قصتي مع أول وظيفة لي بموقع إنترنت مشهور وفكرتي التي عادت بملايين الجنيهات للموقع

بعد المعاينات تم إختياري وتعيني في وظيفة أدمن خدمة الزواج وبعد التدريب لقيت الشغلة ما صعبة وإستلمت العمل كان عليا أن أعتمد الأعضاء الجدد ومراقبة وتنظيم الصفحة وتلقي بلاغات وشكاوي الأعضاء صراحة أكتر حاجة كانت مزعجة بلاغات عن شباب مشاغبين بيدخلوا الخدمة وغرضهم شئ اخر وليس الزواج وبيرسلوا رسائل بذيئة للبنات وكانت مهمتي حذف عضوياتهم وصراحة الشغلة دي أتعبتني وزهجتني ياخي مفروض أكون مفتح 24 ساعة وبقي ما عندي أي وقت حتى أشوف حسابي في الفيس وخلاص كنت داير أقدم استقالتي هههههههه بعد شهر من الوظيفة.

المهم بدأت تجي رسائل شكر للموقع شباب وشابات إتعارفوا عن طريق الموقع وتم زواجهم شوية رفعت روحي المعنوية وبديت أفكر كيف ممكن تتطور الخدمة ونبعد الناس الغير جادة لأنو قصة الحذف ما جايبة حقها بعد تحذف الزول تاني بيجي يسجل بإسم جديد. المهم جاتني فكرة وطوالي عرضتها للمدير قلت ليه أنا بقترح ان عضوية الاولاد تكون بقروش والبنات مجان عشان إثبات الجدية وكدا .

المدير كان في الأول غير مقتنع لأن خدمات الموقع كلها مجانية وأنا أصريت على فكرتي وبعد الحاح اقتنع المدير بالتجربة لفترة محدودة. وطبقنا النظام الجديد أي ولد ممكن يسجل في الخدمة لكن لو ما دفع ما بيقدر يراسل البنات وعملت الرسوم مبلغ بسيط 49 جنيه لمدة 6 شهور طبعا مافي زول ما جادي ممكن يدفع كلو يوم 49 جنيه ويشاغب والحمد لله إنضبط الموقع بصورة ممتازة ووقفت بلاغات الشغب والرسائل المزعجة والأولاد والرجال الجادين بداوا يدفعوا هههههههه والله أنا لي اسي ما مصدق .

وبعد شهرين من التجربة أصبح الشباب يشتركوا بأعداد كبيرة ويدفعوا الرسوم .لمن المدير شاف النتيجة ما صدق هههههههه خدمة الزواج الكانت مجانية اصبحت تجيب مبالغ ممتازة للموقع طبعاً المدير إنبسط شديد مني وزاد لي مرتبي ..

وأهم حاجة أنا أسي مرتاح في إدارة زواج النيلين أحد الخدمات المقدمة من موقع النيلين وحسيت إني قدمت فكرة أفادت الموقع ومستخدميه . وأي زول منكم أكيد عنده أفكار ممكن تطور العمل في المؤسسة التي يعمل بها. نصيحتي ليك ماتخاف طوالي أدقش مكتب المدير وقدم ليه أفكارك جد ممكن تساهم في تطوير مؤسستك ولو المدير جدع أكيد ما حا ينساك بزيادة المرتب و الحوافز. والدعم المعنوي من المدراء البخلاء أقل شئ بتطلع بيه .

عبدالله حماد مدير خدمة زواج النيلين