استغفر..
كفاك بكا..
مادام شالوك..
خلاص أمشى..
منوا الظلموك ..؟
ما نحن ..
عشان تحكى..
الفينا ..يكفينا..
ومولانا يحمينا..
ليهوا الخلوق تشكى..
تفوت إنت..
يجى التانى..
والتانى برضو بفوت..
منوا الخالد..
ما دام مصيرنا الموت..
ما دائم إلا الدائم..
وين هامان وزير فرعون..
موسى..والوزير هارون..
وين قارون..
سيد )المعادن( صاح..
عنده الدهب مفتاح..
بلا تنقيب..
ما تخليك زول بكاى..
ما دام إنت زول سواى..
وما حداث..كيف تعتذر..
هم قالوا ليك باى باى..
ما تنتظر ..
ما برجعوك ..
مش كان بكيت..
ما بسمعوك..
كان صحت أو ناديت..
دموع عينيك خسارة..
قلبك أبيض.. قلت طيب..
لكن يا خى الوزارة..
ما بالطيبة..
وما بتنفع معاها شطارة..
بكرة وزير ..وبعده وزير..
كل القصة زى نقارة..
فى قمرا..
تنطط فيها جوة الدارة..
تمرق..يخش غيرك..
جائز تخش تانى..
يمكن لا..
أو زول راكبلو طيارة ..
مصيروا نزول..
خلاص أنزل..
ضوقا كيف عيشة البصارة..
كفاك يا زول ..
ما تبكى..وبطل الجوعارة..
صحيفة الجريدة
ع.ش
مقالات ذات صلة
-
-
-
-
-
-
-
-
