فنظر المسؤولون الى بعهضم البعض وطال الصمت فنظر الدكتور شنباوي الى وكيل الوزارة وقال له تكلم بصراحة!!
فقال الوكيل بإرتباك.. ياسيادة الوزير الوزارة تعاني شح في الموارد وعجز بلغ مليارات الدولارات وبصراحة كدا الخزينة فاضية وكل الوزارات الثانية مادا يدها والعاملين بالدولة ينتظرون رواتبهم وبعض القطاعات لم تصرف منذ ثلاثة شهور
بصراحة الوضع صعب جداً جداً..
فوجد الدكتور شنباوي نفسه في حيرة شديدة وبداية غير مشجعة مطلقاً فنظر لكبار الموظفين والمستشارين وسألهم وماهو الحل !!
فرد احدهم قائلاً بصراحة لازم نرفع الدعم عن كثير من السلع وتفرض ضرائب جديدة و…!!
قاطعه شنباوي: دا كلام شنو هو الناس كدا ما متحملة تقوم تزيد عليها المعاناة!!
فرد المستشار: زي ما قلت لسيادتك مافي موارد كافية كنا نعتمد على البترول وحسع خلاص انتهى والزراعة عائدها قليل والصادرات بسيطة ونحن عندنا مثلاً عشرات مصانع الأدوية وبنستورد معظم الأدوية حتى الأسبرين والبنادول وكذلك اللحوم والسكر والقائمة طويلة ومافي حل غير الضرائب!!
فرد د. شنباوي بإستسلام خلاص حضروا لي اسماء لضرائب معقولة يمكن فرضها على الشعب!!
ورجع د. شنباوي الى منزله مهموماً فوجدته فوزية على هذا الحال فقال لها بصراحة انا انصدمت ووقعت في مصيبة كبيرة ومسكت لي وزارة مفلسة دايرة تزيد المعاناة على الشعب!!
فردت بسرعة: طيب ما تستقيل!!
فقال يضيف : وزير يستقيل بعد يوم واحد دا حيعمل مشكلة كبيرة في الحكومة ويكشف المستور..
وفجأة سمع طرقاً على الباب ففتح الخادم وأدخل الضيوف للصالون فذهب اليهم د. شنباوي فوجد حاج احمد ومعه عبد الكريم وحاج خضر فقال حاج احمد برقة: متأسفين ياسيادة الوزير لكن عبدالكريم دا جاتو ضرائب دخل شخصي وهو يا دوب ليهو شهرين في الشغل وبعيدين عاوزين منو مليونين عوائد ونقابات وهو حق الكهرباء ما قادر عليهو فقلنا نجيك عشان تحل ليهو مشكلة دا برضو جارك وعشرة سنين.
فقال شنباوي في نفسه حبيتك يا عبد الغني تعيني لقيتك عاوز اليعينك دي القشة القصمت ظهر البعير وأول فضيحة وزير ما قادر يحل مشكلة مواطن حيحل مشكلة بلد بأكمله..!!..
يوميات ساخرة – الوطن
[email]samird4d@hotmail.com[/email]
مقالات ذات صلة
-
-
-
-
-
-
-
-
