* الذى أعجبنى فى تصريح البنا (وأنا دائما غير معجب بتصريحاته) هو كلمة (نحاول)!!
* المحاولة ممكن لكن تبقوا زى محمود دى صعبة والله العظيم !!
* شخصيا لو كنت فنان وجيت أغنى بخجل !!
* بخجل لانو ما ممكن أنا أكون فنان ومحمود فنان !!
* وحتى أكون أكثر صدقا : محمود مسخ لينا باقى الفنانين !!
* ومن هسه ياعاصم البنا إحنا واولاد حلتنا ما حنحضر (اغانى واغانى )!!
* الكلام ده عشان تكون عارف وما تتعب ساي وتجيب ليك ( قمصان وبدل ساي)!!
* ورد في الاخبار ان مجموعة من (الكلاب الضالة) اجتاحت مدينة بحري ونهشت وجوه القاطنين !!
* والله (بحري ) دي أدوها عين !!
* بحري بقت ما عارفة تلقاها من وين .. من الكلاب ولا من ( فنان الصافية)!!
* بحري مسحورة !!
* بحري دي شوفو ليها (بخور التيمان)!!
* قال الحارس عصام الحضري انه (إتبهدل أوى) فى المريخ !!
* أنا اخشى انا نشاهد (بهدلة الحضري فى المريخ) ضمن مسلسلات شهر رمضان القادم !!
* اخشى ذلك والله !!
* واي زول طبعا حر في (خشياتو) !!
* الزميل الاستاذ سراج الدين مصطفى اورد خبرا يقول ان (بطاقة )المهن الموسيقية مصنوعة من مواد رخيصة ولذلك هى تتلف سريعا !!
* عارف ياسراج الجماعة ديل بطاقاتهم دى بتكون مصنوعة من (منديل ورق صينى )!!
* ده ورق صيني !!
* إحنا كمان ما بنفرز الورق الصيني من الياباني !!
* قال ليك البطاقة ( بتتقشر ) زي البصلة او قل زي الموزة !!
* اول مرة في حياتي اشوف لي بطاقة (بتتقشر)!!
* بطاقاتكم زي غناكم!!
* المفروض اي زول بطاقتو تكون زي غناهو !!
* لو عملوها كده ناس احمد البنا ديل الا يكتب بيانات بطاقتو فى يدو !!
* صدقني يا احمد لو البطاقة بقت حسب الغنى انت ما بيكون عندك بطاقة !!
* كيلو الطماطم بقى بألفين !!
* البيعجبني في الطماطم انها لما تبقى رخيصة بتقع فى الواطة دَلْ !!
* اي زول بيقدر يشتريها !!
* لكن مشكلتنا مع اللحمة ستظل قائمة الى يوم الدين !!
* كيلو اللحمة استقر في (خمسين) جنيه !!
* والله أتقول لحم غزال !!
* كنت ومازلت لا أستحمل الطيب عبد الله وهو يغنى بصوته الفاخر اغنية (مسكينة المحبة)!!
* الطيب عبدالله (فنان) بمواصفات (طبيب) !!
* واغنية مسكينة المحبة هي من الاغنيات المدهشة والمميزة جدا!!
* استاذ الطيب عبد الله إحنا بنحبك في الله وهذا ما لزم التنويه وشكرا !!
* البت تمنح الولد ثغرة ومن بعد ذلك تقول ان هذا الولد (ما عندو أدب)!!
* هذه من اكبر مشاكل البنات !!
* اذا كانت البت (تقيلة ومحتشمة وخجولة ) لن يتلوم معها اي ولد مهما كان سلوكه وتصرفاته !!
* الولد عادة يعامل البت بذات الطريقة التي تكون عليها هي وليس هو !!
* عشان كده حقو الواحدة ما تعمل فيها بريئة ومسكينة والولد هو الكعب !!
* وزنقة زنقة وبيت بيت غير ناس (الكلاكلة) ماحبيت !!
* واهلنا بيقولوا : الفيهو طيب بنشم .. ونحن نقول : الما فيهو طيب برضو بنشم !!
* ويا الله مطرة !!
* مطرة فى عينك !!
* يا استاذة : الكلام ده قوليهو لزول عندو ضعف نظر !!
* لكن ما تقوليهو لينا إحنا !!
* إحنا (اولاد تسعة) ودافننو سوا !!
* و..و..
والجمال رأس مال !!
مقالات ذات صلة
-
-
-
-
-
-
-
-
