شن طعمكم ؟

وصلتنى هذه الرسالة من ( د. سارة) طبيبة إمتياز ، أقدمها لكم كما هي دون أى (تعليق) :
هى بضع كلمات من جمله خاطب بها احد الاخصائييين بمستشفى ……………………… مجموعه من الاطباء العموميين فى قسم الجراحه معايراً إياهم بكثرة أعداد الاطباء الذين يتمنون القليل مما اتيح لهم وهى (فرصة العمل).. حتى تكتمل الصوره دعنا نسلط الضوء على الجمله كامله وهي :
“انتو شن طعمكم و شن نغمكم الزيكم آلاف فى البيوت متمنيين يشتغلو”
الكلام الدراب دا إتقال فى اللقاء الصباحى للجراحيين “يعنى بحضور مشايخ الجراحه ومباركتهم”… الحقيقه إنو العطاله “بنبذو بيها” ودا موروث شعبى معروف لكن دا لما كان العواطليه فى الحله بتعدو على الاصابع ” هسى زى الآلاف دي يلقو ليهم اصابع وين ذاتو” لكن لما تتعكس الايه يبقى احسن نشكر الشغال ونسكت..
ما علينا ماااااا علينا لانو العطاله دى بحر كبير كان دخلنا ما بنمرق منو.. العلينا الطبيب اللى يمكن دخل الكليه وإتخرج جراح من النوع أبو طعم ونغم غير شكل! يعنى المستفز فى الموضوع إنو هذا الأخصائى تكلم فأسمع و تعدى ولم يابه لصغيير أو كبير ,, وجلجل بكلماته فى تلك القاعه فأنتقل صداها زي ما كان عايز وأكتر فلم تحصرها حيطان القاعه وطرف السوط هبشنا, هبشنا مجندين متبطرين على نعمة التجنيد, هبشنا مجهجهين بين المراكز و المستشفيات,, هبشنا فى قعدتنا فى بيوتنا راجين التلفون المحل ما مشينا ختينا ورقنا أديناهو ليهم وقالو لينا بنتصل بيكم وأتارى التلفون ما فيهو حراره.. والله المرحوم (القذافي) ما كان براهو القاعد (يهترش) و(يلخبط) ويقول كلام (بره من راسو) عينتو كتار بس ربنا من كرمه حصر دائرتهم…شيخ الجراحين والحمدلله لم يجانبه الصواب فالوظيفه دى الجميله المستحيله بس السؤال الدكاتره ديل الشال طعمم ونغمم منو؟!!
منو ما بعرف سوء معاملة المرأه ولا سوء معاملة الطفل وغيرها من المعاملات الخارجه عن العرف والقانون لكن اليوم نشهد عصر سوء معاملة الطبيب ومن اقرب الناس و فى مخيلتنا كنا فاكريين إنهم فاهمين معاناة الطبيب لكن للاسف المعادله طلعت ضاربه …. لو عايز تتعرف على نخب الاطباء الحكايه واضحه صغارهم من “الامتياز و النواب والعموميين” يقومون بتأدية كل المهام ويحصدون اقل الثمار و زياده عليها اجمل عبارات الثناء و التشجيع من كبارهم الاخصائيين وانا عشان ما اظلم الاخصائين حاقول كلهم بيسيئوا معاملة صغار الاطباء إلا من رحم ربى … يا جماعه (سوء معاملة الطبيب) حاجه زى المقرر تقراهو تقراهو وعمرك ماتنجح فيو ,, ما عارفه يعنى زمان فى الجامعه لما الواحد يتمهزل فى (الراوند) كان بيحس انو الدكتور دا لئيم و كعب و شرير لكن اتخيلو اتاريها كانت جرعات تطعيم و البحصل فى الامتياز وبعده دى كلها جرعات تدعيميه ,, فكلام انهم شريرين دا مبالغه لا ياخ الاخصائى دا زى ابوك بيعدك لمواجهة المجتمع! ولما اخصائى يقلع حزامو لطبيب إمتياز دا نوع من التوجيه الابوى ماتزعل دايرين مصلحتك المجتمع قاسى لازم تتحصن! ولما اخصائى يشهر بيك قدام العيانين دا بيحصنك لانو الحيلاقيك فى المجتمع اكبر! وتجى تقيف تدى العيان التعليمات يديك عين وانت فاهم وانا فاهم لسان عين المريض بقول شنو “دكاترة الإمتياز ديل عارفنهم ماعارفين حاجه” … ومن اسقط هيبة الطبيب إلا طبيب زي أبوه …. والله فترنا اي زول يعمل حاجه يقول زى ابوكم الاخصائى ابونا و زير الصحه ابونا والوالى ابونا و الرئيس ابونا انا أبوى واحد والتانى سيدنا أدم عشان كده حقو كلو مسؤول يقوم بمسؤولياته وشماعات الأبوه دى لا مكان لها من الإعراب البينا و بينكم حقوق واجبات يكفلها القانون ما بر وطاعه تكفلها صلة الرحم …. أما معركتنا مع المجتمع المما وعينا ونحنا بنستعد ليها دى أعملو ليها إتفاقية سلام وأرحمونا…
كسرة :
ما رضيت الهوان لنفسى يوما ولكن علمونا فى هذا المجال انه ” كلما إتكسر خاطرك قوى عودك”

كسرة ثابتة :
أخبار خط هيثرو شنو؟[/JUSTIFY]