لكن لم يعد للأعوام قيمة ….عام يمضي …عام يأتي ….وأعوام تنتظر ….وخارطة الوطن تنحسر ….وقيم ومسلمات تندثر ….ونفوس الناس تنكسر ….ونزيف مستمر مستمر ….و……
قبل سنوات نظم الشاعر الكبير عزالدين هلالي قصيدة في اليوبيل الفضي لاستقلال السودان …وأعيد نشرها قبل عامين في موقع من المواقع ….واستوقفتني بعض أبياتها…فحدثتني النفس الأمارة بالسوء أن أحاكيها ،ولم يكن خافيا علي نفسي هذا التطاول نحو قامة لا ولن تدانيها…
ووقفت عند مقولة أرسطو في تعريف الشعر وأنه محاكاة ،فماذا تكون محاولتي ؟ محاكاة المحاكاة؟! ومهما كانت مطابقة الظل لصاحبه لكنه يبقى ظلا…هو شاعر وأخشى أنني متشاعر….ذاك موهوب واثق في موهبته وأحسبه يردد بيت المتنبي :
أنام ملء جفوني عن شواردها *** ويسهر الخلق جراها ويختصم
ومؤكد أنني أحد هؤلاء الخلق و…أعتذر للشاعر وأتعشم أن يقبل اعتذاري عما قد يراه عبثا …لكن عذري أنها كلمات خرجت صادقة ….
وأين الآن شاعرنا الكبير…ليته كتب أيضا في العيد الذهبي لنرى كيف انتهت أمانيه ؟ والعيد الماسي تقاربت سنواته فليته يتحف الوطن بقصيدة فيه ….ومن يدري ! لعل الحال حينئذ حال سعد !
يقول الشاعر في هذا الجزء :
خمسة وعشرين سنة من عمرك
ولسه بنحلم بالأوطان
لسه بنحلم يا إنسان
لسه بنحلم يا السودان
لسه بنحلم بي أزمان
فيها الخير في كل مكان
وفيها الحب للأرض الحبلى
وفيها الوطنية الأوطان
لسه بنحلم بي أزمان
فيها الخير في كل مكان
وفيها الحب للأرض الحبلى
وفيها الوطنية السودان
وأقول :
وأخويا … ولد وطني
أملو كبير وراجي الخير..
قول ليا يا أنت ؟
حصل ذقت لبن الطير؟!
رضعتو أنت صغير؟
لاقاك وأنت كبير؟
قول ليا بالله
وين هن دلايل الخير؟
من الماضي ؟
سنينه طويلة
كان في أيد الغير
من الحاضر ؟
حاضرنا كئيب
لو ليهو طعم !
طعمه مرير
ومستقبلاً مجهوووول
ما باين ليهو مصير
وما تقول ليه التشاؤم دة ؟
أنت براك عاين وشوف
البلد حاكماها ظروف
تلف وتلف وعليها تطوف
وليل الشوم ظلامو كثيف
وعشعش فوقا ضل الخوف
نقول بلوعة الملهوف
الصبح يجيها متين ؟
والله حقيقي ما معـــــــروف
وبرضو عاين شوف !!
قادتنا لسه متحــــــاربين
مرو سنين وجايانا سنين
وبرضو القادة متناحرين
كل واحد…..
شايف أنو ياهو الحق !
والباقي غلطانيييييين !!
ويمر العام
ويجر وراهو مية عام
وتفرق بيننا الأيام
وتزيد جراحنا آلام
وتشقى نفوسنا بالأوهام
ودايماً هنااااك واقفين
ما في خطوة لي قدام
خطواتنا ….
ديمة عليها مرتدة
بعييييدة …
مد البصرممتدة
كل يوم لي ورا … وراجعييين
ومختلفين
ومتكاتلين
سنيييين وسنين
ساخطين وقرفانبن ومكتئبين
بس لمتين ؟ وبس لمتين ؟
خلااااص ما بقى عندي كلام
كل واحدن حر …
راضي أو غضبان
مؤمل أو قنـــعان
صاحي أو حلمان
يحلم متل مايريد…
هي الأحلام بقروش ؟ !
أحلم كمان يا أخوي
أحلم كمان وكمان
ياااأخويا …. يا العشمان
وتصحا من حلمك
تلقاهو قدامك
بلدن رفيع الشان
بس أنا بذكر
وأذكر كل زول غيري
لو صابنا يوم نسيان
المثل بيقول :
عز البحر تمساح
وعز الخيل لجم
وعز الحريم وليان
أزيد عليهو وأقول :
عز الشعوب أوطان
وماتنسوا ياأخوان
عز الشعوب أوطان
عز الشعوب أوطان
وطني ياهو يا السودان
نفسي مسكونة بالسودان
وروحي تعشق السودان
عز الشعوب أوطان
وعزي فيك يا سودان
قبري في تراب بلدي
وبلدي ياهو ده السودان
غريب الدارين
-
-
-
-
-
-
-
-
