فقال حاج خضر بخوف: يا سالم ويا سليم أنا أبوكم البحبكم .. دحين خلو ود شنباوي العاق دا براهو مع اسدو الأكل نص لحمة الجزارة وتعالوا لي !!
فرد سالم بثقة: معليش يا أبوي انت الإضطريتنا لكن بضربك لينا بسوط العنج وحرمانا في كثير من الحاجات على كل حال نحن وبما أنك مقتدر حناخد منك مائة الف جنيه ندعم بها أبحاث الأطفال المستقبلية وقال حسن ود حاج بابكر بحماس ونحن كمان حنأخد من أبونا مائة الف برضو يومياً!!
فأمسك حاج خضر بيد حاج بابكر وقال له بصوت يشبه البكاء: يا حليلنا يا اخوي يا حاج بابكر بعد ماكنا بنحكم الناس كلهم وكلمتنا ما بتقع الواطة.. أصبح اولادنا يحكمونا اليوم!!
فقال حاج أحمد بحزم : يا سعد انت ولد عاقل سيب البتعمل فيهو دا وأسمع كلام أبوك !! فرد سعد بثقة أنا ما بعمل كدا عشان خاطري أنا ولكن عشان الأطفال كلهم ومستقبلهم في العالم ودا عاوز مننا تضحيات..!!
فضحك ود الفكي ضحكاً شديداً.. وقال بشماتة والله جاء اليوم البشوفك فيهو منكسر يا حاج خضر.. طول عمرك مفتري وربنا سلط عليك أولادك المرة دي.. والله يا اولاد أنا معاكم ومستعد لتنفيذ كل ما تطلبوا مني!!
فقال حاج خضر بسخرية: شبيهينا وإتلاقينا ياهم زيك وعقلك ذي عقلهم
يا أبوي ما في داعي للإهانة انت قنعان من خروف تاني ولا عجل من جزارتك أصلو أُسرنا دا ما بشبع أصلو ومستعد يأكل جزارتك كلها!!
فقال سالم: يلا يا أبوي ايديك على مية الف لدعم اختراعات الأطفال!!
فأدخل يده في الدرج وأخرجها ومدها الى سعد وهو يرجف من الغضب وقال بصوت خافت إن شاء الله أسدكم دا بنقلب عليكم ويأكلكم كلكم بما فيكم سالم وسليم أولادي العصوني ومشوا مع أولاد شنباوي!!
وكذلك فعل حسن مع والده حاج بابكر فمد يده وهو يبكي فبكى معه حاج محمود وسأله حسن عارفين أبوي يبكي عشان دفع وانت بتبكي مالك!!
فرد من خلال دموعه: من فرحتي أنو ما عندي اولاد ولا كان دفعت قروش زيهم..
فصاح ود الفكي بسعادة ياناس الحلة هوووووي اولاد شنباوي عملوا شىء أشبه بالمستحيل وحولوا التور لحمل وديع «وهو يقصد حاج خضر» وحكموا الأشناب والدقون.. يلا أسمعوا الأطفال يحكمون العالم وأولهم المفترين الظالمين!
يوميات ساخرة – الوطن
[email]samird4d@hotmail.com[/email]
مقالات ذات صلة
-
-
-
-
-
-
-
-
