صبَرنا كتيير..
عليكم صبُرنا فات الحد..
صبَرنا سنين ..
كتيرة ما بتنعد..
صبُرنا كِمل..
وهاكم منى الكلام الجد..
انقطع الحبل..الطويييل..
البينا كان ممتد..
باب المتعة الزمان مفتوح..
خلاص دايرنوا ينسد..
أصلاً ما مهم ..
خليها محل رهيف تنقد..
قال صابر..
وما عارف منوا الصابر..
شنو الجابرك عشان تصبر..؟
ومنو الصابر على التاني..؟
كلام ما بشبهك يا مهدي..
حقيقة ..ده الخلاني..
أتعجب براي وأسأل..
يمكن رقمي ما وطني..
يمكن قايلني يوناني..
فرقك منى ياخى شنو ..
عشان تصبر علىَ..
أنا برضي سوداني..
من ثديك يا بلدي راضع العزة..
وموية نيلنا ساقياني..
عائش في رحاب وطني..
وخير ربي البيهوا خصاني..
وزماااان جدي وصاني..
ما أستفز الغير..
واسلك دروب الخير..
وأحفظ عليَ لساني..
وتاني
علينا ماتصبر..
نصبر نحن بنعاني..
على الحال البائنة ..
زي عين الشمس..
يشوفه القاصي والداني..
كفاية وسيبوا تهديداتكم..
بلادي الفيها يكفيها..
تعالوا ويلا نبنيها..
ونسأل ربي يكفيها..
شر خلقوا.. والطامعين فيها..
صحيفة الجريدة
[/JUSTIFY]
مقالات ذات صلة
-
-
-
-
-
-
-
-
