اتخيلو لما تجي داخل البيت بعد يوم ممل وطويل و سخانه وغبار ! وانت في الطريق بتفكر ان…و متييين تصل البيت عشان تديها نومه كده وبعدين تشوف الحاصل.
تقوم لما تصل البيت تجري من باب الشارع طوالي على المكيف ..وطبعاً الكهربا قاطعه !! بعد ما تخلص السب والشتيمه وتستغفر الله ..(وتبدا الخطه ب )تقوم تفتح الشبابيك والابواب وتكتفي الهوا حق الله ده ..وتشيل بشكيرك و تمشي تديها دش كده عشان ترطب حبه ! .. معقول يعني يكون مافي مويه !!؟ طبعاً ..اكيد ..انت قايل نفسك في الجنه !!؟ و تتواصل الشتايم ..وتنتقل لي الخطه ج ..تشيل كرسي تقعد تحت ضل شجره وكان الله يحب المحسنين.
و تفضل على الحال ده لحدي ما الشهر انتهي !..وماشي تجيب الكهربا والمويه ، تحصيل حاصل وكده.. و كويس انو عملوهم في حته واحده عشان الواحد ما يتمشور في الفاضي كمان ..ولما تصل تلاقي الصفوف الطويله و لازم يكون في بتاع هدف عامل فيها بنظم الناس مع انو من غيرو احسن.
لو سمحت يا استاذ ، ده صف المويه ولا الكهربا !!؟
والله ما عارف ..انا واقف لي صاحبي مشى يشتري عيش وجاي
طيب ..يا شاب عليك الله ده صف شنو !؟
صف بنزين ! يعني حيكون صف شنو يعني !!؟
مالك زهجان هسي ..قصدي مويه ولا كهربا !!؟
ما تقول كده طيب !..ده كلو سوا. ..
مويه وكهربا مش !!؟
– ايوه يا عمنا ..وحتما كبير يكون عندهم تحويل رصيد كمان لو داير ..
وبعد مرمطه في الصف و شكلتين تلاته مع الزول الخاتي طوبه ووحده مع بتاع الهدف الدخل قريبو في اول الصف ! و زي ساعه كده راجين الموظف عشان قاعد يفطر …اخيراً وصلت الشباك ..(دي دايره كرامه والله )
– السلام عليكم ..
– وعليكم السلام ياخ ..حرك سريع الصف ده طويل ورانا حاجات تانيه غيركم
يازول ما تقول بسم الله مالك !؟ انا سلمت عليك اصلو ولا اديتك كف ! عامل موضوع وجوطه ساي ! بعدين عندك حاجات تانية ولا ماعندك انا دخلي شنو !؟ بعدين ده شغلك يعني و وبعدين.
– يا عمك ..! ما تدينا خطبه عليك الله ياخ ..جيب قروشك خلينا نخلص ..
– هاك ياخ ..اها خلصنا ..
– كهربا ولا مويه !!؟
– كهربا ومويه ..
– طيب ما كان تفرز القروش الوقت الواقف فيهو ده بدل النقه بتاعتك دي
– لا ..دي قروش الكهربا بس
– قول كده ..خليت المويه يعني ..!؟
– لا ..بس بعد ما تخلص دي اول .،
– اللهم طولك ياروح ..اها دي خلصت ،حرك جيب حق المويه !
– داير بي عشرين الف ..
– بي الجديد ولا القديم !!؟
– بي القديم ..عشرين جنيه يعني ..!
– طيب ما تقول كده من الاول ويهمس بي صوت واطي ..هسي دي شطيف ساي بتشطفك !!؟
– نعم !!!؟..قلت شنو !!!؟؟؟
– ولا حاجه ..هاك اتفكفك ..
– اتفكفك !!؟ ياخ انا جيتك في بيتكم ولا شاحدك ما بي حقي !!؟
– ياخ دقيقه حقك شنو !!؟ مشتري كهربا بي عشره جنيه !!؟ دي ولا حق الورق والحبر الطابعينو فيها !!؟ ومويه بي عشرين دي ولا تعمل ليك كبايتين شاي ساي !!؟امشي ياخ خلينا نشوف البعديك
يا بتاع الهدف تعال سوق الزول ده من هنا ، اشترى وواقف يضيع في زمنا.
وتتواصل المرمطه والاهانات كل مره تمشي تشتري ..وتتواصل القطوعات.
طيب الزول لو بطل يشتري مش احسن !؟ اذا كده كده مافي لا مويه لا كهربا ،..ولا نحنا بنحب البهدله !!؟ ح نسلم للوضع ده لمتين !؟؟
اللخبطه دي حدها وييييييييييييين !!؟
ما بعيد يعملو النفايات في المستشفيات ..ولا المدرسه في قسم الشرطه !! ولا سوق الخضار في المطار
ما لتخ سااااااي الشغلانه
الراي العام
الرازي سليمان
مقالات ذات صلة
-
-
-
-
-
-
-
-
