> الزير بنقط
> حتي الزير القناوي أول أيام بنقط
> المطرة بتنقط
> الباغة المقدودة بتنقط
> والعرق لما يكون الزول مسخن بنقط
> والنقاع التحت الزير بكون عشان الزير بنقط
> والزول لما يعمل ليهو ركشة بقول عملت لي نقاطة
> كردنة عمل الهلال نقاطة
> والكاردينال شاعر وفيلسوف
> ولأن ولايات السودان هي التي تكون السودان
> كردنة اعتبر الولايات حروف تكون السودان
> ووضع النقاط في الحروف
> في كل ولاية نقطة
> وفطومة تدافع عن النقاط نقطة نقطة
> فطومة
> بقيتي تحبي النقطة دايرة تبقي غناية ولا شنو؟!!!!
> الغنايات جنهن نقطة
> من حبهن للنقطة
> يقاولن الحفلة بي خمسمية وبالن على النقطة
> القونات حيرونا
> كان كدي يا فطومة
> الهلال فيهو قون وقونه
> ولوح التلج بنقط
> وعشان ما ينقط بلفوهوا بي شوال
> لفوهوا بي شوال يا فطومة واعملوا جمبو ذو القعدة
> عشان لما ينقط تمسحوا ساااااااي
> معقولة
> نقطة نقطة
> فريق ولا قطرة يا فطومة
> المهم
> ابو الهل طلع قناوي
> ينقط اليوم كلو
> وبالطريقة دي باتريك حايوحشنا
> ونيمار حايوحشنا شهر خمسة
> وكل المواسير المحلوجة البتنقط حاتوحشنا شهر خمسة
> كردنة طبعاً ما برجى شهر خمسة
> لكن فرقتك حاتكون كبيرة يا الحبيب كردنة
> ايها الناس
> الإعداد ليس إعلام
> والاستعداد ليس بالنفخ
> وتجميل الصورة ما بصعد منصات التتويج في المقصورة
> ومحاورة مقدم ورفاقه لدفاع الهلال كلو يوم الابيض
> تثبت أن الفجيرة كان للترويح
> ايها الناس
> الفريق البتموهوا موية
> زي الملاح البتموهوا موية
> بطلع طعموا مسييييييييييييخ
> والناس كلها بتقوم من الاكل جيعانة
> ايها الناس
> الهلال طلع قناوي كبيييييييييييييير
> ينقط سااااااي
> المهم
> اكتب قبل مباراتنا ضد الفاشر
> اتوقع لها ان تكون بروفة تشجيعية لعزام
> واتوقع ان يكون الاداء فيها على قدر من الاجادة والاهتمام
> ولأننا ندرك جيداً ان الجمهور هو سلاح العبور
> سنجرب اليوم سلاحنا
> وسنفوز بكم هائل
> ندق القراف عشان الجمل يخاف
> والجمل فيها نقطة واحدة
> صدقوني
> باتريك ما قاعد كتير
> يا حليل البلجيكي
> وبلجيكا مشهورة عندنا من زمان
> بنجيب منها الخرد والاسكراب
> البيجو الحايم في البلد دي
> كلو جايينا من بلجيكا
> نجيبو من هناك
> قالب كلتش وماسح قاشات ودخنتو في السما
> بلجيكا اصلها كده
> المهم
> زمان ايام المدارس مدارس
> ايام مجمع المدارس هو بوابة الثورة
> الثورة والمهدية
> واحد راد ليهو واحدة على سنة الله ورسوله
> مجرد ما امتحن الشهادة
> سافر واغترب
> عشان يلم مال ست الحسان
> اهلوا راجنو
> عشان كده اتأخر في القيام بواجبه تجاه الحبيبة
> وست الحسان عشان بت رجال رجتو
> لا كلت ولا ملت
> وانتظرت
> لما يوم الهنا جا
> وتم العرس
> وسافروا سوا
> اتأخرت في الانجاب
> قدر ما اتعالجت ما في فايدة
> ولان الحب كان هو الغاية
> حكاية الولادة دي ما كانت مشكلة هاجس ليهم
> المهم
> يوم شعرت بتغيير وفتور شديد
> الدكتور بشرها
> في حناياها طفل جميل
> وانتظرا قدومه بفارغ الصبر
> كل منهما يتمنى طفلاً له من الطرف الآخر
> جابت ولد
> حلالالالالالاتو
> يشبه ابوهو وفيهو لمحة من خيلانو
> الاهل في السودان نحروا واحتفلوا
> الصغار عملوا دي جي
> المهم
> بعد الولد تم تلاتة سنوات
> جابوهو وجو السودان
> الاهل احتفلوا بيهو
> في يوم من ايام الاجازة ديك
> خلو الولد مع حبوبتو ام امو ومرقو
> الشافع تربية خليج
> شكولاتات سااااااي
> وقام ليك من الصباح على الحاجة
> داير لبن
> الحاجة تكب وتديهو
> داير لبن تاني
> وتالت
> عجل بس شارب ليهو تمنة لبن كاملة
> بعده بي شوية
> جعان
> حبوبتو ادتو ساندوتش
> لهطو ليك في رمشة عين
> تربية خليج استهلاكية جداً
> داير تاني
> الحاجة تحشى والشافع ينحشي وداير تاني
> كيس العيش كمل
> جابت غيرو
> داير عصير
> جك كامل الشافع قام بيهو
> الساعة اتنين الضهر قال داير لبن
> اتجوغر وقال داير عيشة
> حبوبتو احتارت
> المهم
> نام ليها تمنية بالليل بعد لهط تموين شهر
> امو وابوهو دو الساع تمني ونص
> إن شاء الله ما اتعبك يا امي
> الحاجة قالت ابداً والله
> انا لاقياهو وين
> والابو لزوم الكشكرة قال
> ولد متعب شديد يا حاجة
> الحاجة قالت ليهو ابداً والله
> ونبيه كمان
> الابو قال ليها لما يبقى دكتور بنقول ليهو حبوبتك دي اول زول تعالجها
> الحبوبة قالت ابداً ما بطلع دكتور
> الولد ده بطلع شخصية عامة وهامة
> بطلع وزير
> الابو قال ليها عرفتي كيف ؟؟؟
> قالت ليهو أكال خلاص، زول ياكل اليوم كلو غير وزير ببقى شنو يا ولدي عاد !!!!
> ايها الناس
> «إن تنصروا الله ينصركم»
> ايها الناس
> الهلال زي البوليس في اي بلد عندو نقطة
> آها
> نجي لي شمارات والي الخرتوم
> والينا
> الليلة من الشمار أعفينا
> بس اقرأ قصة الشافع الفوق يا والينا
سلك كهربا
ننساك كيف وناس شهيتها فاتحة زي نقطة البوليس
والي لقاء
سلك[/JUSTIFY]
