المشكلة كمان لو كان البرنامج لاحد شيوخ الفتاوي الطائرة الذين يختلط عليهم الامر بين العادة الموروثة والشريعة ولا يفرقون بين حق القوامة وحق الرجالة والعين الحمرا ودا بالضبط اعتقد انو الحصل في الايام الفاتت لما اتصل زوج سعودي زعلان من زوجته ومليان للسدادة وابليس قاعد يرقص بريك دانس في راسو .. الفالح قام اتصل على احد البرامج اياها واشتكى للشيخ من ان زوجتو ما بتسمع كلامو وراسا ناشف لانو طلب منها تقعد في البيت وما تشتغل عشان هو غني ومقتدر وبيقدر يكفيها حوجتها ويزيد لكن المرا المسلطة ابت قعاد البيت لانها سيدة اعمال وعندها محلات بوتيكات وكوفيرات وكمان عندها فروع في مدن اخرى .. المهم الولية ضربت لي زوجها وقالت ليهو انها في المطار ومسافرة الرياض عشان تشرف على محلاتها الهناك .. زولك ما كضب خبر قفل منها السماعة وضرب للشيخ في البرنامج … اهااا قول كدي يا مولانا افتى ليهو بأن زوجتو دي ما اهل للثقة وتصرفاتها تدعو للشك .. الشغالة ليها شنو وزوجها عني ومرتاح؟؟ عشان كدا افتى ليهو بضرورة تطليقها فورا فما كان من صاحبنا الا ان رمى يمين الطلاق على زوجته على العواء مباشرة .. طلقة جوية صاروخية نافذة والشهود عدد كل المستمعين المتابعين للبرنامج .. عاد عليكم الله جنس دا يقولوا فيهو شنو ؟ زول يفتي بدون ما يرجع للطرفين ويسمع ليهم الاتنين ! زول يشكك في اخلاق زوجة ويشين لسمعتها وهو لا يعرفها ولم يستوثق من كلام الزوج الذي ربما كان متحامل ومزودها حبتين بدفرة من ابليس خراب العامرة ! الزوجة حتى لو كانت ناشز مش في خطوات لاصلاحها تبدأ بالعظة والهجران ثم الضرب ولو دا كلو ما نفع يجيبو حكم من اهلها وحكم من اهلو ولو غلبهم الاصلاح يحكموا بتفريق الزوجين .. لكن جنس الفتاوي دي الله يعينا عليها .. باقي لي شيخنا دا موجوع من زوجتو شديد وواقع في نفس مشكلة صاحبنا عشان كدا قال احسن ادق المربوطة عشان اقرع حقتي الجافلة[/JUSTIFY]
منى سلمان
[email]munasalman2@yahoo.com[/email]
