شاعرة سودانية تعاتب هيثم مصطفى لانتقاله للمريخ بقصيدة بعنوان شامخ يا هلال

شامخ ياهلال لو حتي هيثم فاتك ..
تتطهر من اخطائك وفرصة و جاتك ..
السويتا ما بتنفع ورااقده وحاتك ..
ياهيثم كفور زولاً بسوي سواتك ..

تاريخك هدمتو وكيف حتنفع تاني ..
كيف تتشابي للند والخصيم التاني ..
لا قلت الهلال ناديهو هو الرباني ..
جمهورو اصطفاك وانت اللي كنت أناني ..

الأزرق رعاك أهداك سمو وقيادة ..
أفنيت الشباب في دارو لعب ورياضة ..
ليه طعت الغضب خليتو يفعل هادا ..
ليه بعت الهلال شمتا ليه حسادا ..

باكر ببقي كيف .. كيفن دخول ناديهو ..
هل راسك شموخ .. ولا بتطاطئ فيهو..
بي يد الكرم .. بديك زمان.. وتديهو ..
بي نفس اليدين عقد الخنوع تمضيهو ! ..

يابلد الودار .. حتي المشاعر زائفه ..
اهتموا الجميع بي كوره زائله وهايفه ..
والبلد البقت مقسومه طائفه وطائفه ..
يوماتي بتموت و عيونا للموت شايفه ..

ليه غضبوا الجماهير والشباب في كوره ..
ليه ماغضبوا في الحاله اللي مامستوره ..
الليل مهما طال يابلدي وانتي صبوره ..
باكر بنهزم .. والشمس بطلع نورها ..