> مافي شك إنها ماسورة
> في ماسورة مقفولة وتمام
> لكن برضو ماسورة
> وفي ماسورة على العليها بتنقط وهي مقفولة
> نقطة نقطة
> الماسورة المحلوجة بتنقط
> أيها الناس
> مقدم كان في امكانه أن يحسمها والشمس بره
> ولكنه تسرع
> ولو اتبع هلال التبلدي استراتيجية الهجوم الضاغط على البتنقط
> كان البنتقط نقطة ما نقطتها
> كان الماسورة رجعت تشخر
> خخخخخخخخخخخ
> الموية قاطعة
> الماسورة المحلوجة بتنقط
> وبتهدر الموية وبتملى السبتك
> ماسورتكم دي ياروشا جيبوا ليها جلدة
> تيم كردنة اي كورة درنة
> من خمس مباريات تسع نقاط
> نقطة نقطة
> نقطة وسطر جديد
> وهنا نقطة وهنا نقطة
> آآآآآآآآآآآآآي سمح انت وعسل انت
> في شندي نقطة وفي الخرطوم نقطة وفي الابيض نقطة
> الكاردينال يضع النقط فوق الحروف
> اتنقطي ونقطي يا ماسورة
> لكن مقدم بالغ
> كان قطع الموية وخلي الماسورة تشخر
> خخخخخخخخخخخخخخخ
> خلوهم يدوكم كاس الشبكة
> قال ايه
> خمسة مباريات ما دخل فينا قون
> الرقم القياسي باقي ليكم عليهو كتير
> الرقم القياسي حققوا كالعادة المريخ
> انهى الدورة الاولى بدون ما يلج مرماهو هدف
> وواصل في الدورة التانية بدون ما يلج مرماهو هدف
> وكان الاهلة وقتها كل امنياتهم
> موش المريخ يتغلب او يتعادل
> كانت امانيهم يدخل قون في المريخ
> واستمر المريخ بشباك عذراء حتي تبقت للدوري فقط خمس مباريات
> وحينها احرز ود ابليس اول الاهداف
> يعني في دي برضو
> الاعجاز والرقم القياسي مريخي
> نقطة سطر جديد
> ايها الناس
> قبائل السودان ليها شلوخ بتميزها
> يعني اهلنا الشوايقة شلوخهم لا ورا
> والجعلية خواجات ساي
> ناس تي واتش
> والدناقلة شلاخهم وقفن شهود
> وحتي قبائل الجنوب ايام الجنوب كان جنوبنا
> النوير شلوخهم كانت نقط مرصوصة علي جباههم المشرقة
> تلقى ليك جنوبي جبهتو النقط فيها تتطاقش
> تعرفوا طوالي نوير
> اهل فاولينو
> اسي بعد الانفصال
> البنلقاهو منقط نقطة نقطة
> نعرفوا طوالي هلالابي
> اتاريك يا كردنة بتحب الجنوب من زمان
> وكشفناك في الجنوب بتحب النوير
> نقطة نقطة
> ويا ماسورتنا نقطي
> واجمل اعذار الاهلة قالوا
> ستة ما لاعبين
> يا ربي الهلال لعب بي خمسة في الميدان ؟؟؟
> الحارس والدفاع الما اساسي عندكم منو ؟؟؟؟
> بشة وفيصل الجوهرة بقوا ما اساسيين ؟؟؟
> كيبي وكاريكا من الرديف ؟؟؟
> نلسون الغاني مو اساس دحين؟؟؟
> سيدي بيه احتياطي يا ربي؟؟؟؟
> ولا الاساسيين في الهلال اربعة
> مساوي ووليد والشغيل
> ولو ديل اساسينكم اساسكم ضعيف
> وماسورتكم محلوجة
> بتنقط نقطة نقطة
> ايها الاهلة الشرفاء
> ما تزعلوا من كردنة حبيبي
> كردنة زول واضح
> ومن اول يوم قال ليكم انا اموري واضحة
> وقال ليكم جيت لقيت نادي الهلال تربيزتين وستة كراسي
> وجيت عشان اخت النقط في الحروف
> يبقى لما ينقط نقطة نقطة ما تزعلوا
> فطومة
> فيصل الجوهرة امس وقع كم وقعة؟؟؟
> اول مرة اشوف لي زول بقع اكتر من الجنيه
> برج التجارة القدر الضربة
> وقع مرة واحدة
> واتجوهري
> ايها الناس
> الجمهور هو زاد العبور
> واليوم نلتقي مريخ السلاطين بالقلعة
> تعالوا نعمل من الموضوع بروفة تشجيعية
> بروفة نوصل فيها للاعبين إننا أسد تزأر
> إننا ليس من بيننا أشتر
> إننا نعتد على الله والله أكبر
> تعالوا نثبت للاعبين إننا سنداً لهم
> إننا نسينا إخفاقهم في تنزانيا.. إننا نثق في قدرتهم على تخطي الزامبي
> إننا جينا لنصرتهم لا لمحاربتهم
> أيها الناس
> إنهم أسلحتنا التي نقاتل بها
> فلا تفرِّطوا في قدرات أسلحتكم يا شفوت
> ومهما كان نوع السلاح
> بحقق النصر اذا كان في يد فارس
> ونحنا فرسان وشفوت وقدرها
> المهدي عليه السلام
> بالسيف انتصر على آلية الاتراك
> لأن إيمانه بجنوده ومن قبلهم بره كان أكبر
> ونحن نؤمن بجنودنا
> أتمنى أن يحيينا اللاعبون
> وأن نرد التحية بأحسن منها
> لتنطلق الحناجر
> وحينما تنطلق حناجر الشفوت
> يسكت الجميع
> البلد فيها أسد
> أيها الناس
> تعالوا نقلبها بروفة تشجيعية
> نعتبرها تمرين لينا
> هيا أيها الشفوت
> المهم
> كردنة
> اقفل ماسورتك دي يا حبيب
> المهم
> الابيض فيها شنو يا وليد ؟؟؟
> أ يها الناس
> «إن تنصروا الله ينصركم»
> آها
> نجي لي شمارات والي الخرتوم
> والينا
> عشان نطبق قانون نتصرف بدون قانون ؟؟؟
> قصة المحليات البتشيل نِمَر العربات الواقفات في الشارع يا والينا
> قال ايه
> قال ممنوع الغسيل هنا
> خلاص البلد نضفت فضل فيها غسيل العربات وطينها
> والغريبة يا والينا
> ما في قانون بدي الحق في قليع لوحات العربات اللينا
> وافرض يا والينا
> زول زعلان من زول فينا
> كشح ليهو موية تحت عربيتو
> تغرمو سيد العربية بدل المية ميتينا!!
> والدليل يا والينا
> يا العربية جمبها اثر موية وحتة طينة
> يا العربية نضيفة والود الغسلها ما لقينا
> يعني تاني نكندك عرباتنا زي رماد وشوشنا نمرق؟؟؟
> افتينا
سلك كهربا
ننساك كيف وعلي اليمين جاطت جنس جوطة
والي لقاء
سلك[/JUSTIFY]
