب ديل ممكن ياكلونا شوط كامل.
انتوا ما شفتوهم بعد الشوط الاول …رفضوا يرجعوا.
عاوزين يمشوا البيوت على هدف رمضان عجب.
عارفين في الشوط التاني بتحصل حاجات.
سانيه يضربوا فيه المباراة كلها ..جاب ليه قون.
الغريبة اللاعب الكان بضرب فيه …(نجم الدين)..فتر من الضرب ..وخرج مصاب.
سانيه دا ما شاءالله.
لو ضربوه بي صاروخ ما بقيف.
هسع لو كان سادومبا لاعب كان حصل شنو؟.
والله كان كرسي ما بتطلعوا بيه.
احمدوا الله.
والعجب لو كان هيثم مصطفى حفظه الله …(مشارك).
كان اهداف المباراة إلا نسحبها بي آلة حسابة.
ناس بابكر سلك ديل ..بقعدوا يغالطوا.
السنة كلها يغالطوا.
ضفر بعد المجهود الذي بذله في المباراة ..ما اظن تاني يلعب.
الزول دا دفق لياقتو كلها في المباراة.
قالوا ليك (سانيه) بدل فانيلتو 9 مرات.
كل ما يلبس واحدة ..ناس نجم الدين يشرطوها ليه.
انا الليلة كتبت ليكم عن سانيه ..وهدفه والمحقق جيمس كود بار.
بكرة ان شاءالله نتحدث ليكم عن الحضري ..ومهند الطاهر.
مهند الطاهر دا عاوز يرجع (الحضري) وإلا شنو؟.
شكلو كدا ..زهج منو؟.
غارزيتو مدرب شاطر …لكن غتيت.
والهلال ممكن يضحي بالمدرب الشاطر ..اذا كان غتيت.
غارزيتو دا بي قوة رأسو بضيع.
بروح فيها.
اتمنى ألا اسمع اليوم او غدا عن سفر ايكانغا.
ايكانغا ..يسافر ..ويلعب.
حكاية جاهز ..وما جاهز دي …ما بتشغل بيها.
جاهز وما جاهز دي ..بطبقها غارزيتو فقط مع هيثم مصطفى.
في واحد سليط.
واحد عجيب.
واحد غريب…قال لي يا اخي ما تشوفوا لينا (الرئيس) في حكاية ابعاد
هيثم مصطفى من تشكيلة الهلال.
يا ربي الرئيس ما بقدر يلعب لينا البرنس.
لو عاوزين الكأس ..لعبّوا هيثم مصطفى.
بدون هيثم مصطفى ..وبهذا الشكل ….كأس الكونفدرالية الله اعلم.
ممكن ننتصر على الاهلي شندي.
على المريخ.
على انتر كلوب.
لكن دور الاربعة ..والنهائي ..عاوز تكتيك خاص.
الهلال محتاج لهيثم مصطفى.
يا غارزيتو ..ما صدق.
الهلال مع انتصاراته تلك ..لم يكن مقنعا.
قبل دا كلو ..ألحق دفاع الهلال.
جمعة دا فتر ..من (ظروفكم) دي.
عاجل : مباراة القمة الافريقية قبل العيد بايام معدودة ..شكلها كدا
..(ضحيتنا) طلعت.
وإن طال السفر – صحيفة قوون
مقالات ذات صلة
-
-
-
-
-
-
-
-
