أحست (منال) بالإشفاق عليه لعلمها المسبق بأن (مشاعر) بعيدة كل البعد عن فكرة الإرتباط بـ(صابر)، ولكنها إضطرت لأن تعده بمصارحتها ونقل حبه ورغبته في الإرتباط بها.. اسرعت بتغير الكلام عندما وصلت (مشاعر) وهي تحمل صناديق العصير المعلب لثلاثتهم، شكرها (صابر) واسرع بالمغادرة فإلتفتت (مشاعر) تراقب نزوله السريع من المدرج ثم قالت لـ (منال):
(كبكبة) ده مالو؟ .. كان دايرك في شنو؟!!
قالت (منال):
كبكبة شنو ياخي حرام عليك .. أنا ما قلتا ليك الزول ده (مكتول غرام) .. هسي قاعد ساعة يشكي ويبكي من حبو ليك.
قالت مشاعر (ساخرة):
أتاري الأيام دي عامل لي فيها (روميو) .. من يشوفني يقعد يتكبكب ويرجف من راسو لي كرعيو.
قضت (منال) بقية اليوم وحتى المساء بغرفتهما في الداخلية وهي تحاول أن تقنع (مشاعر) بإعطاء فرصة لعلاقتها بـ(صابر)، جادلتها طويلا في مزاياه العديدة فهو خريج .. من أسرة طيبة .. يعرفنه ويثقن في أخلاقة التي عايشنها لسنوات، وقبل النوم أفلحت في انتزاع وعد من (مشاعر) بالقبول المبدئ وإعطاء نفسها فرصة لدراسة الموضوع.
خلال الإسبوعين التاليين جهدت (منال) في اعطاء (صابر) فرص للإنفراد بـ (مشاعر) إثناء اليوم في الكلية ليحكي لها عن آماله وتطلعاته ومشاريعه المستقبلية معها، ولكن دائما ما كانت تحبطها في المساء بأنها لم تجد له موقعا في قلبها أكثر من صديق، وذات مساء عادت لتخبرها:
خلاص شطبتا الموضوع .. وإعتذرتا لي صابر.
سألتها (منال) في إستغراب:
استعجلتي مالك؟ .. ما كان تدي نفسك فرصة شوية.
قالت (مشاعر) :
يختي أنا الراجل (الموية) ما بنفع معاي .. دايرة لي زول حمش وقلبو جامد .. ثم أضافت في ضيق:
وبعدين صابر ده ذاتو ما قادر يصبر علي .. كل يوم يسألني عملتي شنو في موضوعنا؟ ويقعد يتجرس فيني .. شابكني قال .. قال (أنا قلبي مفتفت زي الرز المفلفل) .. (وأنا نفسياتي ملخبطة زي صحن السلطة)!!!!
دافعت (منال) عنه بحرارة:
كدي إنتي ختي نفسك في محلو .. صعب الزول يقعد معلق وما عارف راسو من رجليهو في موضوع حساس زي ده.
قالت (مشاعر):
عشان كده مافي داعي أعذبو أكتر من كده .. الموضوع ده ما ماشي لي قدام.
في الصباح عندما إلتقت (منال) بـ (صابر) أسرّ لها في حزن دفين:
صحبتك خلاص .. شوكشتني أمبارح.
أحست بالإشفاق من ملامح الحزن والإنكسار البادية عليه ولكنها أجابته في غيظ:
هي نان كيفن ما تشوكشك يا صابر ..وإنت شابكا رز وسلطة .. يعني عامل لي فيها طباخ الغرام يا فالح ؟!!
لطائف – صحيفة حكايات
[email]munasalman2@yahoo.com[/email]
