البرنامج ده بقي بالتحديد مرجعنا عشرين ميل لي ورا …وشخصيا اعتبروا برنامج يشجع علي العنوسه وبوار العروسه
برنامج خاوي وخارطه طريق حقيقيه للتبزير …
يبدأ البرنامج بما يعرف ب(هديه ليله العمر)وهي مقدمه من بيوتات تجميل وشركات اعلانيه لزوجين يتم اختيارهم اعتقد بدون محسوبيه …
ويجيبو اشني عروسه ويبدو يصنفروا ويعدلوا ويشدوا ويرخوا ويمطوا ويمكروا…… والله خير الماكرين
بعد دقائق يجيبوا العروسه بشكل تاني وسرعه تانيه وامكانيات تانيه(تقول ركبوا ليها رامات وغيروا ليها الهاردسك)
بالنسيه لي الامر عادي لاني وغيري كثر يعلمون بان راس مال هذه الدميه كوز مويه وتعود لطبيعتها , لكن لاحظ لاي فتاه عانس بجانبك تشاهد البرنامج ومدي الدهشه والذهول علي وجهها وستعلم انت(نفسها في ايه.!!)
ونحن هنا لانطالب بايقاف البرنامج لتاثيرها علي مشاريعنا المستقبليه فقط نطالب بتنويه بسيط في الحلقه كالآتي:
(((نرجو عدم تجريب هذا مستقبلا فجميع الشخصيات بهذا البرنامج وهميه )))
اعود لما شاهدته في الحلقه تقريبا ثلاث مناسبات مسجله…
-الاولي من السعوديه:ناس نايرين والحفله تقول منقوله من محلات صايغ (الدهب من الكوع للبوع)واي زوجه ماده يدينها قدام (تقول تفتيش ااظافر في طابور الصباح)والازواج قدام كل زول بي عمه وشكلهم كده ماجايين قريب والله اعلم.
– المناسبه الثانيه-من المنشيه صاله مغلقه وحسب مافهمت العريس في سويسرا وماحاضر العرس (مشغول)(ده كلام ابو العريس)..وشكلهم كده مرسلنها مع الملوحه والويكه (غايتو انا اتخيلت يلفو العروس في طرد ويكتبو (عاجل وخاص)
العرس الاخير -الدروشاب ناس كده شكلهم لمت فيهم الكتاحه بتاعت اليومه ديك عريس(اغبر اشعث) وعروس(تقول حيطه عيد ضربوها جير ولمت فيها مطره ) وشها سايل وحالها مايل……..والعجب المعازيم كانهم راجعين من حرب (دافس والغبراء)
ده كلو كوم واللقاء مع العرسان كوم من الغيظ والهباله والعواره.
عروسه لافض فوها وانشاء الله ترجع لي ابوها ماذا قالت(واهدي زواجي لكل الاهل ولكل الشعب السوداني)…..!!! عليكم الله ده ماشئ يستدعي تدخل البرلمان ؟؟؟؟؟
ليه انتي قرار بالغاء رفع الدعم عن المحروقات ……..مثلا …؟؟؟
الكاتب الساخر : لؤي شرفي
-
-
-
-
-
-
-
-
